ຂປລ. ໃນພິທີ 3 ຝ່າຍໄດ້ຕີລາຄືນການ ຮ່ວມມືຊ່ວຍເຫລືອເຊິ່ງກັນ ແລະ ກັນໃນຊຸມປີທີ່ຜ່ານມາ, ເຫັນວ່າມີຜົນສໍາເລັດທີ່ພົ້ນເດັ່ນຫລາຍດ້ານ ໂດຍສະເພາະແມ່ນການພົບປະ 3 ລັດຖະມົນຕີກະຊວງປ້ອງກັນປະເທດ ໃນເດືອນຕຸລາ ປີ 2025 ຢູ່ນະຄອນຫລວງວຽງຈັນ ສປປ ລາວ, ເດືອນກຸມພາ ປີ 2026 ຢູ່ນະຄອນຫລວງພະນົມເປັນລາຊະອານາຈັກກໍາປູເຈຍ, ການແລກປ່ຽນນາຍທະຫານໜຸ່ມລະຫວ່າງ 3 ກອງທັບ ໃນເດືອນພຶດສະພາ ປີ 2026 ຢູ່ນະຄອນດານັງ ສສ ຫວຽດນາມ ຊ່ຶງບັນດາເຫດການດັ່ງກ່າວ ໄດ້ສະແດງເຖິງສາຍພົວພັນມິດຕະພາບທີ່ເປັນມູນເຊື້ອລະຫວ່າງສາມຊາດ ລາວ-ກໍາປູເຈຍ-ຫວຽດນາມ ກໍຄືສາມກອງທັບທີ່ໄດ້ສືບຕໍ່ ແລະ ຜັນຂະຫຍາຍມູນເຊື້ອຄວາມສາມັກຄີທີ່ສະໜິດແໜ້ນລະຫວ່າງ 3 ຊາດ ໃຫ້ເປັນສົມບັດອັນລໍ້າຄ່າໃຫ້ແກ່ພະນັກງານຮຸ່ນສືບທອດຕະຫລອດໄປ. ສາມປະເທດມີຊາຍແດນຕິດຈອດກັນ ແລະ ເປັນປະເທດທີ່ເຄີຍຕົກຢູ່ໃນຊະຕາກໍາອັນດຽວກັນທີ່ມີມູນເຊື້ອສາມັກຄີຊ່ວຍເຫລືອກັນມາ ແຕ່ດຶກດໍາບັນແບບສະຫາຍອ້າຍນ້ອງ, ຮ່ວມທຸກຮ່ວມສຸກນໍາກັນຕະຫລອດມາ, ປະຊາຊົນສາມຊາດໃນອິນດູຈີນ ໄດ້ຕໍ່ສູ້ຄຽງບ່າຄຽງໄຫລ່ຕ້ານກັບຈັກກະພັດຕ່າງດ້າວຜູ້ຮຸກຮານໂຕດຽວກັນ. ສະນັ້ນ, ບໍ່ວ່າຈະຢູ່ໃນສະພາບເງື່ອນໄຂໃດ ແລະ ໄລຍະໃດກໍບໍ່ສາມາດຕັດແຍກອອກຈາກກັນໄດ້. ພັກ-ລັດ, ກອງທັບ ແລະ ປະຊາຊົນລາວບັນດາເຜ່ົາພ້ອມທີ່ຈະຮ່ວມມືກັບສອງກອງທັບຫວຽດນາມ ແລະ ກໍາປູເຈຍ ເພ່ືອຮັດແໜ້ນນໍ້າໃຈມິດຕະພາບທີ່ເປັນມູນເຊື້ອໃຫ້ຍືນຍົງຊົ່ວກາລະນາ.

