ຂປລ. ວັນ​ທີ 15 ມີ​ນາ 2023, ທີ່ນະ​ຄອນຫລວງວຽງ​ຈັນ, ທ່ານ ເພັດ ພົມ​ພິ​ພັກ ລັດ​ຖະ​ມົນ​ຕີກະ​ຊວງ​ກະ​ສິ​ກຳ ແລະ ປ່າ​ໄມ້, ປະ​ທານ​ສະ​ມາ​ຄົມ​ມິດ​ຕະ​ພາບ ລາວ-ຈີນ ຂັ້ນ​ສູນ​ກາງ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ​ທ່ານ ນາງ​ ຫວາງຢູ (Wang Yu) ຮອງ​ປະ​ທານ​ສະ​ມາ​ຄົມ​ ມິດ​ຕະ​ພາບ​ກັບ​ຕ່າງ​ປະ​ເທດ ​ແຂວງ​ຢຸນ​ນານ ສ​ປຈີນ ພ້ອມຄະນະ ​ໃນ​ໂອກ​າດທີ່ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໂອກາດນີ້, ທ່ານ​ ເພັດ ພົມ​ພິ​ພັກ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ຮອງ​ປະ​ທານ​ສະ​ມາ​ຄົມ​ມິດ​ຕະ​ພາບ​ກັບ​ຕ່າງ​ປະ​ເທດ ​ແຂວງ​ຢຸນ​ນານ ສ​ປຈີນ ພ້ອມຄະນະ ໃນຄັ້ງນີ້ ຖືເປັນການປະກອບສ່ວນສຳຄັນ ເຂົ້າໃນການຮັດແໜ້ນ, ເພີ່ມພູນຄູນສ້າງສາຍພົວພັນ ມິດຕະພາບທີ່ເປັນມູນ ເຊື້ອອັນດີງາມ ແລະ ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ​ ຕາມ​ທິດ 4 ດີ ແລະ ​ການ​ສ້າງ​ເປັນຄູ່ຮ່ວມຊາຕາກໍາ ລະຫວ່າງ ລາວ-ຈີນ ສືບຕໍ່ໄດ້ຮັບການເສີມຂະຫຍາຍ. ບັນດາຂະແໜງການ ມີການພົວພັນຮ່ວມມື ຢ່າງມີປະສິດທິພາບ ແລະ ປະສິດທິຜົນ ນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງ ປະເທດລາວ ແລະ ຈີນ.  ພ້ອມນີ້, ທ່ານຍັງໄດ້ສະແດງ ຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດ ຂອງປະຊາຊົນຈີນ ທີ່ຍາດມາໄດ້ ໃນພາລະກິດ​ປົກ​ປັກ​ຮັກ​ສາ ແລະ ສ້າງສາປະເທດຊາດ ໃນໄລຍະຜ່ານມາ, ພິເສດແມ່ນ ຜົນສໍາເລັດ ຂອງກອງປະຊຸມຄົບຄະນະ ຄັ້ງທີ I ຂອງສະພາຜູ້ແທນ ປະຊາຊົນທົ່ວປະເທດຈີນ ສະໄໝທີ XIV ທີ່ຜ່ານມານີ້ ໄດ້ລົງຄະແນນສຽງ ເລືອກຕັ້ງເອົາ ສະຫາຍ ສີ ຈີ້ນ ຜິງ ເປັນປະທານປະເທດສະໄໝທີ 3, ທ່ານ ຈ້າວ ເລີ້ຈີ້ ປະທານສະພາ ຜູ້ແທນປະຊາຊົນແຫ່ງຊາດຈີນ, ທ່ານ ຫຼີ ສຽງ ນາຍົກລັດຖະມົນຕີ ແລະ ການນໍາອື່ນໆ.

