ຂປລ. ເມື່ອເວົ້າເຖິງ “ເຂົ້າໄກ່ນ້ອຍ ແຂວງຊຽງຂວາງ”, ໃຜໆກໍຕ້ອງນຶກເຖິງຄວາມນຸ່ມໜຽວ, ກິ່ນຫອມເປັນເອກະລາດ ແລະ ຄວາມແຊບທີ່ຕິດປາກ. ແຕ່ເບື້ອງຫລັງຄວາມແຊບ ແລະ ເມັດເຂົ້າສີຂາວໃສເຫລົ່ານັ້ນ ມັນແລກມາດ້ວຍຢາດເຫື່ອ, ຄວາມອົດທົນ ແລະ ຫົວຄິດປະດິດສ້າງ, ດັ່ງເລື່ອງລາວຄວາມສຳເລັດທີ່ໜ້າປະທັບໃຈຂອງ ທ່ານ ຫລ້າສີວັນ ພິລາວົງ ຈາກບ້ານຫໍກາງ ເມືອງຜາໄຊ ຄອບຄົວຕົວແບບຜູ້ທີ່ສາມາດປ່ຽນຈາກການເຮັດນາເພື່ອກຸ້ມກິນ ມາເປັນການຜະລິດເຂົ້າເປັນສິນຄ້າ ສ້າງລາຍຮັບໃຫ້ຄອບຄົວຫລາຍກວ່າ 100 ລ້ານກີບຕໍ່ປີ.

 ເມື່ອການເຮັດນາແບບດັ້ງເດີມ ຖືກຍົກລະດັບສູ່ “ກະສິກຳສິນຄ້າ” ຄອບຄົວຂອງທ່ານ ຫລ້າສີວັນ ປະກອບມີສະມາຊິກທັງໝົດ 5 ຄົນ, ໂດຍມີແຮງງານຫລັກ 2 ຄົນ ແລະ ສຳຮອງ 1 ຄົນ. ຍ້ອນຄວາມດຸໝັ່ນທີ່ເປັນມູນເຊື້ອ, ພວກເຂົາເຈົ້າບໍ່ເຄີຍຍອມຈຳນົນຕໍ່ຄວາມທຸກຍາກ. ທ່ານ ຫລ້າສີວັນ ໄດ້ເລົ່າເຖິງຈຸດເລີ່ມຕົ້ນດ້ວຍຮອຍຍິ້ມວ່າ: ແຕ່ກ່ອນພວກຂ້າພະເຈົ້າເຄີຍປູກແຕ່ເຂົ້ານ້ອຍທຳມະດາເຊັ່ນ: ເຂົ້າຫລາ, ເຂົ້າດໍ, ເຂົ້າແຂວນເສື້ອ... ໄດ້ຜົນຜະລິດພຽງແຕ່ກຸ້ມກິນ. ມາໃນປີ 2010, ເສັ້ນທາງຊີວິດກໍເລີ່ມຜັນປ່ຽນ ເມື່ອໄດ້ມີໂອກາດເຂົ້າຮ່ວມໂຄງການ ຂອງສະມາຄົມຖີ່ນກຳເນີດເຂົ້າໄກ່ນ້ອຍ. ບວກກັບຄວາມໄດ້ປຽບທາງທຳມະຊາດຂອງບ້ານຫໍກາງ ທີ່ມີທັງແຫລ່ງນ້ຳໃສສະອາດ ແລະ ດິນຟ້າອາກາດທີ່ເປັນໃຈ ຕົນຈຶ່ງຕັດສິນໃຈຫັນມາສຸມໃສ່ປູກເຂົ້າໄກ່ນ້ອຍຢ່າງຈິງຈັງ.

ແຕ່ການຈະປູກໃຫ້ໄດ້ເຂົ້າຄຸນນະພາບສູງນັ້ນ ບໍ່ແມ່ນເລື່ອງບັງເອີນ! ຄອບຄົວຕ້ອງເອົາໃຈໃສ່ຮຽນຮູ້ເຕັກນິກການບຳລຸງດິນ, ເລືອກສາຍພັນທີ່ດີ, ບໍລິຫານລະດັບນ້ຳ ແລະ ບົວລະບັດຮັກສາຢ່າງຖືກຫລັກວິຊາການ ເພື່ອໃຫ້ຕົ້ນເຂົ້າແຂງແຮງ ບໍ່ລົ້ມ, ເມັດເຕັມ ແລະ ຮັກສາຄວາມຫອມຕາມທຳມະຊາດໄວ້ໄດ້ຢ່າງຄົບຖ້ວນ. ໃນເນື້ອທີ່ນາ 2 ເຮັກຕາ,  ໄດ້ເລືອກປູກ ທັງເຂົ້າໄກ່ນ້ອຍດຳ ແລະ ເຂົ້າໄກ່ນ້ອຍເຫລືອງ ໂດຍເນັ້ນການໃສ່ຝຸ່ນຄອກ ແລະ ຝຸ່ນບົ່ມເປັນຫລັກ, ຫລຸດຜ່ອນການໃຊ້ປຸຍເຄມີໃຫ້ນ້ອຍທີ່ສຸດ ເພື່ອຮັກສາຄວາມປອດໄພ ແລະ ດິນໃຫ້ຍືນຍົງ. ທ່ານ ຫລ້າສີວັນ ກ່າວ.

