ຂປລ
ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນ ສົນທິສັນຍາ ມິດຕະພາບ ລາວ-ຫວຽດນາມ ຄົບຮອບ 45 ປີ ກົມສົ່ງເສີມການຄ້າ ກະຊວງອຸດ ສາຫະກຳ ແລະ ການຄ້າ ຂອງ ສປປ ລາວ ຮ່ວມກັບກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ສສ ຫວຽດ ນາມ ມີແຜນຈະຈັດງານ ວາງສະແດງສິນຄ້າ ລາວ-ຫວຽດນາມ ປະຈຳປີ 2022ຂຶ້ນໃນວັນທີ 25-29 ສິງຫາ 2022 ທີ່ສູນການຄ້າ ລາວ-ໄອເຕັກ (ຕຶກເກົ່າ).
ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ລາວ-ຫວຽດນາມ ຄົບຮອບ 45 ປີ ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ຂອງ ສປປ ລາວ ຮ່ວມກັບກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ສສ ຫວຽດນາມ ມີແຜນຈະຈັດງານ ວາງສະແດງສິນຄ້າ ລາວ-ຫວຽດນາມ ປະຈຳປີ 2022 ຂຶ້ນໃນວັນທີ 25-29 ສິງຫາ 2022 ທີ່ສູນການຄ້າ ລາວ-ໄອເຕັກ (ຕຶກເກົ່າ) ເພື່ອເປັນ ການສືບຕໍ່ ເພີ່ມທະວີ ເສີມຂະຫຍາຍ ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ຫວຽດນາມ-ລາວ ແລະ ເພີ່ມສາຍພົວພັນ ທາງດ້ານການຄ້າ ລາວ-ຫວຽດນາມ ໃຫ້ນັບມື້ນັບ ກວ້າງຂວາງຂຶ້ນ, ເປີດໂອກາດ ໃຫ້ນັກທຸລະກິດ, ຜູ້ປະກອບການຄ້າຂາຍ 2 ປະເທດ ໄດ້ມີໂອກາດ ແລກປ່ຽນບົດຮຽນ, ແນະນໍາຄຸນນະພາບ ສິນຄ້າຂອງກັນ ແລະ ກັນ ເພື່ອກ້າວໄປເຖິງ ການ ຊື້- ຂາຍສິນຄ້າ ໃຫ້ຫລາຍຂຶ້ນກວ່າເກົ່າ.
ໃນພິທີຖະແຫລງຂ່າວ ກຽມຈັດງານດັ່ງກ່າວ ໃນວັນທີ 15 ສິງຫາ 2022 ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມ ການຄ້າກະຊວງ ອຸດສາຫະກຳ ແລະ ການຄ້າ, ໄດ້ຍົກ ໃຫ້ ເຫັນວ່າ: ງານວາງສະແດງ ສິນຄ້າຄັ້ງນີ້ ແມ່ນກິດຈະກຳໜຶ່ງ ທີ່ ກະຕຸ້ນການຄ້າສອງຝ່າຍ ເພື່ອຜັນຂະຫຍາຍ ສົນທິສັນຍາການຄ້າ ຂອງສອງລັດຖະບານ ຊຶ່ງໄດ້ກຳນົດມູນຄ່າການ ຄ້າຂອງສອງ ປະເທດເພື່ອໃຫ້ບັນລຸ 1,74 ຕື້ໂດລາ ໃນປີ 2022, ເຫັນວ່າ ໃນຫລາຍປີຜ່ານມາ ຈົນເຖິງປັດຈຸບັນ ມີນັກລົງທຶນຈາກ ສສ ຫວຽດນາມ ມາລົງທຶນຢູ່ລາວ ຈັດຢູ່ໃນອັນດັບທີ 3 ຂອງການລົງທຶນ ຕ່າງປະເທດ ຢູ່ ສປປ ລາວ ມີ 1.272 ຫົວໜ່ວຍ ທຶນຈົດທະບຽນທັງໝົດ 23.540.193.251.096 ກີບ. ພາຍໃນງານ ວາງສະແດງດັ່ງກ່າວ ມີຫ້ອງວາງສະແດງ ສິນຄ້າທັງໝົດ 200 ຫ້ອງ ໃນນັ້ນມີທຸລະກິດຈາກ ສສ ຫວຽດນາມ 120 ຫ້ອງ ແລະ ພາກທຸລະກິດລາວ ເຂົ້າຮ່ວມ 80 ຫ້ອງຈາກທົ່ວປະເທດ. ສ່ວນສິນຄ້າ ທີ່ນຳມາວາງສະແດງຄັ້ງນີ້ ສ່ວນໃຫຍ່ຈະເປັນປະເພດ ເຄື່ອງອຸປະໂພກ-ບໍລິໂພກ, ສິນຄ້າກະສິກໍາປຸງແຕ່ງ, ຜະລິດ ຕະ ພັນການກະເສດ, ເຄື່ອງຫັດຖະກຳ, ເຄື່ອງຕັດຫຍິບ-ແຟຊັ້ນ, ອາຫານທະເລ, ເຄື່ອງເຟີນີເຈີ, ຢາ ແລະ ອຸປະກອນການແພດ.
ນອກຈາກນີ້, ໃນງານຈະມີການສະແດງສິລະປະວັນນະຄະດີ ທີ່ເປັນເອກະລັກໂດດເດັ່ນ ຂອງສອງຊາດ ລາວ- ຫວຽດນາມ ແລະ ມີການແຂ່ງຂັນຟ້ອນ, ຮ້ອງເພງ ລາວ-ຫວຽດນາມ ຂອງນັກຮຽນ ແລະ ໄວໜຸ່ມ ພິເສດມີສິລະປະຈາກ ສສ ຫວຽດນາມ ມາສະແດງທຸກມື້ ຕະຫລອດງານ. ພ້ອມນີ້, ໃນລະຫວ່າງ ວັນທີ 26-27 ສິງຫາ ກົມສົ່ງເສີມການຄ້າ ຮ່ວມກັບ ສະຖາບັນຄົ້ນຄວ້າ ອຸດສາຫະກຳ ແລະ ການຄ້າ ຈະໄດ້ຈັດກອງປະຊຸມ ວິທະຍາສາດ ທີ່ສູນການຄ້າລາວ-ໄອເຕັກ (ຕຶກເກົ່າ) ໃນ ຫົວຂໍ້: “ການສົ່ງເສີມການຄ້າ ແລະ ການລົງທຶນ ລະຫວ່າງ ລາວ-ຫວຽດນາມ ພາຍຫລັງໂຄວິດ-19 ແລະ ພາຍໃຕ້ການປ່ຽນແປງ ຂອງສະພາບເສດຖະກິດໂລກ ໃນປັດຈຸບັນ”ຕື່ມອີກ
KPL
