ຂປລ
ກອງປະຊຸມປະຈຳປີ ຄັ້ງທີ 11 ຂອງຄະນະກຳມະການ ບໍລິຫານທະນາຄານລົງທຶນ ພື້ນຖານໂຄງລ່າງ ອາຊີ ຫລື AIIB ໄດ້ຈັດຂຶ້ນ ເມື່ອບໍ່ດົນມານີ້ ຢູ່ນະຄອນຫລວງໂດຮາ ປະເທດກາຕາ.
ຂປລ.ວິທະຍຸ ໂທລະພາບ ສູນກາງຈີນ, ກອງປະຊຸມປະຈຳປີ ຄັ້ງທີ 11 ຂອງຄະນະກຳມະການ ບໍລິຫານທະນາຄານລົງທຶນ ພື້ນຖານໂຄງລ່າງ ອາຊີ ຫລື AIIB ໄດ້ຈັດຂຶ້ນ ເມື່ອບໍ່ດົນມານີ້ ຢູ່ນະຄອນຫລວງໂດຮາ ປະເທດກາຕາ. ໂດຍມີ ສະມາຊິກ ຄະນະກຳມະການບໍລິຫານ, ເຈົ້າໜ້າທີ່ອາວຸໂສ ຂອງລັດຖະບານ ບັນດາປະເທດ, ຄູ່ຮ່ວມມື ແລະ ຜູ້ຕາງໜ້າອົງການຈັດຕັ້ງທີ່ກ່ຽວຂ້ອງ ໄດ້ຮ່ວມກັນປຶກສາຫາລືກ່ຽວກັບ ວາລະຕ່າງໆ ເຊິ່ງລວມທັງ ການພັດທະນາ ແລະ ການຮ່ວມມືດ້ານພື້ນຖານໂຄງລ່າງ ແບບຍືນຍົງ ແລະ ອື່ນໆ. ທ່ານ ນາງ ໂຈ່ວເຈ່ຍຢີ ຜູ້ວ່າການທະນາຄານAIIB ໄດ້ປະກອບຄຳເຫັນ ໃນພິທີເປີດກອງປະຊຸມວ່າ: ພາຍໃຕ້ ສະພາບການ ທີ່ຄວາມບໍ່ແນ່ນອນ ໃນທົ່ວໂລກເພີ່ມຂຶ້ນ, ພື້ນຖານໂຄງລ່າງ ຍັງຄົງເປັນສິ່ງ ຄ້ຳປະກັນ ອັນສຳຄັນ ໃນການຊຸກຍູ້ ການພັດທະນາ, ເພີ່ມທະວີຄວາມໝັ້ນໜຽວ ແລະ ສ້າງໂອກາດ. ທະນາຄານ AIIB ມີແຜນວ່າ ຮອດປີ 2030 ຈະເພີ່ມການອະນຸມັດເງິນກູ້ ປະຈຳປີຂຶ້ນ ໜຶ່ງເທົ່າ ເປັນປະມານ 20 ຕື້ໂດລາສະຫະລັດ, ໂດຍສຸມໃສ່ການສະໜັບສະໜູນ ໂຄງການພື້ນຖານໂຄງລ່າງ ໃນຂົງເຂດຕ່າງໆ ເຊັ່ນ: ພະລັງງານໝູນວຽນ, ການຫັນເປັນດິຈິຕອນ, ການເຊື່ອມໂຍງ ເຊື່ອມຈອດກັນ ໃນພາກພື້ນ, ການອະນຸລັກ ທຳມະຊາດ, ເສີມສ້າງ ຄວາມຜາສຸກໃຫ້ປະຊາຊົນ ແລະ ອື່ນໆ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
