ຂປລ. ພິທີສະເຫລີມສະຫລອງວັນ ຝຣັງໂກໂຟນີສາກົນ ຄົບຮອບ 53 ປີ ຈັດຂຶ້ນໃນວັນທີ 23 ມີນາ 2023, ທີ່ແຂວງຈຳປາສັກ, ພາຍໃຕ້ການເປັນປະທານຂອງ ທ່ານ ໂພໄຊ ໄຂຄຳພິທູນ ຮອງລັດ ຖະມົນຕີກະຊວງການຕ່າງປະເທດ, ມີ ທ່ານ ໂສມ ບຸດຕະກູນ ຮອງເຈົ້າແຂວງ ແຂວງຈໍາປາສັກ, ທ່ານ ນາງ ຊິບ-ແລັງ ຊຸຍ ອອກ, ເອກອັກຄະລັດຖະທູດຝຣັ່ງ ປະຈຳ ສປປ ລາວ, ທ່ານກົງສຸນໃຫຍ່ ແຫ່ງ ສສ ຫວຽດນາມ ທີ່ແຂວງຈຳປາສັກ, ຜູ້ຕາງໜ້າອົງການຝຣັງໂກໂຟນີສາກົນ ປະຈຳຂົງເຂດອາຊີ-ປາຊິຟິກ, ຫົວໜ້າຫ້ອງການອົງການມະຫາວິທະຍາໄລ ຝຣັງໂກໂຟນີ (AUF) ປະຈໍາ ສປປ ລາວ ​ແລະ ພາກສ່ວນ​ກ່ຽວຂ້ອງ ເຂົ້າຮ່ວມ. ໃນປີ 2023 ນີ້, ອົງການຝຣັງໂກໂຟນີສາກົນ ໄດ້ກຳນົດຫົວຂໍ້ໃນການສະເຫລີມສະຫລອງວັນດັ່ງກ່າວ ຄື: “321 ລ້ານ ຄົນທີ່ນຳໃຊ້ພາສາຝຣັ່ງ ຫລາກຫລາຍດ້ານເນື້ອໃນ ທາງດ້ານວັດທະນະທຳ (321 millions de francophons des milliards de contenus culturels)
   ໂອກາດນີ້, ທ່ານ ໂສມ ບຸດຕະກູນ ໄດ້ສະແດງຄວາມດີໃຈທີ່ແຂວງຈຳປາສັກ ໄດ້ຮັບກຽດເປັນສະຖານທີ່ສຳລັບພິທີທາງການ ເພື່ອສະເຫລີມສະຫລອງວັນ ຝຣັງໂກໂຟນີສາກົນໃນປີນີ້. ພ້ອມທັງໄດ້ລາຍງານສະພາບຂອງແຂວງ ໂດຍສະເພາະຄວາມຄືບໜ້າ ແລະ ຜົນສຳເລັດໃນການພັດທະນາເສດຖະ ກິດ-ສັງຄົມ ລວມທັງສະພາບການຮຽນ-ການສອນພາສາຝຣັ່ງຢູ່ ພາຍໃນແຂວງຈຳປາສັກ ທີ່ມີມູນເຊື້ອມາແຕ່ດົນນານ.
   ຈາກນັ້ນ, ທ່ານ ໂພໄຊ ໄຂຄຳພິທູນ ໄດ້ຍົກໃຫ້ເຫັນເຖິງຄວາມໝາຍສຳຄັນຂອງວັນດັ່ງກ່າວ ຊຶ່ງແມ່ນມື້ລະນຶກເຖິງການສ້າງຕັ້ງອົງການຝຣັງໂກໂຟນີສາກົນ (20 ມີນາ 1970) ເຊິ່ງຫລັກການພື້ນຖານຂອງອົງການດັ່ງກ່າວ ແມ່ນການປົກປັກຮັກສາຄວາມຫລາກຫລາຍທາງດ້ານວັດທະນະທຳ ແລະ ພາສາ ທີ່ຖືເປັນພື້ນຖານຂອງວິວັດທະນາການ ແລະ ການຄົງຕົວຂອງມວນມະນຸດ. ພ້ອມນີ້ ທ່ານຍັງໄດ້ຍົກໃຫ້ເຫັນຄວາມພະຍາຍາມ ຂອງລັດຖະບານແຫ່ງ ສປປ ລາວ ໃນການພັດທະນາ ແລະ ການຈັດຕັ້ງປະຕິ ບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບການປົກປັກຮັກສາມູນມໍລະດົກ ແລະ ຄວາມຫລາກຫລາຍດ້ານວັດທະນະທຳ, ການສົ່ງເສີມການນຳໃຊ້ພາສາຝຣັ່ງ ຊຶ່ງເປັນໜຶ່ງໃນພາສາທາງການຂອງອົງການສະຫະປະຊາຊາດ ທີ່ມີການນຳໃຊ້ຢ່າງກວ້າງຂວາງໃນທົ່ວໂລກ ໂດຍສະເພາະການສົ່ງເສີມການສຶກສາຕາມຫລັກສູດຫ້ອງຮຽນສອງພາສາ ລາວ-ຝຣັ່ງ ທີ່ມີຢູ່ໃນ 4 ແຂວງສຳຄັນຂອງ ສປປ ລາວ ຄື: ນະຄອນຫລວງວຽງຈັນ, ແຂວງຫລວງພະບາງ, ແຂວງສະຫວັນນະເຂດ ແລະ ແຂວງຈຳປາສັກ ໃຫ້ມີປະສິດທິພາບຂຶ້ນ ເພື່ອເຮັດໃຫ້ຈຳນວນຜູ້ທີ່ຮູ້ ແລະ ສາມາດສື່ສານພາສາຝຣັ່ງ ຂອງຄົນລາວນັບມື້ນັບເພີ່ມຂຶ້ນ.
