ຂປລ
ວັນທີ 5 ຕຸລາ 2026 ຜ່ານມາ, ສະຫາຍ ເລ ຮວາຍ ຈຸງ ກຳມະການກົມການເມືອງສູນກາງພັກ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດສັງຄົມນິຍົມຫວຽດນາມ ໄດ້ສົ່ງສານສະແດງຄວາມຊົມເຊີຍເຖິງສະຫາຍ ທອງສະຫວັນ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເນື່ອງໃນໂອກາດທີ່ໄດ້ຮັບເລືອກຕັ້ງເຂົ້າໃນກົມການເມືອງຄະນະບໍລິຫານງານສູນກາງພັກປະຊາຊົນປະຕິວັດລາວ.
ເນື້ອໃນສານໄດ້ລະບຸວ່າ: ຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງທີ່ໄດ້ຮັບຊາບວ່າທີ່ກອງປະຊຸມຄະນະບໍລິຫານງານສູນກາງພັກປະຊາຊົນປະຕິວັດລາວ ຊຸດທີ XII ທີ່ຜ່ານມານີ້, ສະຫາຍໄດ້ຮັບເລືອກຕັ້ງເຂົ້າໃນກົມການເມືອງຄະນະບໍລິຫານງານສູນກາງພັກປະຊາຊົນປະຕິວັດລາວ. ຕາງໜ້າໃຫ້ກະຊວງການຕ່າງປະເທດ ແຫ່ງ ສາທາລະນະລັດສັງຄົມນິຍົມຫວຽດນາມ ແລະ ໃນນາມສ່ວນຕົວ, ຂ້າພະເຈົ້າຂໍສົ່ງຄວາມຊົມເຊີຍອັນປະເສີດມາຍັງສະຫາຍ.
ການທີ່ສະຫາຍໄດ້ຮັບຄວາມໄວ້ເນື້ອເຊື່ອໃຈເລືອກຕັ້ງເຂົ້າໃນກົມການເມືອງແມ່ນການຮອງຮັບຂອງພັກ ແລະ ລັດລາວ ຕໍ່ກັບບັນດາການປະກອບສ່ວນອັນສຳຄັນຂອງສະຫາຍໃນໄລຍະການປະຕິບັດງານທີ່ຜ່ານມາ ໂດຍສະເພາະແມ່ນໃນຂົງເຂດວຽກງານການຕ່າງປະເທດ. ຂ້າພະເຈົ້າເຊື່ອໝັ້ນວ່າ, ໃນຖານະຕຳແໜ່ງກຳມະການກົມການເມືອງ, ສະຫາຍຈະສືບຕໍ່ນຳພາກະຊວງການຕ່າງປະເທດລາວ ປະຕິບັດສຳເລັດບັນດາໜ້າທີ່, ເປົ້າໝາຍທີ່ກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ ໄດ້ວາງອອກຢ່າງຈົບງາມ, ປະກອບສ່ວນສຳຄັນເຂົ້າໃນພາລະກິດປົກປັກຮັກສາ, ສ້າງສາ ແລະ ຍົກສູງພາລະບົດບາດ, ອິດທິພົນໃນເວທີສາກົນຂອງປະເທດລາວອ້າຍນ້ອງ.
ຂ້າພະເຈົ້າຍັງເຊື່ອໝັ້ນວ່າ, ດ້ວຍຖານະຕໍາແໜ່ງໃໝ່ອັນໜັກໜ່ວງນີ້, ສະຫາຍຈະສືບຕໍ່ໃຫ້ຄວາມເອົາໃຈໃສ່, ສະໜັບສະໜູນເຮັດໃຫ້ການພົວພັນລະຫວ່າງສອງກະຊວງການຕ່າງປະເທດລາວ ແລະ ຫວຽດນາມ ນັບມື້ກ້າວເຂົ້າສູ່ລວງເລິກ, ແທ້ຈິງ ແລະ ມີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ປະກອບສ່ວນພ້ອມກັນຈັດຕັ້ງປະຕິບັດບັນດາຂໍ້ຕົກລົງຂັ້ນສູງລະຫວ່າງສອງພັກ, ສອງລັດໃຫ້ມີປະສິດທິຜົນ.
ຂໍອວຍພອນໃຫ້ສະຫາຍຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ຍາດໄດ້ຫຼາຍຜົນສຳເລັດໃໝ່ໃນຖານະຕຳແໜ່ງອັນສູງສົ່ງຂອງຕົນ. ຂໍອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ຫວຽດນາມ-ລາວ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.
KPL
