ຂປລ
ໃນຂອງເຂດການຢ້ຽມຢາມ ສປ ຈີນ ຢ່າງເປັນທາງການ ແລະ ເປັນປະທານຮ່ວມວາລະ ປະຊຸມຄັ້ງທີ 2 ຄະນະກຳມະການຮ່ວມມື ລະຫວ່າງ ສະພາແຫ່ງຊາດ ຫວຽດນາມ-ຈີນ, ວັນທີ 12 ຕຸລາ, ຢູ່ນະຄອນຫລວງ ປັກກິ່ງ, ທ່ານ ເຈິ່ນແມັງເໝີ້ນ ປະທານສະພາແຫ່ງຊາດ ຫວຽດນາມ ໄດ້ພົບປະກັບທ່ານ ຫລີສຽງ ກຳມະການປະຈຳກົມການເມືອງ, ນາຍົກລັດຖະມົນຕີ ສປ.ຈີນ.
ຂປລ.ວິທະຍຸກະຈ່າຍສຽງ ຫວຽດນາມ, ໃນຂອງເຂດການຢ້ຽມຢາມ ສປ ຈີນ ຢ່າງເປັນທາງການ ແລະ ເປັນປະທານຮ່ວມວາລະ ປະຊຸມຄັ້ງທີ 2 ຄະນະກຳມະການຮ່ວມມື ລະຫວ່າງ ສະພາແຫ່ງຊາດ ຫວຽດນາມ-ຈີນ, ວັນທີ 12 ຕຸລາ, ຢູ່ນະຄອນຫລວງ ປັກກິ່ງ, ທ່ານ ເຈິ່ນແມັງເໝີ້ນ ປະທານສະພາແຫ່ງຊາດ ຫວຽດນາມ ໄດ້ພົບປະກັບທ່ານ ຫລີສຽງ ກຳມະການປະຈຳກົມການເມືອງ, ນາຍົກລັດຖະມົນຕີ ສປ.ຈີນ. ເມື່ອແລກປ່ຽນກ່ຽວກັບທິດທາງ ການຮ່ວມມືໃນໄລຍະຈະມາເຖິງ, ທ່ານ ປະທານສະພາແຫ່ງຊາດ ເຈິ່ນແມັງເໝີ້ນ ສະເໜີ ໃຫ້ສອງຝ່າຍ ຍົກລະດັບການເຊື່ອມຕໍ່ ໂຄງລ່າງຍຸດທະສາດ ໂດຍສະເພາະ ແມ່ນຮ່ວມມືທາງລົດໄຟ. ເລີ່ມລົງມືກໍ່ສ້າງ ແລະ ສຳເລັດບັນດາເສັ້ນທາງລົດໄຟ ເຊື່ອມຕໍ່ສອງປະເທດໂດຍໄວ ເພື່ອສ້າງເງື່ອນໄຂສະດວກ ໃຫ້ແກ່ການພົວພັນແລກປ່ຽນ ລະຫວ່າງ ປະຊາຊົນ ສອງປະເທດ. ສ້າງເງື່ອນໄຂ ໃຫ້ຜະລິດຕະພັນກະສິກຳ, ສິນຄ້າຂອງ ສສ ຫວຽດນາມ ສົ່ງໄປຍັງ ສປ ຈີນ, ຍູ້ແຮງການຮ່ວມມື ດ່ານຊາຍແດນ. ພ້ອມກັນນັ້ນ ຍູ້ແຮງການຮ່ວມມື ດ້ານວິທະຍາສາດເຕັກໂນໂລຊີ, ນະວັດຕະກຳ, ບຳລຸງສ້າງແຫລ່ງຊັບພະຍາກອນມີລະດັບສູງ. ຈາກນັ້ນ ທ່ານ ຫລີ ສຽງ ນາຍົກລັດຖະມົນຕີ ສປ ຈີນ ໄດ້ຕີລາຄາສູງ ບັນດາຂໍ້ສະເໜີຮ່ວມມື ຂອງ ທ່ານ ປະທານສະພາແຫ່ງຊາດ ເຈິ່ນແມັງເໝີ້ນ ໂດຍສະເໜີໃຫ້ສອງຝ່າຍ ຍູ້ໄວການກໍ່ສ້າງ ບັນດາເສັ້ນທາງລົດໄຟບັນລຸມາດຖານ, ເຊື່ອມຕໍ່ກັບຍຸດທະສາດການ ພັດທະນາເຂດຂອງ ສປ ຈີນ, ເພີ່ມທະວີ ການເຊື່ອມຕໍ່ທາງນ້ຳ, ທາງບົກ, ສ້າງດ່ານຊາຍແດນອັດສະລີຍະ, ເຂດຮ່ວມມືຜ່ານຊາຍແດນ ແລະ ການຮ່ວມມື ທາງດ້ານໄຟຟ້າ ລະຫວ່າງ ສອງປະເທດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
