ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 7 ຕຸລາ 2026 ວ່າ: ໃນ 8 ເດືອນຕົ້ນປີ 2026 ໄດ້ມີການນຳເຂົ້າລົດທັງໝົດ 37.475 ຄັນ, ໃນນັ້ນເປັນລົດໄຟຟ້າ 100% ຈໍານວນ 8.330 ຄັນ (ເພີ່ມຂຶ້ນ 107%) ແລະ ລົດໄຮບຣິດ 2.804 ຄັນ (ເພີ່ມຂຶ້ນ 114%), ເຮັດໃຫ້ສັດສ່ວນລົດທີ່ໃຊ້ພະລັງງານໃໝ່ກວມເຖິງ 29,7% ຂອງຍອດການນໍາເຂົ້າ. ດ້ານການຂຶ້ນທະບຽນໃໝ່ 8 ເດືອນຕົ້ນປີສາມາດຂຶ້ນທະບຽນລົດໄຟຟ້າໄດ້ 6.104 ຄັນ. ສຳລັບເຄືອຂ່າຍສະຖານີສາກໄດ້ອະນຸຍາດຜູ້ປະກອບການແລ້ວ 43 ບໍລິສັດ, ມີສະຖານີສາກເປີດບໍລິການແລ້ວ 200 ຈຸດທົ່ວ 18 ແຂວງ/ນະຄອນຫຼວງ, ພ້ອມທັງເປີດໃຊ້ງານແອັບພລິເຄຊັນ Lao EV Charging ເພື່ອອໍານວຍຄວາມສະດວກໃຫ້ແກ່ສັງຄົມໃນການຄົ້ນຫາ ແລະ ນຳໃຊ້ສະຖານີສາກ. ນອກຈາກນີ້, ຍັງຫັນເຂົ້າສູ່ລະບົບການເງິນ ຊຶ່ງທະນາຄານແຫ່ງ ສປປ ລາວ ໄດ້ຊຸກຍູ້ການຊຳລະສະສາງການຊື້-ຂາຍລົດຜ່ານລະບົບທະນາຄານ ແລະ ສຳເລັດການອອກຮຸ້ນກູ້ສີຂຽວ (Green Bond) ເພື່ອລະດົມທຶນເຂົ້າໃສ່ໂຄງລ່າງ EV ເປັນຕົ້ນແບບແລ້ວ.

ເຖິງຢ່າງໃດກໍຕາມ, ກໍຍັງມີບາງບັນຫາ ແລະ ສິ່ງທ້າທາຍໃນການຫັນປ່ຽນໄປສູ່ລົດ EV ເປັນຕົ້ນແມ່ນດ້ານນະໂຍບາຍຍັງຂາດນະໂຍບາຍແມ່, ນະໂຍບາຍພາສີຍັງບໍ່ຊັດເຈນ ແລະ ການປະສານງານລະຫວ່າງຂະແໜງການລັດຍັງບໍ່ທັນກົມກຽວ ແລະ ໄປໃນທິດທາງດຽວກັນ; ດ້ານຕະຫຼາດລາຄາຊື້ລົດຍັງສູງ, ຜູ້ຊົມໃຊ້ຍັງກັງວົນເລື່ອງຄວາມປອດໄພ/ແບັດເຕີຣີ, ສິນເຊື່ອຍັງມີໜ້ອຍ ແລະ ບໍ່ທັນມີຕະຫຼາດລົດມືສອງຮອງຮັບ; ດ້ານການສະໜອງທາງເລືອກຍີ່ຫໍ້ລົດຍັງຈໍາກັດຢູ່ກຸ່ມລົດເບົາ, ສ່ວນລົດຂົນສົ່ງຍັງຈຳກັດ ແລະ ບໍ່ທັນມີລະບົບນິເວດຮັບຮອງ, ຂາດຊ່າງສ້ອມແປງຊ່ຽວຊານ, ອາໄຫຼ່ຕ້ອງນຳເຂົ້າ 100%, ແລະ ຍັງບໍ່ມີລະບົບນໍາເອົາແບັດເຕີຣີມາໃຊ້ຄືນໄດ້; ດ້ານໂຄງລ່າງສະຖານີສາກຍັງມີໜ້ອຍ (200 ກວ່າແຫ່ງ) ແລະ ສ່ວນໃຫຍ່ຢູ່ພຽງນະຄອນຫຼວງວຽງຈັນ, ຫົວສາກບໍ່ເປັນເອກະພາບ (GB/T ປົນ CCS2), ບໍ່ມີຕູ້ສາກໄວສຳລັບລົດບັນທຸກໜັກ ແລະ ຕາຂ່າຍໄຟຟ້າທ້ອງຖິ່ນຍັງສ່ຽງກັບການໃຊ້ໄຟຫຼາຍບາດດຽວ; ສິ່ງທ້າທາຍໃໝ່ທີ່ກົດດັນການແຂ່ງຂັນຈາກລົດໄຮບຣິດທີ່ອາດເຮັດໃຫ້ຫຼຸດເປົ້າໝາຍ EV 100%, ຄວາມສ່ຽງຕູ້ສາກຫຼ້າສະໄໝຍ້ອນເຕັກໂນໂລຊີປ່ຽນໄວ ແລະ ແຮງກົດດັນເງິນຕາຕ່າງປະເທດໄຫຼອອກຈາກການເລັ່ງນຳເຂົ້າລົດໃໝ່.

