ຂປລ. ກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍປ້າຍ (ສະບັບປັບປຸງ) ຈັດ​ຂຶ້ນ​ໃນວັນທີ 8 ພຶດສະພາ 2025 ຢູ່ສະພາແຫ່ງຊາດ (ສພຊ) ໂດຍການເປັນປະທານຂອງ ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ມີບັນດາປະທານ ແລະ ຮອງປະທານກຳມາທິການທີ່ກ່ຽວຂ້ອງຂອງ ສພຊ, ຮອງລັດຖະມົນຕີກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ຮອງລັດຖະມົນຕີກະຊວງຍຸຕິທໍາ, ຮອງຫົວໜ້າຫ້ອງວ່າການສໍານັກງານປະທານປະເທດ, ຄະ ນະທີ່ປຶກສາທາງດ້ານກົດໝາຍ ຂອງຄະນະປະຈໍາສະພາແຫ່ງຊາດ ແລະ ພາກສ່ວນກ່ຽວຂ້ອງ ​ເຂົ້າ​ຮ່ວມ.

ທ່ານ ພົທ ສຸວອນ ເລືອງບຸນມີ ໄດ້ມີຄຳເຫັນວ່າ: ກອງປະຊຸມຄັ້ງນີ້, ແມ່ນການຄົ້ນຄວ້າເນືື້ອໃນຮອບ ດ້ານຂອງຮ່າງກົດໝາຍຢ່າງລະອຽດ ໂດຍເລີ່ມແຕ່ມາດຕາທໍາອິດຫາມາດຕາສຸດທ້າຍ ເພື່ອເຮັດໃຫ້ເນື້ອໃນ ຂອງຮ່າງກົດໝາຍສະບັບນີ້ ຄົບຖ້ວນ, ຊັດເຈນ, ສອດຄ່ອງກັບສະພາບການຂະຫຍາຍຕົວ ທາງດ້ານເສດຖະກິດ-ສັງຄົມໃນປັດຈຸບັນ ແລະ ການຈັດຕັ້ງປະຕິບັດວຽກງານປ້າຍຕົວຈິງ ແນໃສ່ເຮັດໃຫ້ຮ່າງກົດໝາຍມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບລັດຖະທໍາມະນູນ, ກົດໝາຍອື່ນທີ່ປະ ກາດໃຊ້ແລ້ວ ເພື່ອສາມາດນໍາເຂົ້າພິຈາລະນາ ຮັບຮອງເອົາ ໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX.

​


ໂອກາດ​ນີ້, ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ ໄດ້ສະເໜີໂດຍຫຍໍ້ກ່ຽວກັບເຫດຜົນ ແລະ ຄວາມຈຳເປັນ ຂອງການປັບປຸງກົດໝາຍວ່າດ້ວຍປ້າຍ ແມ່ນເພື່ອປະຕິບັດໜ້າທີ່ປົກປັກຮັກສາ ແລະ ພັດທະນາປະເທດຊາດ ຕາມແຜນພັດທະນາເສດຖະກິດ-ສັງຄົມ, ວັດທະນະທຳ ແຕ່ລະໄລຍະ ໃຫ້ສອດຄ່ອງ ແລະ ບັນລຸຄາດໝາຍທີ່ວາງໄວ້, ສາມາດຮັກສາໄດ້ລັກສະນະຊາດ, ລັກສະນະ​ກ້າວໜ້າ ແລະ ລັກສະນະມະຫາຊົນ, ສາມາດເຊື່ອມໂຍງກັບພາກພື້ນ ແລະ ສາກົນ; ສ້າງຄວາມເປັນເອກະພາບ, ສະເໝີພາບ ແລະ ຄວາມຍຸຕິທຳ ໃນການແຂ່ງຂັນດຳເນີນທຸລະກິດກ່ຽວກັບປ້າຍ ແລະ ການຈັດຕັ້ງປະຕິບັດກົດໝາຍວ່າດ້ວຍປ້າຍ; ແກ້ໄຂການແບ່ງຂັ້ນຄຸ້ມຄອງ ແລະ ເກັບລາຍຮັບວິຊາການຖອກ ເຂົ້າງົບປະມານໃຫ້ບັນລຸຕາມຄາດໝາຍ; ສ້າງຄວາມສອດຄ່ອງຕໍ່ກົດໝາຍ ແລະ ນິຕິກຳໃຕ້ກົດໝາຍ ກັບບັນດາຂະແໜງການ (ສາທາລະນະສຸກ, ໂຍທາທິການ ແລະ ຂົນສົ່ງ, ອຸດສາຫະກຳ ແລະ ການຄ້າ, ການລົງທຶນ); ແກ້ໄຂການຜະລິດ ແລະ ການຫ້າມນຳເຂົ້າປ້າຍຈາກຕ່າງປະເທດ ທີ່ຂຽນຕົວໜັງສືບໍ່ຖືກຕາມຫລັກໄວຍາກອນລາວ, ສີສັນຂອງປ້າຍບໍ່ສອດຄ່ອງກັບ ເອກະລັກວັດທະນະທຳຂອງ ສປປ ລາວ; ກຳນົດຮູບແບບຂອງປ້າຍໃຫ້ຄົບຖ້ວນ ເຮັດໃຫ້ການຄຸ້ມຄອງງ່າຍຂຶ້ນ; ກຳນົດຮູບແບບການຂໍອະ ນຸຍາດນຳໃຊ້ປ້າຍ, ການດຳເນີນທຸລະກິດປ້າຍ, ເວລານຳໃຊ້ປ້າຍໃຫ້ຄົບຖ້ວນ.

