ຂປລ.ໂດຍສະເໜີໃຫ້ສະພາແຫ່ງຊາດ ສືບຕໍ່ປັບປຸງຫລາຍບັນຫາສຳຄັນທີ່ຍັງຄົງຄ້າງ, ພ້ອມທັງສະເໜີຫລາຍບັນຫາໃຫ້ສະພາແຫ່ງຊາດ ສືບຕໍ່ປັບປຸງແກ້ໄຂໃນຕ່ໍໜ້າ ໂດຍສະເພາະທ່ານ ໄຊຍະເດດ ຜຸຍຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 13 ແຂວງ ສະຫວັນນະເຂດ ໄດ້ສະເໜີໃຫ້ສະພາແຫ່ງຊາດ ກຳນົດບົດບາດ ແລະ ກົນໄກການມີສ່ວນຮ່ວມຂອງສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນ ແຂວງ (ສສຂ) ໃນການຕິດຕາມກວດກາການຈັດຕ້ັງປະຕິບັດໂຄງການລົງທຶນຂອງລັດ ໂດຍສະເພາະໂຄງການກໍ່ສ້າງ ແລະ ສ້ອມແປງພ້ືນຖານໂຄງລ່າງ ເພ່ືອຍົກສູງຄຸນນະພາບ, ປະສິດທິຜົນ ແລະ ຄວາມຍືນຍົງຂອງໂຄງການ.

    ທ່ານ ໄຊຍະເດດ ຜຸຍຍະວົງ ໄດ້ສະແດງຄວາມເປັນເອກະພາບສູງຕໍ່ບົດສະຫລຸບການເຄື່ອນໄຫວວຽກງານຂອງຄະນະປະຈຳສະພາແຫ່ງຊາດ ປະຈຳປີ 2026 ຊຶ່ງເຫັນວ່າຂັ້ນເທິງຍາມໃດກໍໃຫ້ຄວາມສຳຄັນ ແລະ ຍົກສູງບົດບາດຂອງອົງການນິຕິບັນຍັດຕະຫລອດມາບ່ໍວ່າຈະເປັນສະພາແຫ່ງຊາດ ກໍຄືສະພາປະຊາຊົນແຂວງ ເຮັດໃຫ້ສະມາຊິກສະພາສາມາດປະຕິບັດໜ້າທີ່ການເມືອງທີ່ການຈັດຕັ້ງມອບໃຫ້ໄດ້ຢ່າງຄ່ອງຕົວ. ຢ່າງໃດກໍຕາມ, ສຳລັບທິດທາງແຜນການເຄື່ອນໄຫວວຽກງານໃນ ປີ 2027 ນີ້ ສະເໜີໃຫ້ສະພາແຫ່ງຊາດ ກຳນົດບົດບາດ ແລະ ກົນໄກການມີສ່ວນຮ່ວມຂອງ ສສຊ ແລະ ສສຂ ມີສ່ວນຮ່ວມໃນການຕິດຕາມກວດກາ ແຕ່ຫົວທີການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍສະເພາະແມ່ນບັນໂຄງການລົງທຶນຂອງລັດ ໃສ່ພື້ນຖານໂຄງລ່າງໃຫ້ມີຄວາມເລິກເຊິ່ງເຖິງຖອງຂຶ້ນຕື່ມ ເພາະໃນໄລຍະຜ່ານມາກົມການເມືອງສູນກາງພັກ ກໍຄືລັດຖະບານ ຍາມໃດກໍເປັນຫ່ວງເປັນໃຍຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ໄດ້ອອກນະໂຍບາຍ, ພ້ອມທັງຈັດສັນງົບປະມານມະຫາສານ ໃສ່ການກໍ່ສ້າງ-ຟື້ນຟູພື້ນຖານໂຄງລ່າງຈຳນວນຫລວງຫລາຍໂຄງການ ແຕ່ດ້ານບຸກຄະລາກອນຕິດຕາມຄຸ້ມຄອງໂຄງການມີໜ້ອຍບ່ໍພຽງພໍ ເຮັດໃຫ້ບ່ໍສາມາດລົງເລິກຢ່າງທົ່ວເຖິງ ຊຶ່ງເຮັດໃຫ້ຄຸນນະພາບຂອງໂຄງການກໍ່ສ້າງສ້ອມແປງອອກມາຕໍ່າ ແລະ ບໍ່ມີຄວາມຍືນຍົງ.

    ໃນສະພາບປັດຈຸບັນຖ້າຈະອີງໃສ່ຂະແໜງການວິຊາສະເພາະດ້ານດຽວ ເຫັນວ່າເບິ່ງບໍ່ຫລ້ອນເພາະຢູ່ຂ້ັນກະຊວງແມ່ນແບ່ງເປັນຫລາຍກົມ ແລະ ໃນແຕ່ລະກົມກໍແບ່ງເປັນຫລາຍພະແນກ ຊຶ່ງແຕ່ລະພະແນກກໍມີພະນັກງານພຽງຫລັກສິບຄົນ ແລະ ສ່ວນຢູ່ຂັ້ນຂະແໜງຂຶ້ນກັບພະແນກການຕ່າງໆຂອງແຂວງກໍພົບປັນຫາບຸກຄະລາກອນເຊັ່ນດຽວກັນ. ສະນັ້ນ, ສະເໜີກຳນົດເປັນນິຕິກຳໃຫ້ບັນດາ ສສຊ-ສສຂ ຕິດຕາມຊ່ວຍຕື່ມ ເພື່ອໃຫ້ການກໍສ້າງພື້ນຖານໂຄງລ່າງໄປຕາມແບບຕາມແຜນທ່ີກຳນົດໄວ້ເພາະພວກເຮົາກໍໄດ້ສ້າງຕ້ັງສະພາແຂວງສຳເລັດມາຫລາຍສິບປີແລ້ວ ແລະ ຢູ່ຂັ້ນເມືອງກໍໄດ້ເລີ່ມສ້າງຕັ້ງໂດຍມີສະຫາຍເລຂາພັກເມືອງເປັນຫົວໜ້າຄະນະ, ຫາກໃຫ້ບົດບາດພວກເພີ່ນຕິດຕາມຊ່ວຍຈະເປັນການດີ, ສ່ວນງົບປະມານຮັບໃຊ້ກໍໃຫ້ບິແບ່ງເອົາເງິນຄຸ້ມຄອງໂຄງການເລີຍ.

   ທ່ານ ໄຊຍະເດດ ຜຸຍຍະວົງ ຍັງໄດ້ສະເໜີໃຫ້ອອກແບບຫ້ອງການສະພາເມືອງໃຫ້ມີຄວາມເປັນເອກະພາບໃນຂອບເຂດທົ່ວປະເທດ ເພ່ືອລໍຖ້າຄວາມພ້ອມທາງດ້ານງົບປະມານໃນການກໍ່ສ້າງ ແລະ ຄຽງຄູ່ກັນນັ້ນກໍສະເໜີພິຈາລະນາຄືນນະໂຍບາຍຕໍ່ ສສຊ ແລະ ສສຂ ຕາມຂັ້ນຄຸ້ມຄອງທີ່ກຳນົດໃນມະຕິກົມການເມືອງສູນກາງພັກ ສະບັບ ເລກທີ 031/ກມສພ.

ຂ່າວ: ກິດຕາ

KPL