ຂປລ.  ກອງປະຊຸມທຸລະກິດລາວ ຄັ້ງທີ 14 ຈັດຂຶ້ນໃນວັນທີ 27 ມີນາ 2023 ເພື່ອທົບທວນ ຄືນຜົນຂອງການປຶກສາຫາລື ລະຫວ່າງພາກລັດ ແລະ ພາກທຸລະກິດຢູ່ລາວ ເພື່ອແນໃສ່ປັບປຸງສະພາບແວດລ້ອມ ການດໍາເນີນທຸລະກິດໃນ ສປປ ລາວ ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ,  ມີຜູ້ຕາງໜ້າຈາກຂະແໜງການຕ່າງໆຂອງພາກລັດ, ຜູ້ປະກອບການລາວ ແລະ ຕ່າງປະເທດ ເຂົ້າຮ່ວມ.
     ກອງປະຊຸມຄັ້ງນີ້, ໄດ້ທົບທວນ ຄວາມຄືບໜ້າຂອງການປຶກສາຫາລື ລະຫວ່າງພາກລັດ ແລະ ພາກທຸລະກິດ ຈາກກອງປະຊຸມທຸລະກິດລາວ ຄັ້ງທີ 13 ເປັນຕົ້ນມາ ເຊິ່ງໃນ 1 ປີຜ່ານມາ ສາມາດຍາດໄດ້ຜົນສຳເລັດຫລາຍດ້ານ ໂດຍສະເພາະການຫລຸດເວລາ ແລະ ຄ່າໃຊ້ຈ່າຍໃນການເລີ່ມຕົ້ນການດໍາເນີນທຸລະກິດ ສຳລັບກິດຈະກຳ ທີ່ບໍ່ນອນຢູ່ໃນບັນຊີຄວບຄຸມ, ການນໍາໃຊ້ວິທີຄວບຄຸມຄວາມສ່ຽງ ໃນການອອກໃບອະນຸຍາດດໍາເນີນທຸລະກິດ ໃນບາງຂະແໜງການ, ປັບປຸງການເຂົ້າເຖິງກົດໝາຍ ແລະ ລະບຽບການທີ່ພົວພັນກັບການຄ້າ ແລະ ການລົງທຶນ, ຄວາມພະຍາຍາມ ໃນການຈັດຕັ້ງປະຕິບັດບັນດາຂໍ້ຂໍ້ຜູກພັນ ທີ່ຕົກລົງໃນສົນທິສັນຍາການຄ້າ ສອງຝ່າຍ ແລະ ຫລາຍຝ່າຍເຊັ່ນ: ລະດັບພາກພື້ນ ແລະ ລະດັບສາກົນ, ການເພີ່ມທະວີຂີດຄວາມສາມາດໃຫ້ແກ່ ຈຸນລະວິສາຫະກິດ, ວິສາຫະກິດຂະໜາດນອຍ ແລະ ກາງ. ນັບແຕ່ ກອງປະຊຸມທຸລະກິດລາວ ຄັ້ງທີ 13 ເປັນຕົ້ນມາ ໜ່ວຍງານປຶກສາຫາລືພາກທຸລະກິດ ແລະ ຂະແໜງການກ່ຽວຂ້ອງຂອງພາກລັດ ໄດ້ກຳນົດຂໍ້ສະເໜີການແກ້ໄຂບັນຫາບຸລິມະສິດ ທັງໝົດ 49 ຂໍ້ສະເໜີ ເຊິ່ງຕິດພັນກັບຂົງເຂດຕ່າງໆເຊັ່ນ: ຂັ້ນຕອນການກໍ່ຕັ້ງທຸລະກິດ, ການອຳນວຍຄວາມສະດວກທາງດ້ານການຄ້າ, ການເຂົ້າເຖິງແຫລ່ງທຶນ, ການບັງຄັບໃຊ້ກົດໝາຍ ແລະ ລະບຽບການ, ການສົ່ງເສີມການທ່ອງທ່ຽວທີ່ຍືນຍົງ ແລະ ການຜະລິດກະສິກຳ ​ໂດຍມີ 21 ຂໍ້ສະເໜີ ທີ່ແກ້ໄຂໄດ້ແລ້ວ, 20 ຂໍ້ສະເໜີ ແມ່ນມີຄວາມຄືບໜ້າໃນການແກ້ໄຂ ແຕ່ຕ້ອງການເວລາເພີ່ມເຕີມ. ສ່ວນອີກ 8 ຂໍ້ສະເໜີ ແມ່ນບໍ່ສາມາດແກ້ໄຂໄດ້ ເນື່ອງຈາກມີຂໍ້ຈຳກັດ ທີ່ສົມເຫດສົມຜົນ.
