ຂປລ
ຂປລ. ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຄຳນັບຂອງ ທ່ານ ຣິ ຄລີ ຊອງ ລັດຖະມົນຕີຊ່ວຍວ່າການ ກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ
ຂປລ. ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຄຳນັບຂອງ ທ່ານ ຣິ ຄລີ ຊອງ ລັດຖະມົນຕີຊ່ວຍວ່າການ ກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ ແລະ ຄະນະ ໃນວັນທີ 2 ກຸມພາ 2015 ນີ້ຢູ່ກະຊວງການຕ່າງປະເທດ ໃນໂອກາດທີ່ທ່ານເດິນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 1-3 ກຸມພາ 2015 ນີ້.
ໃນໂອກາດນີ້ ທ່ານ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ຣິ ຄລີ ຊອງ ແລະ ຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ສປປ ເກົາຫລີ ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ລະຫວ່າງ ສອງກະຊວງການຕ່າງປະເທດ ລາວ ແລະ ສປປ ເກົາຫລີ ໃຫ້ນັບມື້ນັບຂະຫຍາຍຕົວຢ່າງບໍ່ຢຸດຢັ້ງ.
ທ່ານ ຣິ ຄລີ ຊອງ ກໍໄດ້ສະແດງຄວາມຂອບອົກຂອບໃຈຕໍ່ ທ່ານ ຮອງນາຍົກລັດຖະມົນຕີ ທີ່ໄດ້ສະຫລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ທ່ານ ຮອງນາຍົກລັດຖະມົນຕີໄດ້ຮັບຊາບຕື່ມອີກ.
ໃນຕອນເຊົ້າວັນດຽວກັນນີ້ ທ່ານ ຣິ ຄລີ ຊອງ ແລະ ຄະນະຜູ້ແທນກະຊວງການຕ່າງປະເທດ ສປປ ເກົາຫລີ ກໍໄດ້ພົບປະສອງຝ່າຍກັບ ຄະນະຜູ້ແທນກະຊວງ ການຕ່າງປະເທດ ແຫ່ງ ສປປ ລາວ ນຳໂດຍ ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການ ກະຊວງການຕ່າງປະເທດ ເຊິ່ງສອງຝ່າຍໄດ້ສະແດງຄວາມເພີງພໍໃຈຕໍ່ຜົນສຳເລັດຂອງການພົວພັນຮ່ວມມື ລະຫວ່າງ ສອງປະເທດໃນຊຸມປີຜ່ານມາເຫັນວ່າການພົວພັນ ຮ່ວມມືສອງຝ່າຍໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ ຄະນະຜູ້ແທນຂອງພັກ, ລັດ ແລະ ຂັ້ນຕ່າງໆຂອງສອງປະເທດ ກໍໄດ້ມີການແລກປ່ຽນຢ້ຽມຢາມກັນຢ່າງເປັນປົກກະຕິ ພ້ອມດຽວກັນນີ້ ທັງສອງຝ່າຍຍັງໄດ້ເຫັນດີ ຈະສືບຕໍ່ຮັກສາການແລກປ່ຽນ ການຢ້ຽມຢາມເຊິ່ງກັນ ແລະ ກັນ ລະຫວ່າງ ຄະນະຜູ້ແທນຂັ້ນສູງ ແລະ ຂັ້ນຕ່າງໆ ໂດຍສະເພາະ ແມ່ນການປຶກສາຫາລືແລກປ່ຽນຄຳຄິດຄຳເຫັນນຳກັນ ລະຫວ່າງ ສອງກະຊວງການຕ່າງປະເທດ ລາວ ແລະ ສປປ ເກົາຫລີ ເພື່ອຊອກຫາຊ່ອງທາງຂຸດຄົ້ນທ່າແຮງບົ່ມຊ້ອນ ແລະ ຄວາມອາດສາມາດຕົວຈິງຂອງແຕ່ລະປະເທດ ໃນການຮ່ວມມືກັນໃນຂົງເຂດເສດຖະກິດ ແລະ ຂົງເຂດອື່ນໆ ທີ່ຕ່າງຝ່າຍຕ່າງມີຄວາມສົນໃຈບົນພື້ນຖານສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ.
ໃນໂອກາດຢ້ຽມຢາມ ແລະ ເຮັດວຽກຢູ່ ສປປ ລາວ ຄະນະຜູ້ແທນກະຊວງການຕ່າງປະເທດ ສປປ ເກົາຫລີ ໄດ້ລົງເຄື່ອນໄຫວຢ້ຽມຢາມສະຖານທີ່ສຳຄັນທາງດ້ານປະຫວັດສາດ ແລະ ການຜະລິດກະສິກຳຢູ່ນະຄອນຫລວງວຽງຈັນຕື່ມອີກ./.
KPL
