ຂປລ. ປັດຈຸບັນ, ພື້ນທີ່ໃຫ້ບໍລິການໂທລະຄົມມະນາຄົມ ລະບົບ 2G ໄດ້ກວມເອົາ 96%, 3G ໄດ້ກວມເອົາ 83% ແລະ 4G ໄດ້ກວມເອົາ 75% ຂອງຈຳນວນບ້ານທັງໝົດໃນທົ່ວປະເທດ. ໃນຂະນະທີ່ ຈຳນວນຜູ້ນໍາໃຊ້ໂທລະສັບຕັ້ງໂຕະມີສາຍ ແລະ ບໍ່ມີສາຍ ມີຫລາຍກ່ວາ 1,9 ລ້ານກ່ວາເລກໝາຍ, ໂທລະສັບ ມືຖື 14 ລ້ານກວ່າເລກໝາຍ, ຜູ້ນໍາໃຊ້ອິນເຕີເນັດ (ລະບົບມີສາຍ ແລະ ບໍ່ມີສາຍ) ຈໍານວນ 4,4 ລ້ານກວ່າບັນຊີ, ອັດຕາການຊົມໃຊ້ອິນເຕີເນັດກວມເອົາ 63% ຂອງປະຊາກອນ ໃນທົ່ວປະເທດ.
  ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ໄດ້ມີຄໍາເຫັນ ເນື່ອງໃນໂອກາດ ສະເຫລີມສະຫລອງ ວັນໄປສະນີ ແຫ່ງຊາດ ແລະ ວັນໂທລະຄົມມະນາຄົມ ແຫ່ງຊາດ ຄົບຮອບ 58 ປີ (13 ມີນາ 1965 ຫາ 13 ມີນາ 2023) ເມື່ອບໍ່ດົນມານີ້ ວ່າ: ໃນປີ 2023 ນີ້, ກະຊວງເຕັກໂນໂລຊີ ແລະ ການສື່ສານ ໄດ້ຈັດການສະ ເຫລີມສະຫລອງ 2 ສຳຄັນດັ່ງກ່າວ ພາຍໃຕ້ຄໍາຂວັນ: “ປັບປຸງວຽກງານໄປສະນີໃຫ້ທັນສະໄໝ, ພັດທະນາວຽກງານໂທລະຄົມມະນາຄົມ ເພື່ອການຫັນເປັນດີຈິຕອນໃນທົ່ວປະເທດ” ຢ່າງເປັນຂະບວນຟົດຟື້ນໃນທົ່ວປະເທດ. ໃນຊຸມປີຜ່ານມາ, ວຽກງານໄປສະນີ ແລະ ວຽກງານໂທລະຄົມມະນາຄົມ ຂອງ ສປປ ລາວ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ, ປັດຈຸບັນ, ມີຜູ້ບໍລິການໂທລະຄົມ ມະນາຄົມ ຈໍານວນ 5 ບໍລິສັດ ແລະ ຜູ້ບໍລິການອິນເຕີເນັດ ປະເພດ I ຈໍານວນ 10 ບໍລິສັດ, ປະເພດ II ຈຳນວນ 3 ບໍລິສັດ, ປະເພດ III ຈໍານວນ 13 ບໍລິສັດ ເຊິ່ງສາມາດສ້າງລາຍຮັບເຂົ້າງົບປະມານແຫ່ງຊາດໄດ້ ຈຳນວນ 715 ຕື້ກວ່າກີບ, ສະເພາະໃນນີ້ ຍັງບໍ່ໄດ້ລວມເງິນປັນຜົນຈາກບັນດາບໍລິສັດໂທລະຄົມມະນາຄົມຕ່າງໆ. ການບໍລິການໄປສະນີໄດ້ເປັນປັດໄຈສໍາຄັນທີ່ຂາດບໍ່ໄດ້ ໃນການຈັດສົ່ງ ແລະ ແຈກຢາຍພັດສະດຸທາງໄປສະນີ ກໍຄືອາຫານ, ເຄື່ອງອຸປະໂພກບໍລິໂພກ, ຢາປິ່ນປົວພະຍາດ ແລະ ເຄື່ອງມືການແພດໃຫ້ແກ່ສັງຄົມ ໃນການຂັບເຄື່ອນຕະ ຫລາດເສດຖະກິດດີຈິຕອນ ທີ່ມີຫລາຍກິດຈະການທຸລະກິດ ຕ້ອງອາໄສການບໍລິການ ຂອງຂະແໜງໄປສະນີ ເປັນຕົ້ນ ການບໍລິການດ້ານໂລຈິສຕິກ ແລະ ການຄ້າເອເລັກໂຕຣນິກ ເພື່ອບໍລິການຮັບຝາກ, ຈັດສົ່ງ, ແຈກຢາຍສິນຄ້າ ຢູ່ພາຍໃນປະເທດ ແລະ ລະຫວ່າງປະເທດ. ໃນປີຜ່ານມາ ມີຈຳນວນປ່ອງບໍລິການໄປສະນີ ໃນຂອບເຂດທົ່ວປະເທດ ຈຳນວນ 990 ແຫ່ງ, ໃນນັ້ນ ມີບໍລິສັດທີ່ດໍາເນີນທຸລະກິດບໍລິການໄປສະນີ ຈໍານວນ 43 ບໍລິສັດ, ໃຫ້ບໍລິການພາຍໃນ ແລະ ລະຫວ່າງປະເທດ 9 ບໍລິສັດ ແລະ ໃຫ້ບໍລິການພາຍໃນແຂວງ 34 ບໍລິສັດ ເມື່ອທຽບໃສ່ປີ 2021 ແມ່ນເພີ່ມຂຶ້ນ 11 ແຫ່ງ. ການບໍລິການດ້ານໄປສະນີ ສາມາດເຊື່ອມໂຍງກັບພາກພື້ນ ແລະ ສາກົນ ເຊິ່ງສາມາດມອບພັນທະອາກອນເຂົ້າງົບປະ ມານແຫ່ງຊາດ ຈຳນວນ 12 ຕື້ກວ່າກີບ.
   ທ່ານ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ກ່າວຕື່ມວ່າ: ເພື່ອຈັດຕັ້ງປະຕິບັດ ແຜນພັດທະນາເສດຖະກິດ ດີຈິຕອນ ແຫ່ງຊາດ 5 ປີ (2021-2025) ຂະແໜງການໄປສະນີ ແລະ ໂທລະຄົມມະນາຄົມ ໄດ້ສຸມໃສ່ບັນດາໜ້າວຽກ ຄື: ຂະແໜງການໄປສະນີ: ໄດ້ກຳນົດ 6 ເປົ້າໝາຍ, 18 ແຜນວຽກຈຸດສຸມ, 25 ແຜນງານ ແລະ 16 ໂຄງການທີ່ຕິດພັນກັບການຫັນເປັນດີຈິຕອນ. ພ້ອມນັ້ນ, ຈະຂະຫຍາຍ ເຄືອຂ່າຍໂທລະຄົມມະນາຄົມ ເພື່ອເປັນໂຄງລ່າງພື້ນຖານໃນການຫັນເປັນ ດີຈິຕອນ ຂອງ ສປປ ລາວ ໂດຍຮັບປະກັນໃຫ້ສັນຍານໂທລະສັບ 3G, 4G ແລະ 5G ກວມເອົາໄດ້ 100%, 90% ແລະ 50% ຂອງຈໍານວນບ້ານໃນທົ່ວປະເທດ ໃນປີ 2025.

KPL