     ໂອກາດນີ້,  ທ່ານ ສອນໄຊ ສີພັນດອນ ​ໄດ້​ມີ​ຄຳ​ເຫັນວ່າ: ກອງປະຊຸມຄັ້ງນີ້, ຈັດຂຶ້ນໃນເງື່ອນໄຂ ແລະ ສະພາບແວດລ້ອມ ຂອງພາກພື້ນ ແລະ ສາກົນ ທີ່ມີການຜັນແປໄປຢ່າງສະຫລັບສັບຊ້ອນ, ຄາດເດົາໄດ້ຍາກ, ເຖິງວ່າສະພາບການລະບາດຂອງໂຄວິດ-19 ຈະຜ່ອນຄາຍລົງຫລາຍແລ້ວກໍຕາມ, ແຕ່ກໍໄດ້ສົ່ງຜົນກະທົບທັງທາງກົງ ແລະ ທາງອ້ອມ ຕໍ່ເສດຖະກິດ, ການເງິນ, ການຄ້າ ແລະ ການລົງທຶນ. ຜົນກະທົບຂອງຄວາມຂັດແຍ່ງດັ່ງກ່າວ ຕໍ່ລະບົບການຂົນສົ່ງ, ຕໍ່ຕ່ອງໂສ້ການຜະລິດ ແລະ ການສະໜອງ ໄດ້ກໍໃຫ້ເກີດຄວາມສ່ຽງສູງຂຶ້ນໃນການເຄື່ອນໄຫວການຄ້າ, ການລົງທຶນ ແລະ ການດຳເນີນທຸລະກິດ. ສຳລັບ ສປປ ລາວ, ສະພາບແວດລ້ອມທາງດ້ານເສດຖະກິດ ກໍຍັງຢູ່ໃນເງື່ອນໄຂທີ່ຫຍຸ້ງຍາກສົມຄວນ ຍ້ອນພື້ນຖານການຜະລິດທີ່ບໍ່ທັນເຂັ້ມແຂງ, ຍ້ອນໄດ້ຮັບຜົນກະທົບຈາກການລະບາດ ຂອງພະຍາດໂຄວິດ ແລະ ໄພພິບັດທຳມະຊາດ ໃນຊຸມປີຜ່ານມາ. ພ້ອມກັນນີ້, ບັນຫາໜີ້ສິນພາກລັດ, ລາຄານໍ້າມັນທີ່ສູງຂຶ້ນ, ລາຍຮັບຈາກການສົ່ງອອກແຮ່ທາດ ແລະ ທ່ອງທ່ຽວ ທີ່ຫລຸດລົງ ກໍເຮັດໃຫ້ການຈັດຕັ້ງປະຕິບັດແຜນຟື້ນຟູເສດຖະກິດ ຫລັງໂຄວິດ ມີຄວາມທ້າທາຍບໍ່ໜ້ອຍ.  ສະນັ້ນກອງປະຊຸມທຸລະກິດລາວ ຄັ້ງທີ 14 ນີ້, ໄດ້ເປີດໂອກາດໃຫ້ຜູ້ຕາງໜ້າຂອງສະພາການຄ້າ ແລະ ອຸດສາຫະກຳແຫ່ງຊາດລາວ, ຜູ້ຕາງໜ້າ ຂອງສະພາການຄ້າເອີຣົບ, ນັກເສດຖະສາດ ອາວຸໂສຈາກທະນາຄານໂລກ ແລະ ຜູ້ເຂົ້າຮ່ວມປະຊຸມ ໄດ້ມີຄໍາຄິດເຫັນ, ແລກປ່ຽນ ແລະ ສະເໜີຕໍ່ລັດຖະບານ ແລະ ຂະແໜງການກ່ຽວຂ້ອງ ເພື່ອນຳໄປຄົ້ນ ຄວ້າ ແລະ ພິຈາລະນາຕື່ມອີກ. ພ້ອມ​ນີ້, ທ່ານ ສອນໄຊ ສີພັນດອນ  ກໍໄດ້ເນັ້ນໜັກເຖິງຄວາມສຳຄັນ ຂອງການພັດທະນາພາກທຸລະກິດ ຕໍ່ການບັນລຸເປົ້າໝາຍການສົ່ງເສີມ ຄວາມຫລາກຫລາຍທາງເສດຖະ ກິດ, ການຟື້ນຕົວຂອງເສດຖະກິດທີ່ໄດ້ຮັບຜົນກະທົບຈາກ ໂຄວິດ-19 ແລະ ການສ້າງເງື່ອນໄຂຫລຸດພົ້ນອອກ ຈາກສະຖານະພາບ ປະເທດດ້ອຍພັດທະນາກ່ອນ ປີ 2026.

ຂ່າວ: ກິດຕາ

ພາບ: ເກເສະໜາ

KPL