ຂປລ.  ໂດຍໃຫ້ກຽດເຂ້ົາຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ທ່ານ ເພັດ ພົມພີພັກ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ທ່ານ ບຸນຫລາຍ ບຸດທິ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງເຊກອງ ພ້ອມດ້ວຍບັນດາອົງການຈັດຕັ້ງທີ່ກ່ຽວຂ້ອງຂັ້ນສູນກາງ, ຂັ້ນແຂວງ, ຂັ້ນເມືອງ ແລະ ປະຊາຊົນເຂົ້າຮ່ວມ. 

     ທ່ານ ບຸນຫລາຍ ບຸດທິ ໄດ້ລາຍງານກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ລວມເຖິງການຄົ້ນຄວ້າສ້າງຕັ້ງຕາແສງຢູ່ພາຍໃນແຂວງເຊກອງ ແລະ ການກະກຽມປະກາດສ້າງຕັ້ງຕາແສງ ຊຶ່ງອົງການປົກຄອງແຂວງ ເຊກອງ ມີ 16 ຕາແສງ (ເມືອງ ລະ 4 ຕາແສງ), ປັດຈຸບັນໄດ້ປະກາດການສ້າງຕັ້ງແລ້ວ 15 ຕາ ແສງ. ສໍາລັບຕາແສງຕາເວັນອອກ ລອຍເມກ ແມ່ນໄດ້ປ່ຽນຊ່ືຈາກຕາແສງຊຽງຫລວງ ເພື່ອໃຫ້ມີຄວາມໝາຍສອດຄ່ອງທາງດ້ານຈຸດພິເສດທີ່ຕັ້ງພູມສັນຖານ ແລະ ຄວາມໝາຍທາງການເມືອງ ຈ່ຶງປ່ຽນມາເປັນຕາແສງຕາເວັນອອກລອຍເມກ ຊຶ່ງແມ່ນ 1 ໃນ 4 ຕາແສງ ຂອງເມືອງດາກຈຶງ ທ່ີມີສຳນັກງານອົງການປົກຄອງຕັ້ງຢູ່ບ້ານຊຽງຫລວງ   (ຫ້ອງການຈຸດສຸມເກົ່າ), ແຄມເສັ້ນທາງຫລວງເລກທີ 16B ຫ່າງ ຈາກເທສະບານເມືອງດາກຈຶງ ລົງຫາແຂວງເຊກອງ 38 ກິໂລແມັດ, ມີເນື້ອທີ່ທັງໝົດ 43.766,36 ເຮັກຕາ, ກວມເອົາ 13 ບ້ານ, ມີ ພົນລະເມືອງທັງໝົດ 5.905 ຄົນ, ຍິງ 3.123 ຄົນ, ມີ 1.002 ຄົວ ເຮືອນ, ມີ 1.368 ຄອບຄົວ, ມີ 969 ຫລັງຄາ, ສະເລ່ຍຄວາມໜາແໜ້ນ ຂອງພົນລະເມືອງ 14 ຄົນ/ກິໂລ ຕາແມັດ, ປະຊາຊົນຫລາຍກວ່າ 88% ແມ່ນເຮັດການຜະລິດກະສິກໍາເປັນອາຊີບຕົ້ນຕໍ; 11% ແມ່ນເຮັດອາຊີບຄ້າຂາຍ ແລະ ອີກ 1% ມີອາຊີບເປັນພະນັກງານ.

     ຕໍ່ກັບການຂະໜານນາມຊື່ເອີ້ນ ຂອງອົງການປົກຄອງຕາແສງຕາເວັນອອກລອຍເມກ ທີ່ປ່ຽນຈາກອົງການປົກຄອງຕາແສງຊຽງຫລວງນັ້ນ, ແມ່ນທ່ານ ທອງລຸນ  ສີສຸລິດ ໄດ້ຂະໜານນາມ ແລະ ຕັ້ງຊ່ືອົງການປົກຄອງຕາແສງຕາເວັນອອກລອຍເມກ ໃຫ້ມີຄວາມໝາຍ ຄວາມສຳຄັນທີ່ເລິກເຊິ່ງທັງໃນ ແງ່ຂອງພູມສາດ, ການເມືອງ, ການພັດທະນາເສດຖະກິດ-ສັງຄົມ ແລະ ເປັນສັນຍະລັກແຫ່ງຄວາມ ຫວັງ ພາຍໃຕ້ວິໄສທັດຂອງການນຳພັກ-ລັດ.

     ຈາກນ້ັນ, ໃນພິທີກໍໄດ້ຜ່ານຂ້ໍຕົກລົງຂອງຄະນະກຳມະການປົກ ຄອງແຂວງວ່າດ້ວຍອະນຸມັດສ້າງຕັ້ງຕາແສງຕາເວັນອອກລອຍເມກ, ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດສ້າງຕັ້ງອົງຄະນະພັກຮາກຖານຕາແສງຕາເວັນອອກລອຍເມກ ຂຶ້ນກັບອົງຄະນະພັກເມືອງດາກຈຶງ, ຂໍ້ຕົກລົງຂອງຄະນະກຳມະການປົກຄອງເມືອງວ່າດ້ວຍແຕ່ງຕັ້ງ ປະທານ-ຮອງປະທານຄະນະກຳມະການຕາແສງ ໂດຍແຕ່ງຕ້ັງທ່ານ ຄໍາສົງ ສອນທະວີສັກ ເປັນປະທານ, ທ່ານ ພັຕ ວົງໄຊ ແກ້ວເກສາ, ທ່ານ ພອນສະໄໝ ເຂັມມະລາດ ເປັນ ຮອງປະທານຄະນະກຳມະການປົກຄອງຕາແສງ. ພ້ອມນັ້ນ, ກໍໄດ້ສ້າງຕັ້ງອົງຄະນະພັກຮາກຖານ, ບ່ົງຕົວແຕ່ງຕ້ັງຄະນະບໍລິຫານງານອົງຄະນະພັກຮາກຖານ ແລະ ຫົວ ໜ້າໜ່ວຍງານຂຶ້ນກັບຄະນະກຳມະການປົກຄອງຕາແສງຕາເວັນອອກ ລອຍເມກ. 

      ໂອກາດນ້ີ, ທ່ານ ທອງລຸນ ສີສຸລິດ ກໍໄດ້ໃຫ້ກຽດໂອ້ລົມຫລາຍບັນຫາ ເພື່ອເປັນທິດທາງໃນການສ້າງເງ່ືອນໄຂຕ່າງໆໃຫ້ແກ່ການພັດທະນາຕາແສງກາຍເປັນເຂດປົກຄອງທ່ີສາມາດຕອບສະໜອງໄດ້ທາງດ້ານການຄ້າ, ການບໍລິການ ແລະ ກາຍເປັນຕົວເມືອງໃໝ່ໃນອະນາຄົດ. ຈາກນັ້ນ, ກໍໃຫ້ກຽດຂຶ້ນຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສີລິມຸງຄຸນ. ພ້ອມນັ້ນ, ຍັງໄດ້ຮ່ວມກິດຈະກຳປູກຕົ້ນໄມ້ຢູ່ທີ່ຕາແສງຕາເວັນອອກລອຍເມກຕື່ມອີກ.

   ຂ່າວ-ພາບ: ພຸດທະສອນ

KPL