ຂປລ
ໃນວັນທີ 14 ຕຸລາ 2026 ທີ່ສໍານັກງານນາຍົກລັດຖະມົນຕີ, ທ່ານ ສະເຫລີມໄຊ ກົມມະສິດ ນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມຕໍ່ຄະນະພັກ, ຄະນະນຳ ແລະ ພະນັກງານຫລັກແຫລ່ງທີ່ມີຕຳແໜ່ງຮອງຫົວໜ້າພະແນກຂຶ້ນໄປທ່ົວຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໂດຍ ທ່ານໄດ້ເນັ້ນໜັກວ່າ ຫສນຍ ຕ້ອງກຳແໜ້ນແນວທາງ, ນະໂຍບາຍ, ນິຕິກຳ ແລະ ສະພາບຕົວຈິງກ່ອນພາກສ່ວນອື່ນບາດກ້າວໜຶ່ງ.
ຂປລ. ໂອກາດນີ້, ທ່ານນາຍົກລັດຖະມົນຕີ ໄດ້ຍົກໃຫ້ເຫັນທີ່ຕັ້ງ, ບົດບາດຄວາມສຳຄັນຂອງ ຫສນຍ ໃນການເປັນເສນາທິການ, ປະສານງານ ແລະ ບໍລິການຮັບໃຊ້ໃຫ້ແກ່ລັດຖະບານ ກໍຄື ທ່ານນາຍົກລັດຖະມົນຕີ ແລະ ບັນດາທ່ານຮອງນາຍົກລັດຖະມົນຕີ, ພ້ອມທັງໃຫ້ທິດຊີ້ນຳດັ່ງນີ້: ຄະນະພັກແຕ່ລະຂັ້ນ ພາຍໃນອົງຄະນະພັກ ຫສນຍ ຕ້ອງເອົາໃຈໃສ່ເຮັດວຽກງານການເມືອງ-ແນວຄິດຂອງພະນັກງານ-ລັດຖະກອນ ຢ່າງເລິກເຊ່ິງເຖິງຖອງ, ກຳໃຫ້ໄດ້ສະພາບແນວຄິດ ແລະ ການດຳລົງຊີວິດຂອງເຂົາເຈົ້າ, ທັງສ້າງເງື່ອນໄຂເຮັດໃຫ້ພະນັກງານ-ລັດຖະກອນ ສືບຕໍ່ປະຕິບັດໜ້າທີ່ດ້ວຍຄວາມອຸ່ນອ່ຽນທຸ່ນທ່ຽງ, ມີສະພາບການເປັນຢູ່ທ່ີດີ, ມີຄວາມຮັບຜິດຊອບສູງຕ່ໜ້າທ່ີ, ມີຄວາມເສຍສະລະເພ່ືອຜົນປະໂຫຍດສ່ວນລວມ, ມີຄວາມກະຕືລືລົ້ນ, ມີຈິດໃຈ ແລະ ແນວຄິດຢາກພັດທະນາປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະໃໝ່; ສືບຕໍ່ປະຕິບັດກົນໄກການຈໍລະຈອນເອກະສານເຂົ້າ- ອອກ, ລະບອບແບບແຜນ ແລະ ກົນໄກການເຮັດວຽກໃຫ້ລະອຽດຊັດເຈນ, ວ່ອງໄວ ແລະ ຫັນໄປສູ່ລະບົບທັນສະໄໝ; ເອົາໃຈໃສ່ຄົ້ນຄວ້າ, ກັ່ນຕອງໃນການອອກປະເພດນິຕິກຳ ໃຫ້ສອດຄ່ອງເໝາະສົມກັບການຕົກລົງ ກໍຄື ບັນດາທິດຊ້ີນຳຕົວຈິງຂອງຂ້ັນເທິງ, ຄຽງຄູ່ກັບກຳນົດກົນໄກການຕິດຕາມຊຸກຍູ້ ແລະ ປະເມີນຜົນການຈັດຕ້ັງປະຕິບັດບັນດານິຕິກຳ ກໍ່ຄື ທິດຊີ້ນຳຂອງລັດຖະບານທີ່ໄດ້ວາງອອກໃຫ້ມີປະສິດທິຜົນສູງ; ຄ້ົນຄວ້າປັບປຸງກົນໄກ ກໍຄື ຂອດການຄົ້ນຄວ້າເນື້ອໃນຕ່າງໆໃນຂັ້ນວິຊາການ ໃຫ້ເລິກເຊິ່ງເຖິງຖອງກ່ອນທີ່ຈະນຳເຂົ້າພິຈາລະນາໃນກອງປະຊຸມລັດຖະບານ, ກອງປະຊຸມນາຍົກ-ຮອງນາຍົກລັດຖະມົນຕີເພື່ອໃຫ້ກອງປະຊຸມໃຊ້ເວລາສັ້ນ ແລະ ສາມາດຕົກລົງໄດ້ຫລາຍບັນຫາ; ເພີ່ມທະວີເອົາໃຈໃສ່ຮັກສາຄວາມລັບທາງດ້ານເອກະສານ ກໍຄືຄຳເຫັນຊີ້ນຳຂອງການນຳທີ່ເປັນລາຍລັກອັກສອນ; ປັບປຸງລະບົບຮັກສາຄວາມປອດໄພພາຍໃນຕຶກອາຄານ ແລະ ພາຍໃນຮົ້ວ ຫສນຍ ໃຫ້ມີຄວາມເປັນລະບຽບຮຽບຮ້ອຍ, ມີຄວາມຮັບປະກັນສູງສຸດໃຫ້ແກ່ການນຳ; ປັບປຸງພ້ືນຖານໂຄງລ່າງ-ເຕັກນິກວຽກງານໂຄສະນາປະຊາສຳພັນໃຫ້ທັນສະໄໝ ແລະ ວ່ອງໄວທັນການກວ່າເກົ່າ ເພື່ອໃຫ້ສົມບົດບາດ ແລະ ພາບພົດຂອງລັດຖະບານຢ່າງແທ້ຈິງ.
ໂອກາດດຽວກັນ, ທ່ານລັດຖະມົນຕີ, ຫົວໜ້າ ຫສນຍ ໄດ້ລາຍງານໃຫ້ຊາບກ່ຽວກັບສະພາບລວມຂອງຫ້ອງວ່າການສໍານັກງານນາຍົກລັດຖະມົນຕີ ເປັນຕົ້ນທີ່ຕັ້ງ ແລະ ພາລະບົດບາດ, ການຈັດຕັ້ງ ແລະ ບຸກຄະລາກອນ, ຜົນການຈັດຕັ້ງປະຕິບັດວຽກງານການເມືອງ ແລະ ວຽກງານວິຊາສະເພາະໃນໄລຍະທີ່ຜ່ານມາ, ລວມທັງຂໍ້ສະດວກ, ຂ້ໍຫຍຸ້ງຍາກ, ຂໍ້ຄົງຄ້າງ, ທິດທາງແຜນການໃນຕ່ໍໜ້າ ແລະ ຂ້ໍສະເໜີຈຳນວນໜຶ່ງ.
ຫລັງຈາກນັ້ນ, ເພື່ອລະດົມຄວາມຄິດເຫັນ ແລະ ເປັນເອກະພາບສູງຕໍ່ການຈັດຕັ້ງປະຕິບັດວຽກງານ ໃນຕ່ໍໜ້າໃຫ້ມີປະສິດທິພາບ ແລະ ປະສິດທິຜົນໃນການເຮັດໜ້າທີ່ເປັນເສນາທິການໃຫ້ແກ່ລັດຖະບານສູງຂ້ຶນກວ່າເກ່ົາ, ທ່ານນາຍົກລັດຖະມົນຕີໄດ້ມີຄຳເຫັນເຈາະຈີ້ມ ແລະ ເປີດກວ້າງໃຫ້ຜູ້ເຂົ້າຮ່ວມໄດ້ສະເໜີແລກປ່ຽນຄວາມຄິດເຫັນຢ່າງກົງໄປກົງມາ, ສ້າງສັນ, ແທດບັນຫາຕົວຈິງ ແລະ ມີທາງອອກທີ່ສົມເຫດສົມຜົນ.
ຂ່າວ-ພາບ: ກົມປະຊາສຳພັນ ຫສນຍ.
KPL
