ຂປລ. ກະຊວງ ໂຍທາທິການ ແລະ ຂົນສົ່ງ ເປັນເຈົ້າພາບ ຈັດກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 55 (55th STOM) ແລະ ກອງປະຊຸມປິ່ນອ້ອມ ໃນລະຫວ່າງ ວັນທີ 6-7 ມິຖຸນາ 2023, ທີ່ນະຄອນຫລວງວຽງຈັນ. ພາຍໃຕ້ການເປັນປະທານຂອງ ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ, ທັງເປັນຫົວໜ້າຄະນະຜູ້ແທນຝ່າຍລາວ, ໂດຍການເປັນກຽດເຂົ້າຮ່ວມຂອງ ທ່ານ ງາມປະສົງ ເມືອງມະນີ  ລັດຖະມົນຕີກະຊວງ ໂຍທາທິການ ແລະ ຂົນສົ່ງ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
  ກອງປະຊຸມຄັ້ງນີ້, ໄດ້ທົບທວນການຈັດຕັ້ງປະຕິບັດບັນດາໜ້າວຽກ, ກິດຈະກໍາ ແລະ ແຜນງານຕ່າງໆ ທີ່ໄດ້ຕົກລົງກັນໃນ ກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 28 ແລະ ກອງປະຊຸມປິ່ນອ້ອມຕ່າງໆ ທີ່ໄດ້ຈັດຂຶ້ນຢູ່ ບາລີ ປະເທດອິນໂດເນເຊຍ ໃນທ້າຍ ປີ 2022 ຜ່ານມາ;  ລາຍງານຄວາມຄືບໜ້າການຈັດຕັ້ງແຜນງານ 2022-2023 ພາຍໃຕ້ແຜນຍຸດທະສາດຂົນສົ່ງອາຊຽນ 2016-2025 (ASEAN Transport Strategic Plan) ແລະ ທົບທວນທ້າຍສະໄໝຂອງແຜນຍຸດທະສາດສະ ບັບປັດຈຸບັນ ເພື່ອຮ່າງຍຸດທະສາດສະບັບຕໍ່ໄປ; ຕິດຕາມຜົນກອງປະຊຸມຂອງ 4 ໜ່ວຍງານທີ່ຢູ່ໃນແຜນຍຸດທະສາດການຂົນສົ່ງອາຊຽນຄື: ໜ່ວຍງານການຂົນສົ່ງທາງອາກາດ, ໜ່ວຍງານການຂົນສົ່ງທາງ ບົກ, ໜ່ວຍງານການຂົນສົ່ງທາງທະເລ ແລະ ໜ່ວຍງານການອໍານວຍຄວາມສະດວກດ້ານການຂົນ ສົ່ງ;  ການກະກຽມເອກະສານຕ່າງໆທີ່ຈະສະເໜີ ຮັບຮອງໃນກອງປະຊຸມ ລັດຖະມົນຕີຂົນສົ່ງອາຊຽນຄັ້ງທີ 29 ທີ່ມີແຜນຈະຈັດຂຶ້ນໃນເດືອນ ພະຈິກ 2023 ຢູ່ ສປປ ລາວ.  ນອກຈາກນີ້, ຍັງໄດ້ປືກສາຫາລືຂັ້ນ STOM ເພື່ອຈະເຊີນເອົາປະເທດ ຕີມໍ ແລັດສະເຕ ເຂົ້າເປັນຜູ້ສັງເກດການໃນກອງປະຊຸມລະດັບວິຊາການ, ລະດັບໜ່ວຍງານ ແລະ ລະດັບອື່ນໆຂອງຂະແໜງການຂົນສົ່ງ; ຕິດຕາມການປະຕິ ບັດກິດຈະກໍາ ທີ່ໄດ້ຮັບການຊ່ວຍເຫລືອຈາກຄູ່ຮ່ວມພັດທະນາ ເປັນຕົ້ນ ສປ ຈີນ, ຍີ່ປຸ່ນ, ເກົາຫລີ, ສະຫະລັດອາເມລິກາ ແລະ ປະເທດອື່ນໆ.
