ຂປລ
ຂປລ. ໃນວັນທີ 21 ກັນຍາ 2020 ບໍລິສັດທາງລົດໄຟລາວ-ຈີນ ຈຳກັດ ໄດ້ຈັດພິທີເປີດການຮຽນບຳລຸງພາສາຈີນ ສຳລັບສຳມະນາກອນຊຸດທີ 2 ແລະ 3 ເພື່ອເປັນພື້ນຖານໃຫ້ແກ່ ການສືບຕໍ່ຝຶກອົບຮົມພາກທິດສະດີ ແລະ ພາກປະຕິບັດໃນວຽກງານ ເຕັກນິກລົດໄຟໃນຕໍ່ໜ້າ
ຂປລ. ໃນວັນທີ 21 ກັນຍາ 2020 ບໍລິສັດທາງລົດໄຟລາວ-ຈີນ ຈຳກັດ ໄດ້ຈັດພິທີເປີດການຮຽນບຳລຸງພາສາຈີນ ສຳລັບສຳມະນາກອນຊຸດທີ 2 ແລະ 3 ເພື່ອເປັນພື້ນຖານໃຫ້ແກ່ ການສືບຕໍ່ຝຶກອົບຮົມພາກທິດສະດີ ແລະ ພາກປະຕິບັດໃນວຽກງານ ເຕັກນິກລົດໄຟໃນຕໍ່ໜ້າ, ໂດຍມີສຳມະນາກອນ 360 ກວ່າຄົນ ທີ່ຜ່ານການຂັດເລືອກຈາກ 1.500 ຄົນເຂົ້າຮ່ວມ.
ສຳລັບຕຳແໜ່ງງານ ຂອງການຝຶກອົບຮົມໃນຊຸດທີ 2 ແລະ 3 ນີ້ ປະກອບ ມີ: ວຽກງານບຳລຸງຮັກສາ, ການຂົນສົ່ງສິນຄ້າ, ຜູ້ປະຈຳການສະຖານີ, ການຈັດສັນຂະບວນລົດ, ການຂົນສົ່ງຜູ້ໂດຍສານ ແລະ ຜູ້ບໍລິການເທິງລົດໄຟ.
ທ່ານ ຊ່ຽວ ຊຽນເຫວິນ ອໍານວຍການໃຫຍ່ ບໍລິສັດທາງລົດໄຟ ລາວ-ຈີນ ໄດ້ສະແດງຄວາມຊົມເຊີຍ ຕໍ່ຜູ້ທີ່ຜ່ານການຄັດເລືອກ ເຂົ້າມາຝຶກອົບຮົມພາສາຈີນ ໃນຄັ້ງນີ້, ພ້ອມທັງ ເນັ້ນຢໍ້າໃຫ້ ສຳມະນາກອນທຸກຄົນ ໃຫ້ຕັ້ງໃຈສຶກສາຄົ້ນຄວ້າ, ສຶກສາຮ່ຳຮຽນ, ເພາະວ່າບັນດາສຳມະນາກອນ ທີ່ເຂົ້າຮ່ວມຝຶກອົບຮົມ ແມ່ນຈະກ້າວໄປສູ່ການເປັນຄົນຂັບລົດ, ເປັນຊ່ຽວຊານລົດໄຟຊຸດທຳອິດ. ປັດຈຸບັນ ການບຳລຸງພາສາຈີນ ສຳລັບສຳມະນາກອນຊຸດທີ່ 1 ຈຳນວນ 173 ຄົນ ໄດ້ສິ້ນສຸດລົງໃນຕົ້ນ ເດືອນກັນຍາ ທີ່ຜ່ານມາ ແລະ ໄດ້ສືບຕໍ່ຝຶກອົບຮົມພາກທິດສະດີ ວິຊາສະເພາະລົດໄຟ ຢູ່ສະຖາບັນຂົງຈື ມະຫາວິທະຍາໄລແຫ່ງຊາດ ໃນລະຫວ່າງ ວັນທີ 14 ກັນຍາ 2020 ຫາ 14 ມັງກອນ 2021 ໂດຍໄດ້ເຊື້ອເຊີນເອົາອາຈານຊ່ຽວຊານມາຈາກ ສປ ຈີນ, ຫລັງຈາກສຳເລັດພາກທິດສະດີແລ້ວ ສຳມະນາກອນຈະໄດ້ສືບຕໍ່ ຝຶກອົບຮົມພາກປະຕິບັດຕົວຈິງ ຢູ່ທີ່ກົມລົດໄຟ ຄຸນມິງ ສປ ຈີນ ຈົນຮອດທ້າຍເດືອນກັນຍາ 2021. ພາຍຫລັງທີ່ກັບມາ ສປປ ລາວ ແລ້ວ ສຳມະນາກອນທັງໝົດ ຈະໄດ້ລົງຝຶກອົບຮົມພາກປະຕິບັດຢູ່ພາກສະ ໜາມຂອງໂຄງການລົດໄຟ ລາວ-ຈີນ ລະຫວ່າງ ວັນທີ 1 ຕຸລາ ຫາ 30 ພະຈິກ ປີ 2021.
KPL
