ຂປລ. ເມື່ອບໍ່ດົນມານີ້, ສູນວັດທະນະທໍາຈີນ ປະຈຳລາວ ໄດ້ຈັດກິດຈະກໍາ “ສັບປະດາການທ່ອງ ທ່ຽວ ແລະ ວັດທະນະທໍາຈີນ” ປະຈໍາປີ 2022 ໃນຮູບແບບ live ສົດ ຜ່ານເຟສບຸກຂອງ ສູນວັດທະນະທໍາຈີນ ປະຈຳ ລາວ ເຊິ່ງມີການນໍາສະເໜີວິດີໂອ ຈີນເໜືອຈິນຕະນາການ ພາບລວມຂອງອະລິຍາທໍາຈີນ ທີ່ມີປະຫວັດຍາວນານເຖິງ 5.000 ປີ, ປະເທດຈີນ ເປັນປະເທດກວ້າງໃຫຍ່ໄພສານ ທີ່ເໜືອຈິນ ຕະນາການ; ປະເທດຈີນໃນສາຍຕາຂອງຄົນລາວ; ວັດທະນະທໍາແຂວງສານຊີ;  ວັດທະນະທໍາແມ່ນໍ້າຫວງເຫີ; ຈັບໃຈຊຽງໄຮ້ ແລະ ວິດີໂອ ລົດໄຟຄວາມໄວສູງ ລະຫວ່າງນະຄອນເສີງຕູ່ ຫາ ນະຄອນສົງຊິ້ງເຊິ່ງໄດ້ຮັບການຕອບຮັບເປັນຢ່າງດີ ຈາກປະຊາຊົນລາວ ເຂົ້າຮ່ວມຊົມຢ່າງຫລວງຫລາຍ.
  ການນຳສະເໜີວີດີໂອ ເນື້ອຫາທີ່ສຳຄັນກ່ຽວກັບ ຈີນເໜືອຈິນຕະນາການ ໄດ້ສະແດງໃຫ້ເຫັນເຖິງ ການກໍ່ສ້າງຕົວເມືອງຂອງປະເທດຈີນ ຕົວເມືອງໃຫຍ່ທີ່ມີລັກສະນະສາກົນ ແລະ ງົດງາມ, ລົດໄຟຄວາມໄວສູງທີ່ທັນສະໄໝ, ປະສົບການທ່ອງທ່ຽວແບບໃໝ່ ໄດ້ສ້າງຄວາມປະທັບໃຈໃຫ້ກັບຜູ້ຊົມຄົນລາວ. ນອກ ຈາກນັ້ນໃນການ live ສົດ ຍັງສາຍວິດີໂອ ທີ່ເປັນການແນະນໍາອາຫານທີ່ແຊບຂອງຈີນ ແລະ ອື່ນໆ ​ເຮັດໃຫ້ຜູ້ຊົມຄົນລາວ ຕ່າງກໍໄດ້ສະແດງຄວາມຄິດເຫັນ ວ່ານີ້ແມ່ນໂອກາດສໍາຄັນທີ່ໄດ້ຮຽນຮູ້ ກ່ຽວກັບວັດທະ ນະທໍາ ແລະ ການທ່ອງທ່ຽວຂອງຈີນ, ຫລັງຈາກການແຜ່ລະບາດຂອງພະຍາດໂຄວິດ-19 ໝົດໄປ ຕ້ອງໄດ້ໄປທ່ຽວປະເທດຈີນ ເພື່ອໄປສໍາຜັດວິຖີຊີວິດທີ່ທັນສະໄໝ ແລະ ແຫລ່ງທ່ອງທ່ຽວທີ່ມະຫັດສະຈັນຂອງຈີນ.
  ງານສັບປະດາການທ່ອງທ່ຽວ ແລະ ວັດທະນະທໍາຈີນ ປະຈໍາປີ 2022, ສູນວັດທະນະທຳຈີນ ໃນທົ່ວໂລກ ໄດ້ຜັດປ່ຽນກັນຈັດກິດຈະກິດສະຫລອງສັບປະດາດັ່ງກ່າວ ເພື່ອຄຳນັບຮັບຕ້ອນກອງປະຊຸມໃຫ່ຍ ຄັ້ງທີ 20 ຂອງພັກກອມມູນິດຈີນ ຂອງກະຊວງວັດທະນະທໍາ ແລະ ທ່ອງທ່ຽວຈີນ.

KPL