   ໂອກາດນີ້, ທ່ານ ງາມປະສົງ ເມືອງມະນີ ໄດ້ກ່າວວ່າ:  ສປປ ລາວ ໄດ້ຕັ້ງໜ້າປະຕິບັດແຜນຍຸດທະສາດຂົນສົ່ງອາຊຽນ 2016-2025, ພ້ອມທັງປະຕິບັດນະໂຍບາຍການຫັນ ສປປ ລາວ ຈາກປະ ເທດທີ່ບໍ່ມີທາງອອກສູ່ທະເລ ໄປສູ່ປະເທດເຊື່ອມຈອດ-ເຊື່ອມໂຍງ. ໃນນັ້ນ, ໄດ້ສຳເລັດໂຄງການພື້ນ ຖານດ້ານການຂົນສົ່ງທີ່ສຳຄັນ ເປັນຕົ້ນ ແມ່ນສຳເລັດໂຄງການລົດໄຟ ລາວ-ຈີນ ທີ່ເປັນສ່ວນສຳຄັນຂອງໂຄງການເຊື່ອມຕາໜ່າງລົດໄຟ ສິງກະໂປ-ຄຸນໝິງ; ສຳເລັດໂຄງການກໍ່ສ້າງທາງດ່ວນວຽງຈັນ-ວັງວຽງ ຊ່ວງທີ 1 ຂອງໂຄງການທາງດ່ວນວຽງຈັນ-ບໍ່ເຕັນ ແລະ ສຳເລັດການເປີດນໍາໃຊ້ທ່າບົກ-ທ່ານາແລ້ງ ບັນດາໂຄງການດັ່ງກ່າວ, ໄດ້ປ່ຽນຮູບໂສມຂອງການເຊື່ອຈອດ-ເຊື່ອມໂຍງຂອງ ສປປ ລາວ ແລະ ຂອງອາຊຽນ ໂດຍສະເພາະການເຊື່ອມຈອດທາງບົກ ແລະ ການຄ້າ.
   ທ່ານ ງາມປະສົງ ເມືອງມະນີ ຍັງໄດ້ກ່າວອີກວ່າ: ໃນນາມປະທານຂອງກອງປະຊຸມ ຂະແໜງ ການຂົນສົ່ງອາຊຽນ ປີ 2023 ນີ້, ສປປ ລາວ ສະເໜີໃຫ້ບັນດາປະເທດສະມາຊິກອາຊຽນ ສືບຕໍ່ສຸມໃສ່ບາງແຜນວຽກ ເປັນຕົ້ນ ການພັດທະນາພື້ນຖານໂຄງລ່າງ ຂົນສົ່ງຫລາຍຮູບແບບທີ່ເຊື່ອມສານເປັນລະ ບົບ ປະກອບກັບການວາງແຜນນໍາໃຊ້ພື້ນທີ່;  ການເຊື່ອມສານດ້ານນະໂຍບາຍ ແລະ ລະບຽບການຂົນ ສົ່ງຂ້າມແດນລະຫວ່າງປະເທດອາຊຽນ ເພື່ອຮັບປະກັນການຍົກລະດັບຄວາມສາມາດໃນການແຂ່ງຂັນດ້ານ ຂົນສົ່ງ ແລະ ໂຍທາທິການ; ສົ່ງເສີມການແລກປ່ຽນຖານຂໍ້ມູນຂົນສົ່ງ ແລະ ການນໍາໃຊ້ລະບົບທັນສະໄໝໃນວຽກງານຂົນສົ່ງຂ້າມແດນ; ສ້າງເງື່ອນໄຂດຶງດູດການມີສ່ວນຮ່ວມຂອງທຸກພາກສ່ວນໃນການພັດທະນາຂະແໜງຂົນສົ່ງອາຊຽນ ໂດຍສະເພາະ ຊຸກຍູ້ການມີສ່ວນຮ່ວມລົງທຶນໃນພື້ນຖານໂຄງລ່າງຂົນ ສົ່ງ ໃນຮູບແບບລົງທຶນຮ່ວມລະຫວ່າງພາກລັດ ແລະ ເອກະຊົນ ເພື່ອຮ່ວມກັນບັນລຸຄາດໝາຍ ເຮັດໃຫ້ອາຊຽນ ກາຍເປັນຕະຫລາດດຽວ ແລະ ເປັນຖານການຜະລິດຂອງພາກພື້ນ ແລະ ສາກົນ.

 ຂ່າວ: ກິດຕາ

KPL