ຂປລ. ວັນທີ 2 ພຶດສະພາ 2025 ຜ່ານມາ, ທີ່ ບາງກອກ ປະເທດໄທ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະ ສອງຝ່າຍກັບ ທ່ານ ມາຣິດ ສະຫງ່ຽມພົງ  ລັດຖະມົນຕີ ວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ, ໃນໂອກາດນຳພາຄະນະຜູ້ແທນລາວ ເດີນ ທາງເຂົ້າຮ່ວມກອງປະຊຸມ ເວທີປຶກສາຫາລື ແຜນງານໂຄງການອາຊີຕາເວັນອອກສຽງໃຕ້ ຂອງອົງການຮ່ວມມືດ້ານ ເສດຖະກິດເພື່ອການພັດທະນາ (OECD Southeast Asia Regional Programme 2025).

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ອໍານວຍຄວາມສະດວກດ້ານຕ່າງໆ ໃຫ້ແກ່ຄະນະຜູ້ແທນຂອງ ສປປ ລາວ ໃນການເດີນທາງເຂົ້າຮ່ວມກອງປະຊຸມຄັ້ງນີ້, ພ້ອມທັງສະແດງຄວາມຊົມເຊີຍ ຕໍ່ການເປັນເຈົ້າພາບຮ່ວມ ຈັດກອງປະຊຸມດັ່ງກ່າວຂອງໄທ ແລະ ຍັງໄດ້ສະແດງ ຄວາມຂອບໃຈຝ່າຍໄທ ທີ່ໄດ້ແຕ່ງຕັ້ງຜູ້ຕາງໜ້າລັດຖະບານ ໄປເຂົ້າຮ່ວມພິທີຊາປະນະກິດ ທ່ານ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງ ພັກປະຊາຊົນປະຕິບັດວັດລາວ, ອະດີດປະທານ ປະເທດ ແຫ່ງ ສປປ ລາວ ໃນວັນທີ 7 ເມສາ 2025 ທີ່ຜ່ານມາ.

 ໃນການພົບປະ, ສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ໄທ ທີ່ເຫັນວ່າໄດ້ຮັບ ການຈັດຕັ້ງຜັນຂະຫຍາຍ ແລະ ເຕີບໃຫຍ່ ຂະຫຍາຍຕົວ ຕະຫລອດໄລຍະ 75 ປີ ຜ່ານມາ ໂດຍກວມເອົາທຸກຂົງເຂດວຽກງານ ຜ່ານກົນໄກການຮ່ວມມືຕ່າງໆ ນັບແຕ່ຂັ້ນສູນກາງຮອດທ້ອງຖິ່ນ; ບັນດາໂຄງ ການຮ່ວມມື ຂອງສອງປະເທດ ໄດ້ຮັບການຈັດຕັ້ງປະຕິບັດຢ່າງມີ ຜົນສໍາເລັດເປັນກ້າວໆມາ; ການແລກປ່ຽນການ ຢ້ຽມຢາມເຊິ່ງກັນ ແລະ ກັນໃນທຸກລະດັບ, ລວມເຖິງການພົບປະຫາລື ລະຫວ່າງ ສອງປະເທດ ໄດ້ສືບຕໍ່ຢ່າງເປັນ ປົກກະຕິ ແລະ ຕໍ່ເນື່ອງ ແນໃສ່ສ້າງຄວາມເປັນເອກະພາບ ແລະ ຄວາມເຂົ້າໃຈດ້ານນະໂຍບາຍ ໃນການພົວພັນ ແລະ ຮ່ວມມື ລະຫວ່າງສອງປະເທດ. ໃນນັ້ນ, ສອງຝ່າຍໄດ້ຕີລາຄາສູງຕໍ່ຜົນສໍາເລັດ ການສະເດັດຢ້ຽມຢາມ ສປປ ລາວ ຂອງ ກົມສົມເດັດພະເທບ ໃນວັນທີ 21-24 ເມສາ 2025 ທີ່ຜ່ານມາ. ສອງຝ່າຍ ຍັງໄດ້ລົງເລິກປຶກສາຫາລືກັນໃນ ຫລາຍຂົງເຂດວຽກງານ ເປັນຕົ້ນ ການກຽມຄວາມພ້ອມ ພິທີເປີດນໍາໃຊ້ຂົວມິດຕະພາບ ລາວ-ໄທ ແຫ່ງທີ 5 (ບໍລິ ຄໍາໄຊ-ບຶງການ) ທີ່ມີແຜນຈະຈັດຂຶ້ນ ໃນທ້າຍປີ 2025, ວຽກງານ ການພັດທະນາ ບໍລິເວນຊາຍແດນຂອງສອງປະ ເທດ, ການຮ່ວມມືດ້ານແຮງງານ, ການຮ່ວມມືໃນຂອບອົງການ OECD, ການຮ່ວມມືໃນກຸ່ມ BRICS ແລະ ອື່ນໆ. ພ້ອມກັນນີ້, ສອງຝ່າຍ ເຫັນດີທີ່ຈະສືບຕໍ່ ເຮັດວຽກຮ່ວມກັນຢ່າງໃກ້ຊິດ ເພື່ອປະກອບສ່ວນເຂົ້າໃນວຽກງານ ຕ່າງປະເທດໃນເວທີຕ່າງໆ ທັງໃນຂອບສອງຝ່າຍ ແລະ ຫລາຍຝ່າຍ ໃຫ້ໄດ້ຮັບການພັດທະນາຍິ່ງໆຂຶ້ນ ແລະ ດໍາເນີນໄປດ້ວຍດີ.

ຂ່າວ-ພາບ: ກົມການຂ່າວ, ກະຊວງການຕ່າງປະເທດ

KPL