ເພື່ອບັນລຸເປົ້າໝາຍ 30% ໃນປີ 2030 (ຄາດຄະເນລົດ EV 4 ລໍ້ ປະມານ 222.784 ຄັນ ແລະ ສະຖານີສາກສາທາລະນະ 1.307 ແຫ່ງ), ກະຊວງ ອຄ ໄດ້ສັງລວມທິດທາງ ແລະ ມາດຕະການແກ້ໄຂເປັນຕົ້ນການສົ່ງເສີມດ້ານໂຄງສ້າງລາຄາໄຟຟ້າ ແລະ ສະຖານີສາກ: ລັດວິສາຫະກິດໄຟຟ້າລາວ ໄດ້ສຶກສາຫຼຸດລາຄາໄຟຟ້າສະເລ່ຍ 10% ຈາກລາຄາທຸລະກິດປົກກະຕິສຳລັບສະຖານີສາກ, ພ້ອມທັງກຳນົດໂຄງສ້າງລາຄາໄຟຟ້າຕາມຊ່ວງເວລາ ໂດຍກຳນົດຊ່ວງລາຄາສະໜັບສະໜູນຖືກກວ່າປົກກະຕິໃນຊ່ວງຄົນໃຊ້ໄຟຟ້າບໍ່ຫຼາຍ ເພື່ອຊຸກຍູ້ໃຫ້ປະຊາຊົນໄປສາກຢູ່ສະຖານີ, ຊ່ວຍຫຼຸດຜ່ອນການໂຫຼດກະແສໄຟຟ້າແຮງດັນຕໍ່າຕາມຄົວເຮືອນ; ການຊຸກຍູ້ສິນເຊື່ອເພື່ອໃຫ້ທະນາຄານທຸລະກິດປ່ອຍສິນເຊື່ອຊື້ລົດ EV ດ້ວຍດອກເບ້ຍຜ່ອນຜັນ ແລະ ຂະຫຍາຍໄລຍະເວລາຜ່ອນຊຳລະ; ເລັ່ງຫັນປ່ຽນລົດບໍລິຫານລັດ ແລະ ລົດປະຈໍາຕຳແໜ່ງທີ່ຈັດຊື້ໃໝ່ໃຫ້ເປັນລົດໄຟຟ້າ 100%, ພ້ອມທັງສົ່ງເສີມໃຫ້ບໍລິສັດຂົນສົ່ງສິນຄ້າ ແລະ ໂດຍສານຫັນມານຳໃຊ້ລົດໄຟຟ້າໃຫ້ກວມ 10% ຂຶ້ນໄປ; ກະຊວງສຶກສາທິການ ແລະ ກິລາ ໄດ້ຮັບຮອງຫຼັກສູດວິຊາຊີບສ້ອມແປງລົດໄຟຟ້າ ແລະ ສ້າງສູນຝຶກອົບຮົມເຕັກນິກ EV ຂຶ້ນສະເພາະເພື່ອຮອງຮັບຕະຫຼາດແຮງງານ ແລະ ສູນສ້ອມແປງໃນໄລຍະຍາວ.

ຂ່າວ: ກິດຕາ; ພາບ: ອ່າຍຄຳ

KPL