ຂປລ
ກະຊວງການຕ່າງປະເທດ ຈັດພິທີປະກາດການຈັດຕັ້ງ, ເລື່ອນຊັ້ນນັກການທູດ ແລະ ເລື່ອນທຽບຊັ້ນນັກການທູດ ປະຈຳປີ 2026 ແລະ ມອບສັນຍາບັດກົງສຸນໃຫຍ່ ແຫ່ງ ສປປ ລາວ ໃນວັນທີ 8 ຕຸລາ 2026
ໂດຍການເປັນປະທານຂອງທ່ານ ທອງສະຫວັນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ມີຄະນະພັກ-ຄະນະນຳກະຊວງ, ຄະນະກົມ, ຄະນະພະແນກ ແລະ ພະນັກງານ-ລັດຖະກອນພາຍໃນກະຊວງການຕ່າງປະເທດ ເຂົ້າຮ່ວມ.
ໃນພິທີ, ທ່ານ ວັນດີ ບຸດສະດີ ກໍາມະການປະຈໍາພັກກະຊວງ, ຫົວໜ້າກົມຈັດຕັ້ງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານໄປປະຈໍາການຢູ່ສຳນັກງານຜູ້ຕາງໜ້າແຫ່ງ ສປປ ລາວ ປະຈຳຢູ່ຕ່າງປະເທດ ໂດຍແຕ່ງຕັ້ງທ່ານ ບຸນທະວີ ບຸດສາແສງ ຮອງຫົວໜ້າຫ້ອງການກະຊວງເປັນກົງສຸນໃຫຍ່ ແຫ່ງ ສປປ ລາວ ປະຈໍາ ສສ ຫວຽດນາມ ທີ່ນະຄອນໂຮ່ຈີ່ມິງ, ແຕ່ງຕັ້ງທ່ານ ແສງແກ້ວ ມີທອງ ຮອງຫົວໜ້າກົມອາຊີ-ປາຊີຟິກ ແລະ ອາຟຣິກາ ເປັນກົງສຸນໃຫຍ່ ແຫ່ງ ສປປ ລາວ ປະຈໍາ ຣາຊະອານາຈັກກໍາປູເຈຍ ທີ່ຊຽງແຕງ. ນອກຈາກນັ້ນ, ກໍໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຮອງຫົວໜ້າກົມ ຈຳນວນ 2 ທ່ານ, ຫົວໜ້າພະແນກ 5 ທ່ານ, ຮອງຫົວໜ້າພະແນກ 9 ທ່ານ ແລະ ຂໍ້ຕົກລົງວ່າດ້ວຍການເລື່ອນຊັ້ນນັກການທູດ ແລະ ເລື່ອນທຽບຊັ້ນນັກການທູດ ຈຳນວນ 143 ທ່ານ ໃຫ້ພະນັກງານ-ລັດຖະກອນຢູ່ພາຍໃນກະຊວງ ແລະ ກຳລັງປະຕິບັດໜ້າທີ່ຢູ່ຕ່າງປະເທດ.
ໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ບັນດາສະຫາຍທີ່ໄດ້ຮັບການແຕ່ງຕັ້ງເປັນກົງສຸນໃຫຍ່, ຕຳແໜ່ງບໍລິຫານ, ເລື່ອນຊັ້ນນັກການທູດ ແລະ ເລື່ອນທຽບຊັ້ນນັກການທູດໃນຄັ້ງນີ້ ຊຶ່ງເປັນການມອບໝາຍການເມືອງ-ການຕ່າງປະເທດ ແລະ ເປັນການເພີ່ມກໍາລັງແຮງໃນກົງຈັກການຈັດຕັ້ງ ເພື່ອຈັດຕັ້ງປະຕິບັດວຽກງານຂອງກະຊວງການຕ່າງປະເທດໃຫ້ມີຄວາມເຂັ້ມແຂງຂຶ້ນເລື້ອຍໆ. ພ້ອມກັນນັ້ນ, ກໍໄດ້ເນັ້ນໜັກໃຫ້ບັນດາສະຫາຍທີ່ໄດ້ຮັບການແຕ່ງຕັ້ງພ້ອມດ້ວຍພະນັກງານ-ລັດຖະກອນພາຍໃນກະຊວງການຕ່າງປະເທດ ຈົ່ງພ້ອມກັນເປັນເຈົ້າການໃນການຍົກສູງຄວາມເປັນແບບຢ່າງນຳໜ້າທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ເສີມຂະຫຍາຍຄວາມສາມັກຄີ, ແບບແຜນການນຳພາ, ຄວາມເສຍສະລະເພື່ອສ່ວນລວມແນໃສ່ຮັບປະກັນໃຫ້ການຈັດຕັ້ງຜັນຂະຫຍາຍເນື້ອໃນຂອງມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ກໍຄືອົງຄະນະພັກກະຊວງການຕ່າງປະເທດຄັ້ງທີ V ພາຍໃຕ້ຄໍາຂວັນ “ບຸກທະລຸການທູດເສດຖະກິດ, ຫັນທິດເປັນທັນສະໄໝ, ວ່ອງໄວດ້ານເສນາທິການ” ແລະ ກອງປະຊຸມວຽກງານການຕ່າງປະເທດ ຄັ້ງທີ XIV ໃຫ້ປະກົດຜົນເປັນຈິງ.
KPL
