ທ່ານ ລາວປາວຊົ່ງ ນະວົງໄຊ ກ່າວວ່າ: ຄຽງຄູ່ກັບຜົນງານ ແລະ ຜົນສຳເລັດທີ່ສະພາແຫ່ງຊາດ ຍາດມາໄດ້ໃນເກືອບ 1 ປີຜ່ານມານັ້ນ, ສູນກາງແນວລາວສ້າງຊາດ ສະເໜີໃຫ້ສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ສືບຕໍ່ເອົາໃຈໃສ່ຕິດຕາມກວດກາ ແລະ ຊຸກຍູ້ຊ່ວຍເຫຼືອໃຫ້ລັດຖະບານແກ້ໄຂບາງບັນຫາໃຫ້ເປັນໄປຕາມແຜນການທີ່ກຳນົດໄວ້ ເປັນຕົ້ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຖິງວ່າລັດຖະບານໄດ້ວາງຫຼາຍມາດຕະການ ເຮັດໃຫ້ຄ່າເງິນກີບແຂງຄ່າຂຶ້ນທຽບກັບເງິນຕາຕ່າງປະເທດ ແຕ່ໃນສະພາບຄວາມເປັນຈິງລາຄາສິນຄ້າ (ຄ່າຄອງຊີບ, ຄ່າໄຟຟ້າ, ນ້ຳປະປາ, ນ້ຳມັນເຊື້ອໄຟ, ແກ໊ສ) ຍັງສູງຄືເກົ່າ ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນລາວບັນດາເຜົ່າທີ່ມີລາຍໄດ້ຕ່ຳ ເຫັນວ່າຍັງບໍ່ໄດ້ຮັບການແກ້ໄຂໃຫ້ຢູ່ໃນສະພາບປົກກະຕິໄດ້. ພ້ອມກັນນັ້ນ, ການແກ້ໄຂບັນຫາຢາເສບຕິດ ແລະ ສະແກມເມີ (Scammer) ຍັງບໍ່ທັນກາຍເປັນຄວາມຮັບຜິດຊອບຂອງທົ່ວສັງຄົມ ແລະ ປະຊາຊົນ ເຖິງແມ່ນວ່າເຈົ້າໜ້າທີ່ຈະໄດ້ເອົາໃຈໃສ່ປາບປາມຢ່າງຈິງຈັງຜ່ານມາ ແຕ່ສະພາບຕົວຈິງພວກກຸ່ມຄົນບໍ່ດີຍັງມີການລັກລອບເຄື່ອນໄຫວເປັນວົງກວ້າງ, ແນບນຽນ ແລະ ບືນເລິກກວ່າເກົ່າ.

ພ້ອມນີ້, ທ່ານ ລາວປາວຊົ່ງ ນະວົງໄຊ ຍັງໄດ້ຕີລາຄາການຈັດຕັ້ງປະຕິບັດວຽກງານຂອງສະພາແຫ່ງຊາດ ໂດຍສະເພາະເວລາສ້າງ ແລະ ປັບປຸງກົດໝາຍຂອງສະພາແຫ່ງຊາດ ເຫັນວ່າຍັງຂາດການທາບທາມ ແລະ ແທດເຖິງກຸ່ມເປົ້າໝາຍ, ຂາດການມີສ່ວນຮ່ວມຂອງປະຊາຊົນລາວບັນດາເຜົ່າ ພ້ອມທັງການປະເມີນ ແລະ ການໂຄສະນາເຜີຍແຜ່ກົດໝາຍຍັງບໍ່ທັນກວ້າງຂວາງ, ບໍ່ແທດເຖິງທຸກໆເປົ້າໝາຍໃນທົ່ວສັງຄົມ ເຮັດໃຫ້ບັນດາກົດໝາຍທີ່ສະພາແຫ່ງຊາດຮັບຮອງແລ້ວໃນເວລາຈັດຕັ້ງປະຕິບັດ ບໍ່ສາມາດປະຕິບັດໄດ້ເທົ່າທີ່ຄວນ. ບັນດາມະຕິທີ່ສະພາແຫ່ງຊາດຮັບຮອງໄປແລ້ວເຫັນວ່າມີຈຳນວນຫຼາຍ ແຕ່ການປະຕິບັດຕົວຈິງຍັງບໍ່ທັນເຂັ້ມງວດ-ເດັດຂາດເທົ່າທີ່ຄວນ ເຊັ່ນ: ການຄຸ້ມຄອງໂຄງການຂຸດຄົ້ນບໍ່ແຮ່, ການປະຕິບັດສັນຍາສຳປະທານ ແລະ ບັນຫາອື່ນໆ ທີ່ຕິດພັນກັບມະຕິຂອງສະພາແຫ່ງຊາດ ຍັງບໍ່ໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳ ໃຫ້ສົມກັບສະພາແຫ່ງຊາດແມ່ນອົງການສູງສຸດແຫ່ງອຳນາດລັດ ແລະ ຄວນມີການປະຕິບັດຢ່າງເຂັ້ມງວດ.