ຜົນທີ່ໄດ້ຮັບແມ່ນໜ້າຊົມເຊີຍ, ໃນແຕ່ລະປີສາມາດເກັບກ່ຽວຜົນຜະລິດໄດ້ສູງເຖິງ 7-8 ໂຕນ. ນອກຈາກຈະກຸ້ມກິນໄດ້ຕະຫລອດປີແລ້ວ, ຍັງເຫລືອຂາຍອອກປີລະ 5-6 ໂຕນ ຊຶ່ງມີພໍ່ຄ້າຄົນກາງມາຮັບຊື້ຮອດທີ່ ແລະ ສົ່ງຂາຍທັງພາຍໃນເມືອງ, ຕ່າງແຂວງ ຈົນສ້າງລາຍຮັບສະເພາະການຂາຍເຂົ້າໄດ້ເຖິງ 80-90 ລ້ານກີບຕໍ່ປີ.

ແນວໃດກໍດີ, ການສ້າງເສດຖະກິດແບບປະສົມປະສານ ເກີນຮ້ອຍລ້ານ, ຄວາມດຸໝັ່ນຂອງ ທ່ານ ຫລ້າສີວັນ ບໍ່ໄດ້ຢຸດຢູ່ພຽງແຕ່ການເຮັດນາ ໂດຍຍາມຫວ່າງຈາກວຽກນາ, ເພິ່ນຍັງໃຊ້ເວລາໃຫ້ເກີດປະໂຫຍດສູງສຸດດ້ວຍການເຮັດກິດຈະກຳເສີມເພີ່ມລາຍຮັບຢ່າງເປັນລະບົບເຊັ່ນ: ລ້ຽງສັດໃຫຍ່ປະເພດງົວ  15 ໂຕ, ລ້ຽງປາ ປ່ອຍລົງໜອງໄປແລ້ວ 30 ກວ່າພັນໂຕ ແລະ ປູກພືດ-ຜັກສວນຄົວ ໝູນວຽນຕະຫລອດປີຕື່ມອີກ. ເມື່ອລວມກິດຈະກຳເສີມເຫລົ່ານີ້ ເຂົ້າກັບການຂາຍເຂົ້າໄກ່ນ້ອຍ, ສາມາດເຮັດໃຫ້ຄອບຄົວ ມີລາຍຮັບຫລາຍກວ່າ 100 ລ້ານກີບຕໍ່ປີ ! ຈາກຄອບຄົວທີ່ເຄີຍທຳມະດາ, ມື້ນີ້ ຊີວິດການເປັນຢູ່ໄດ້ຖືກປີ້ນໜ້າມືເປັນຫລັງມື,  ມີເຮືອນຊານບ້ານຊ່ອງຖາວອນ, ມີພາຫະນະຮັບໃຊ້ສະດວກສະບາຍ ແລະ ທີ່ສຳຄັນທີ່ສຸດແມ່ນສາມາດສົ່ງເສີມໃຫ້ລູກຫລານຮຽນໜັງສືໄດ້ຢ່າງສູງ.

          ໃນຖານະຄອບຄົວຕົວແບບ ທ່ານ ຫລ້າສີວັນ ຍັງຍິນດີຖ່າຍທອດບົດຮຽນ, ເຕັກນິກ ແລະ ປະສົບການໃຫ້ແກ່ພີ່ນ້ອງບ້ານໃກ້ເຮືອນຄຽງ ດ້ວຍຄວາມມຸ່ງຫວັງຢາກໃຫ້ບ້ານຫໍກາງ ກາຍເປັນແຫລ່ງຜະລິດເຂົ້າໄກ່ນ້ອຍທີ່ມີຄຸນນະພາບມາດຕະຖານຂອງແຂວງຊຽງຂວາງ.

ສຳລັບບາດກ້າວຕໍ່ໄປ, ຄອບຄົວກໍມີແຜນຈະຍົກລະດັບຄຸນນະພາບໃຫ້ສູງຂຶ້ນກວ່າເກົ່າ, ສ້າງກາໝາຍສິນຄ້າເປັນຂອງຕົນເອງ ເພື່ອເພີ່ມມູນຄ່າເພີ່ມໃຫ້ກັບເມັດເຂົ້າ. ພ້ອມດຽວກັນນັ້ນ, ທ່ານກໍຝາກຄວາມຫວັງ ແລະ ສຽງຮຽກ ຮ້ອງເຖິງຂັ້ນເທິງ ຊ່ວຍຊຸກຍູ້ຕື່ມໃນເລື່ອງ ການເຂົ້າເຖິງເຕັກນິກໃໝ່ໆ, ການສະໜອງແນວພັນທີ່ດີ, ການຊ່ວຍເຫລືອແຫລ່ງທຶນ ແລະ ການເປີດຕະຫລາດໃຫ້ກວ້າງຂວາງຂຶ້ນ.

ຄວາມສຳເລັດຂອງ ທ່ານ ຫລ້າສີວັນ ພິລາວົງ ໄດ້ພິສູດໃຫ້ເຫັນແລ້ວວ່າ: ຄວາມຮົ່ມເຢັນ ແລະ ຄວາມໝັ້ນຄົງທາງເສດຖະກິດ ບໍ່ໄດ້ມາຈາກໂຊກຊະຕາ, ແຕ່ມັນເກີດຈາກຄວາມດຸໝັ່ນ, ການຮຽນຮູ້ບໍ່ຢຸດຢັ້ງ ແລະ ການຮູ້ຈັກປັບຕົວ ຈົນສາມາດປ່ຽນຜືນແຜ່ນດິນທຳມະຊາດ ໃຫ້ກາຍເປັນຄວາມສຸພາບ ແລະ ຄວາມຮຸ່ງເຮືອງຂອງຄອບຄົວ ແລະ ສັງຄົມຢ່າງແທ້ຈິງ.

KPL