ຂປລ. ເພື່ອການພັດທະນາສີຂຽວໃນ ສປປ ລາວ” ຫລື GAMCIL ໃນວັນທີ 2 ຕຸລາ 2026 ໂດຍມີຈຸດປະສົງຍ້ອງຍໍ ແລະ ເຊີດຊູຜົນງານຂອງນັກຂ່າວ ລວມເຖິງຜູ້ຜະລິດເນື້ອໃນສື່ອອນລາຍທີ່ມີຜົນງານການລາຍງານກ່ຽວກັບບັນຫາສີຂຽວ ແລະ ການພັດທະນາທີ່ຍືນຍົງ ໂດຍມີ ທ່ານ ວັນສີ ກົວມົວ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ມີທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ທ່ານ ນາງ ແກ້ວອຳພອນ ສຸວັນນະພູມ ຜູ້ອຳນວຍການອົງການ CARE ສາກົນ ປະຈຳ ສປປ ລາວ ແລະ ທ່ານ ມາກ ກາລາເຮີ ເອກອັກຄະລັດຖະທູດສະຫະພາບເອີຣົບປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ. 

    ການແຂ່ງຂັນຂຽນຂ່າວປະຈຳປີ 2026 ຈັດຂຶ້ນໃນຮູບແບບຜົນງານຂ່າວວິດີໂອ ແລະ ຂ່າວໂປສເຕີ ໂດຍແບ່ງຜູ້ເຂົ້າຮ່ວມເປັນ 2 ກຸ່ມຄື: ກຸ່ມນັກຂ່າວພາກລັດ ແລະ ກຸ່ມຜູ້ນໍາໃຊ້ສື່ອອນລາຍ ລວມທັງຕົວແທນອົງການຈັດຕັ້ງມະຫາຊົນ ແລະ ອົງການຈັດຕ້ັງທາງສັງຄົມ. ສຳລັບຜົນການແຂ່ງຂັນ, ປະເພດຂ່າວວິດີໂອກຸ່ມນັກຂ່າວພາກລັດ ລາງວັນຊະນະເລີດແມ່ນທ່ານ ຫັດສະດີ ສຸດດາວົງ ຈາກວິທະຍຸ-ໂທລະພາບ ແຂວງອັດຕະປື, ຮອງຊະນະເລີດ ທ່ານ ທອງດຳ ວົງວຽງໄຊ, ທ່ານ ນາງ ແສງພະຈັນ ວັນສະເຫລີມ ແລະ ທ່ານ ອ່ອນ ມະນີສອນ ຈາກຄະນະໂຄສະນາອົບຮົມແຂວງສາລະວັນໃນນາມທີມ.

     ປະເພດຂ່າວໂປສເຕີກຸ່ມນັກຂ່າວພາກລັດ ລາງວັນຊະນະເລີດ ແມ່ນທ່ານ ນາງ ວັນດາພອນ ຊື່ນພັນ ຈາກຄະນະໂຄສະນາອົບຮົມແຂວງ ຈຳປາສັກ (ໂທລະພາບແຂວງ), ຮອງຊະນະເລີດ ທ່ານ ນາງ ທອງໃສ ແກ້ວບົວລະພາ ຈາກມະຫາວິທະຍາໄລສຸພານຸວົງ ແລະ ສະຖານີວິທະຍຸ ແຂວງຄຳມ່ວນ.

      ສ່ວນກຸ່ມຜູ້ນຳໃຊ້ສື່ອອນລາຍ ແລະ ອົງການຈັດຕັ້ງທາງສັງຄົມ ປະເພດຂ່າວວິດີໂອ ລາງວັນຊະນະເລີດ ທ່ານ ຈັນທະວີສຸກ ພອນມະນີ ຈາກມະຫາວິທະຍາໄລແຫ່ງຊາດ, ຮອງຊະນະເລີດ ທ່ານ ໄຊຊະນະ ພັນແພງດີ ຈາກສະຖາບັນພາສາຕ່າງປະເທດ Logos ແລະ ລາງວັນຊົມເຊີຍອີກຈຳນວນໜຶ່ງ.

     ສຳລັບປະເພດຂ່າວໂປສເຕີ ໃນກຸ່ມຜູ້ນໍາໃຊ້ສື່ອອນລາຍ ແລະ ອົງການຈັດຕັ້ງທາງສັງຄົມລາງວັນຊະນະເລີດແມ່ນທ່ານ ເພັດລະຄອນ ໜ່ໍບຸບຜາສະຫວັນ ຈາກມະຫາວິທະຍາໄລສະຫວັນນະເຂດ, ຮອງຊະນະເລີດທ່ານ ພຸດທະວີ ໄຊຍະສອນ ຈາກໂຄງການ ProFEB ແລະ ລາງວັນຊົມເຊີຍທ່ານ ສຸລິໂຍ ເມກສຸວັນ ຈາກວິສາຫະກິດເພ່ືອສັງຄົມພັນຖິ່ນ.

    ການຈັດກິດຈະກໍາຄັ້ງນີ້, ນອກຈາກເປັນການຍ້ອງຍໍຜົນງານຂອງນັກຂ່າວ ແລະ ຜູ້ຜະລິດເນື້ອໃນສ່ືມວນຊົນແລ້ວຍັງເປັນກົນໄກໜຶ່ງ ໃນການສົ່ງເສີມການລາຍງານຂ່າວກ່ຽວກັບບັນຫາສີຂຽວໃນ ສປປ ລາວ ໃຫ້ມີຄຸນນະພາບ, ຮອບດ້ານ ແລະ ເປັນມືອາຊີບຫລາຍຂຶ້ນ, ພ້ອມທັງຊຸກຍູ້ໃຫ້ສື່ມວນຊົນ ແລະ ຜູ້ນຳໃຊ້ສື່ອອນລາຍມີສ່ວນຮ່ວມໃນການເຜີຍແຜ່ຂ່າວສານ ແລະ ສ້າງຄວາມຮັບຮູ້ສັງຄົມກ່ຽວກັບການອະນຸລັກສ່ິງແວດລ້ອມ, ການພັດທະນາສີຂຽວ ແລະ ການພັດທະນາແບບຍືນຍົງ.

   ໂຄງການ GAMCIL ໄດ້ສົ່ງເສີມການມີສ່ວນຮ່ວມຂອງນັກຂ່າວລາວ, ອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ ແລະ ຜູ້ນຳໃຊ້ສື່ອອນລາຍຈາກທ່ົວປະເທດໃນການຜະລິດ ແລະ ລາຍງານເນື້ອໃນຂ່າວສານກ່ຽວກັບ “ບັນຫາສີຂຽວ”. ໂຄງການຍັງໄດ້ຍົກລະດັບທັກສະວິຊາຊີບ, ຄວາມສາມາດດ້ານດີຈິຕອນ, ການນຳໃຊ້ເຄື່ອງມື ແລະ ເຕັກໂນໂລຊີໃໝ່ຕະຫລອດຮອດການຜະລິດເນື້ອໃນສື່ມວນຊົນ ເພື່ອສົ່ງເສີມການລາຍງານຂ່າວຢ່າງຮັບຜິດຊອບ ແລະ ເປັນມືອາຊີບ.

          ຂ່າວ: ໄມຕຣີ

KPL