   ໃນໂອກາດດັ່ງກ່າວ, ທ່ານ ເອກອັກຄະລັດຖະທູດຝຣັ່ງ ປະຈໍາ ສປປ ລາວ ແລະ ທ່ານຜູ້ຕາງໜ້າຈາກອົງການຝຣັງໂກໂຟນີສາກົນ ປະຈຳຂົງເຂດອາຊີ-ປາຊິຟິກ ກໍ​ໄດ້​ມີຄຳເຫັນຕໍ່ໂດຍມີເນື້ອໃນປິ່ນອ້ອມຫົວຂໍ້ຂອງການສະເຫລີມສະຫລອງວັນ ຝຣັງໂກໂຟນີ ໃນປີນີ້ ແລະ ບົດບາດຂອງປະເທດຝຣັ່ງ ອົງການດັ່ງກ່າວ ໃນການຮ່ວມມື ແລະ ສະໜັບສະໜູນ ສປປ ລາວ ໃນໄລຍະ 1 ປີຜ່ານມາໂດຍສະເພາະໃນດ້ານການສຶກສາ ແລະ ການສົ່ງເສີມການຮຽນ-ການສອນພາສາຝຣັ່ງຢູ່ ສປປ ລາວ.
   ໃນພິທີ, ບັນດາຜູ້ເຂົ້າຮ່ວມ ຍັງໄດ້ຊົມການສະແດງສິລະປະ-ວັນນະຄະດີ ຂອງນ້ອງນັກຮຽນ-ນັກສຶກສາພາສາຝຣັ່ງ, ໄດ້ຢ້ຽມຊົມການວາງສະແດງຮູບພາບ ແລະ ຂໍ້ມູນຂ່າວສານ ກ່ຽວກັບການ ເຄື່ອນໄຫວກິດຈະກຳຕ່າງໆ ຂອງຄູອາຈານ ແລະ ນັກຮຽນ-ນັກສຶກສາພາສາຝຣັ່ງພາຍໃນແຂວງຈຳປາສັກ ໃນຂອບວຽກງານຝຣັງໂກໂຟນີ.
   ການຈັດຕັ້ງສະເຫລີມສະຫລອງວັນ ຝຣັງໂກໂຟນີສາກົນ ຊຶ່ງກົງກັບ ວັນທີ 20 ມີນາ ຂອງ ທຸກໆປີ ເພື່ອເປັນການລະລຶກເຖິງ ວັນຄົບຮອບການສ້າງຕັ້ງອົງການ ດັ່ງກ່າວ, ໃນທຸກໆປີ ບັນດາປະ ເທດສະມາຊິກຂອງອົງການດັ່ງກ່າວທັງໝົດ 88 ປະເທດ ໃນທົ່ວໂລກ ໄດ້ພ້ອມກັນຈັດ ສະເຫລີມສະ ຫລອງວັນດັ່ງກ່າວ ເພື່ອຊຸກຍູ້ສົ່ງເສີມການຮຽນ-ການສອນ ແລະ ການນຳໃຊ້ພາສາຝຣັ່ງ ຢູ່ພາຍໃນປະເທດຂອງຕົນ ຊຶ່ງ ສປປ ລາວ ນັບແຕ່ເຂົ້າເປັນສະມາຊິກສົມ ບູນຂອງອົງການຝຣັງໂກໂຟນີສາກົນ ໃນປີ 1991 ເປັນຕົ້ນມາ ກໍໄດ້ມີການຈັດຕັ້ງພິທີທາງການ ເພື່ອສະເຫລີມສະຫລອງວັນດັ່ງກ່າວ ໃນ ທຸກໆປີ. ພ້ອມກັນນັ້ນ, ໃນທົ່ວປະເທດ ໂດຍສະເພາະຢູ່ບັນດາແຂວງ ທີ່ມີຫລັກສູດການຮຽນ-ການສອນພາສາຝຣັ່ງ ຄື: ນະຄອນຫລວງວຽງຈັນ, ແຂວງຫລວງພະບາງ, ແຂວງສະຫວັນນະເຂດ ແລະ ແຂວງຈຳປາສັກ ກໍຍັງມີການຈັດກິດຈະກຳຕ່າງໆ ສະເພາະພາຍໃນແຂວງຂອງຕົນ ເພື່ອສະຫລອງວັນດັ່ງກ່າວໃນທຸກໆປີອີກດ້ວຍ.  

ຂ່າວ-ພາບ: ກຕທ

KPL