ໂອກາດດ່ັງກ່າວ, ສະຫາຍ ພົນເອກ ຄໍາລຽງ ອຸທະໄກສອນ ໄດ້ເຫັນດີເປັນເອກະພາບຢ່າງສູງຕໍ່ຄໍາຄິດເຫັນຂອງສະຫາຍ ພົນເອກ ຟານ ວັນ ຢາງ ແລະ ສະຫາຍ ພົນເອກ ເຕຍ ໄຊຫາ ຕໍ່ບັນຫາຕ່າງໆທີ່ໄດ້ຍົກມານັ້ນ ແລະ ສະເໜີທິດທາງແຜນການຮ່ວມມືໃນປີ 2027 ຂອງສາມກອງທັບ ເພື່ອສືບຕໍ່ຈັດກອງປະຊຸມພົບປະ 3 ລັດຖະມົນຕີ ໃຫ້ເປັນປົກກະຕິໂດຍຜັດປ່ຽນກັນເປັນເຈ້ົາພາບ, ຖືເອົາເວທີນີ້ແລກປ່ຽນທັດສະນະຕໍ່ບັນຫາສະພາບການທີ່ພົ້ນເດັ່ນຂອງໂລກ ແລະ ພາກພື້ນທີ່ຈະມີຜົນກະທົບຕໍ່ສາມຊາດ, ສາມກອງທັບ ແລະ ສືບຕໍ່ຈັດການຝຶກຊ້ອມຮ່ວມກອບກູ້ໄພພິບັດໃຫ້ເປັນປົກກະຕິ ໂດຍຜັດປ່ຽນກັນເປັນເຈົ້າພາບເພື່ອຍົກສູງຄຸນນະພາບໃນການຝຶກຊ້ອມຄັ້ງຕໍ່ໄປ, ສືບຕໍ່ແລກປ່ຽນນາຍທະຫານໜຸ່ມຢ່າງເປັນປົກກະຕິ ເພື່ອເປີດໂອກາດໃຫ້ໄດ້ແລກປ່ຽນບົດຮຽນ, ປະສົບການ, ຮັດແໜ້ນ ຄວາມສາມັກຄີ ເພື່ອຮັກສາສາຍພົວພັນທີ່ເປັນມູນເຊື້ອລະຫວ່າງສາມຊາດ, ສາມກອງທັບ, ຊຸກຍູ້ໃຫ້ມີການລາດຕະເວນຮ່ວມ 3 ກອ ທັບຢູ່ເຂດທີ່ມີຊາຍແດນຕິດຈອດກັນ 3 ປະເທດ ແລະ 2 ປະເທດ ທີ່ມີຊາຍແດນຕິດຈອດກັນ ເພື່ອເປັນການສະກັດກັ້ນການລັກລອບເຂົ້າເມືອງຜິດກົດໝາຍ, ອາຊະຍາກໍາຂ້າມຊາດ, ການຄ້າມະນຸດ, ການຄ້າຂາຍເຖ່ືອນ, ການຂົນສ່ົງຢາເສບຕິດ, ການຄ້າອາວຸດ ແລະ ກໍລະນີອື່ນໆທີ່ຜິດກົດໝາຍ, ຊຸກຍູ້, ອໍານວຍຄວາມສະດວກໃຫ້ກົມກອງເຮັດໜ້າທີ່ຢູ່ຕາມຊາຍແດນຂອງ 3 ປະເທດ ໄດ້ແລກປ່ຽນຂ້ໍມູນຂ່າວສານ, ປະສານສົມທົບເພື່ອສະກັດກັ້ນ, ແກ້ໄຂບັນຫາຫຍໍ້ທໍ້ຕາມບໍເວນຊາຍແດນໃຫ້ທັນເວລາ, ສືບຕ່ໍປົກປັກຮັກສາບູລະນະຫລັກໝາຍຊາຍແດນ ແລະ ຊຸກຍູ້ການຮ່ວມມືສໍາຫລວດປັກຫລັກໝາຍຊາຍແດນຢູ່ບໍລິເວນທີ່ຍັງຄົງຄ້າງໃຫ້ສໍາເລັດ ເພື່ອສ້າງເປັນຊາຍແດນແຫ່ງສັນຕິພາບ, ມິດຕະພາບ, ຄວາມໝັ້ນຄົງ, ການຮ່ວມມືເພື່ອພັດທະນາຢ່າງແທ້ຈິງ, ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ກໍຄືບັນດາກອງປະຊຸມ ໃນຂອບກອງປະຊຸມລັດຖະມົນຕີປ້ອງກັນປະເທດອາຊຽນ, ອາຊຽນບວກ ແລະ ເວທີປຶກສາຫາລືຄວາມໝັ້ນຄົງສາກົນຕ່າງໆ. ພ້ອມນັ້ນ, ສາມຝ່າຍກໍໄດ້ເຊັນບົດບັນທຶກການຮ່ວມມືຊ່ວຍເຫລືອເຊິ່ງກັນ ແລະ ກັນຕື່ມອີກ. 

   ໃນວັນດຽວກັນ, ສະຫາຍ ພົນເອກ ຄໍາລຽງ ອຸທະໄກສອນ ພ້ອມດ້ວຍຄະນະກໍໄດ້ເຂົ້າຢ້ຽມຂໍ່ານັບສະຫາຍ ໂຕ ເລິມ ເລຂາທິການໃຫຍ່, ປະທານ ປະເທດແຫ່ງ ສສ ຫວຽດນາມ ເນື່ອງໃນໂອກາດເຂົ້າຮ່ວມກອງປະຊຸມ 3 ລັດຖະມົນຕີກະຊວງປ້ອງປະເທດ ລາວ-ຫວຽດນາມ- ກຳປູເຈຍ.

            ຂ່າວ: ສີປະພັນ

KPL