ທ່ານ ນາງ​ ຫວາງຢູ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງກ່ຽວກັບການຈັດຕັ້ງ ແລະ ການເຄື່ອນໄຫວ ຂອງສະມາຄົມມິດ​ຕະ​ພາບ ​ກັບ​ຕ່າງ​ປະ​ເທດ ​ແຂວງ​ຢຸນ​ນານ ແລະ ຢືນຢັນວ່າ ສະ​ມາ​ຄົມ​ມິດ​ຕະ​ພາບ​ ກັບ​ຕ່າງ​ປະ​ເທດ ​ແຂວງ​ຢຸນ​ນານ ສ​ປ ຈີນ ຈະສືບຕໍ່ຮັດແໜ້ນ ການຮ່ວມມືກັບ ສະມາຄົມມິດຕະພາບ ລາວ-ຈີນ ເພື່ອເຮັດບົດບາດເປັນຂົວຕໍ່ທີ່ດີ ຊຸກຍູ້ການພົວພັນຮ່ວມມື ຂອງບັນດາຂະແໜງການ ທີ່ສອງປະເທດ​ເຄີຍ ປະ​ຕິ​ບັດ​ຮ່ວມ​ກັນ ເປັນຕົ້ນ ແມ່ນ​ຊຸກຍູ້ການໄປມາຫາສູ່ກັນ ລະຫວ່າງປະຊາຊົນ ສອງປະເທດລາວ ແລະ ຈີນ ໂດຍສະເພາະແມ່ນປະຊາຊົນ ຢູ່ແລບຕາມຊາຍແດນ ຮ່ວມກັນຂອງສອງປະເທດ ໃຫ້ມີຈັດກິດຈະກໍາຮ່ວມກັນ ເພື່ອສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ຮ່ວມມືກັນ ເພື່ອພັດທະນາຊາຍແດນ ໃຫ້ກາຍເປັນຊາຍແດນ ແຫ່ງສັນຕິພາບ, ມິດຕະພາບ ແລະ ການ​ຮ່ວມ​ມື​ເພື່ອການພັດທະນາ.

ພ້ອມ​ນີ້, ສອງ​ສະ​ມາ​ຄົມ​ມິດ​ຕະ​ພາບ ​ຍັງ​ໄດ້​ຈັດ​ກອງ​ປະ​ຊຸມ ​ປຶກ​ສາ​ຫາ​ລື​ສອງ​ຝ່າຍ ເພື່ອ​ຕີ​ລາ​ຄາ​ການ​ຮ່ວມ​ມື ແລະ ສະ​ໜັບ​ສະ​ໜູນ​ ຊ່ວຍ​ເຫລືອ​ກັນ​ ໃນ​ໄລ​ຍະ​ຜ່ານ​ມາ. ພ້ອມ​ທັງ​ກຳ​ນົດ​ທິດ​ທາງ​ ການ​ຮ່ວມ​ມື​ໃນ​ຕໍ່​ໜ້າ​ໃຫ້​ມີ​ໝາກ​ຜົນ​ສູງ​ຂຶ້ນ​ ​ເພື່ອ​ນຳ​ຜົນ​ປະ​ໂຫຍດ​ຕົວ​ຈິງ​ ມາ​ສູ່​ປະ​ຊາ​ຊົນ​ສອງ​ຊາດ ລາວ-ຈີນ.

ໃນໂອກາດມາຢ້ຽມຢາມ ສປປ ລາວ ຄັ້ງນີ້, ຄະນະຜູ້ແທນສະ​ມາ​ຄົມ​ມິດ​ຕະ​ພາບ​ ກັບ​ຕ່າງ​ປະ​ເທດ ​ແຂວງ​ຢຸນ​ນານ ສ​ປ ຈີນ ຍັງໄດ້ເຂົ້າຢ້ຽມຂ່ຳນັບ ທ່ານ​ຮອງ​ປະ​ທານ ຄະ​ນະ​ກຳ​ມາ​ທິ​ການ​ຮ່ວມ​ມື​ລາວ-ຈີນ, ພົບປະກັບສະ​ຫະ​ພັນ​ແມ່​ຍິງ ກະ​ຊວງ​ການ​ຕ່າງ​ປະ​ເທດ ແລະ ໄດ້​ທ່ຽວ​ຊົມສະຖານທີ່ ທ່ອງທ່ຽວທາງປະຫວັດສາດ, ວັດທະນະທຳ ແລະ ທໍາມະຊາດ ໃນນະຄອນຫລວງວຽງຈັນ ຈໍານວນໜຶ່ງ.

KPL