ພ້ອມນັ້ນ, ການລົງພົບປະຜູ້ມີສິດເລືອກຕັ້ງຂອງສະມາຊິກສະພາແຫ່ງຊາດ ຍັງບໍ່ທັນທົ່ວເຖິງ ໂດຍສະເພາະເຂດຫ່າງໄກສອກຫຼີກ, ຊົນເຜົ່າ, ເຂດຊາຍແດນ, ໃນນັ້ນການລົງພົບປະແຕ່ລະຄັ້ງ ສະມາຊິກສະພາແຫ່ງຊາດ ຄວນປະສານສົມທົບກັບແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການປົກຄອງທ້ອງຖິ່ນ ເພື່ອຊ່ວຍຮຽກໂຮມປະຊາຊົນເຂົ້າຮ່ວມຮັບຟັງການເຜີຍແຜ່ຜົນສຳເລັດຂອງກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງແຕ່ລະເທື່ອ; ການເຂົ້າຮ່ວມກອງປະຊຸມສະພາແຫ່ງຊາດ ຂອງສະມາຊິກສະພາແຫ່ງຊາດ ແມ່ນມີຄວາມຕັ້ງໜ້າສູງ ແຕ່ການປະກອບຄຳເຫັນ ແລະ ຊັກຖາມບັນຫາຕ່າງໆ ຂອງສະມາຊິກສະພາແຫ່ງຊາດ ຈາກແຕ່ລະເຂດເລືອກຕັ້ງ ຍັງບໍ່ທັນຮັດກຸມ, ລົງເລິກບັນຫາທີ່ປະຊາຊົນສ່ອງແສງເຖິງລັດຖະບານ ແລະ ຍັງບໍ່ລົງເລິກເຖິງວິທີສະເໜີແນະການແກ້ໄຂບັນຫາໃຫ້ຖືກຈຸດ (ບາງທ່ານມີການປະກອບຄວາມເຫັນຫຼາຍຄັ້ງ, ແຕ່ບາງທ່ານບໍ່ມີການປະກອບຄວາມເຫັນເລີຍ); ການຕິດຕາມກວດກາຂອງສະພາແຫ່ງຊາດ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ (ສະບັບປັບປຸງ), ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຍັງບໍ່ທັນແຂງແຮງ ແລະ ເປັນຮູບປະທຳ, ການເກັບກຳຂໍ້ມູນ, ການວິເຄາະວິໄຈບັນຫາ ແລະ ການປະສານງານພາກສ່ວນທີ່ກ່ຽວຂ້ອງພິຈາລະນາແກ້ໄຂ ບໍ່ທັນໄດ້ດີ; ການນຳເອົາຄຳຄິດ, ຄຳເຫັນ, ຄຳສະເໜີຂອງປະຊາຊົນບັນດາເຜົ່າ ທີ່ສະເໜີຜ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ສາຍດ່ວນ ຍັງບໍ່ທັນໄດ້ຮັບການອະທິບາຍ, ຊີ້ແຈງ ແລະ ມີຄຳຕອບໃຫ້ແກ່ປະຊາຊົນຢ່າງເປັນລະບົບ ແລະ ຊັດເຈນ.

ຂ່າວ: ທະນູທອງ; ພາບ: ວຽງຈັນທາມ

KPL