​ເມື່ອກົດໝາຍວ່າດ້ວຍປ້າຍ ຖືກຮັບຮອງ ແລະ ປະກາດໃຊ້ ຈະເປັນເຄື່ອງມືໃນການຈັດຕັ້ງປະຕິບັດ ວຽກງານຄຸ້ມຄອງປ້າຍໃຫ້ມີປະສິດທິພາບ ແລະ ປະສິດທິຜົນດີກວ່າເກົ່າ; ເນື້ອໃນກົດໝາຍມີຄວາມສົມບູນ, ລະອຽດຈະແຈ້ງຂຶ້ນ, ເຂົ້າໃຈງ່າຍໃນທາງປະຕິບັດການກວດກາການເກັບລາຍຮັບ, ຕອບສະໜອງຕາມຄວາມຮຽກຮ້ອງຕ້ອງການ, ທັນກັບສະພາບການຂະຫຍາຍຕົວ ຂອງເສດຖະກິດ-ສັງຄົມໃນປັດຈຸບັນ ແລະ ອະນາຄົດ; ເຮັດໃຫ້ປະຊາຊົນລາວບັນດາເຜົ່າ ແລະ ສາກົນ ເຫັນໄດ້ເຖິງນະໂຍ ບາຍຢ່າງຈະແຈ້ງຂອງພັກ ແລະ ລັດຖະບານ ໃນການຄຸ້ມຄອງ ແລະ ສົ່ງເສີມວຽກງານປ້າຍ; ຍົກສູງສະຕິຊາດ, ຄວາມເປັນເອກະລາດ, ເອກະພາບ ແລະ ເປັນເຈົ້າຕົນເອງ ຂອງປະຊາຊົນບັນດາເຜົ່າໃຫ້ສູງຂຶ້ນ; ສາມາດແກ້ໄຂບັນຫາຄົງຄ້າງການໂຄສະນາດ້ວຍປ້າຍ ເປັນຕົ້ນແມ່ນສ້າງຄວາມເປັນເອກະພາບ, ສະເໝີພາບ ແລະ ຄວາມຍຸຕິທຳ ໃນການແຂ່ງຂັນດຳເນີນທຸລະກິດກ່ຽວກັບປ້າຍ; ສ້າງ ແລະ ປັບປຸງກົດໝາຍ ໃຫ້ສອດຄ່ອງກັບກົດໝາຍ ແລະ ນິຕິກຳໃຕ້ກົດໝາຍ ກັບບັນດາຂະແໜງການອື່ນ; ສ້າງຄວາມອາດສາມາດສ້າງລາຍຮັບເຂົ້າງົບປະມານ ແລະ ການນຳໃຊ້ໂປ່ງໃສ, ກວດສອບໄດ້; ແກ້ໄຂການຜະລິດ ແລະ ນຳເຂົ້າປ້າຍຈາກຕ່າງປະເທດ; ສ້າງຄວາມເປັນລະບຽບຮຽບຮ້ອຍໃນການຕິດຕັ້ງປ້າຍໃນຕົວເມືອງ ໃຫ້ມີຄວາມສວຍງາມ.

ພ້ອມ​ກັນ​ນີ້, ຜູ້ເຂົ້າຮ່ວມກອງ​ປະຊຸມ​ຍັງໄດ້ເປັນເຈົ້າການຄົ້ນຄວ້າ ແລະ ປະກອບຄໍາຄິດຄໍາເຫັນຕໍ່ບັນດາເນື້ອໃນຮ່າງກົດໝາຍສະບັບນີ້ ຢ່າງມີຈຸດສຸມ, ມີລັກສະນະຫລັກການ ຕິດພັນກັບການຈັດຕັ້ງປະຕິບັດຕົວຈິງ ແລະ ມີຄໍາເຫັນລົງເລິກແຕ່ລະພາກ, ໝວດ, ມາດຕາ. ໃນນັ້ນ, ມີຫລາຍເນື້ອໃນຂອງຫລາຍມາດຕາ ໄດ້ຮັບການປັບປຸງໃຫ້ມີຄວາມຄົບຖ້ວນ, ຮັດກຸມ ແລະ ຊັດເຈນກວ່າເກົ່າ.

ຂ່າວ: ອາລິນ ສຸພິມມະປະດິດ

KPL