ຂປລ
ສູນວັດທະນະທຳຈີນ ປະຈຳລາວ ຮ່ວມກັບ ກະຊວງວັດທະນະທຳ ແລະ ການທ່ອງທ່ຽວ ແລະ ສະພາການຄ້າຈີນ ປະຈຳລາວ ຈັດການແຂ່ງຂັນຄົນລາວຮ້ອງເພງຈີນ ຄັ້ງທີ 5 ພາຍໃຕ້ຫົວຂໍ້ “ສຽງເພງແຫ່ງແມ່ນ້ຳຂອງ-ນ້ຳລ້ານຊ້າງ”
ໃນວັນທີ 25 ກັນຍາ 2026 ຜ່ານມາ ຢູ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ນາງ ວັນສີ ສຸກຈະເລີນ ຮອງຫົວໜ້າກົມວັດທະນະທຳ ແລະ ສິລະປະການສະແດງ ກະຊວງວັດທະນະທຳ ແລະ ການທ່ອງທ່ຽວ, ທ່ານ ເຕິ້ງລີ້ສຽງ ທີ່ປຶກສາພະແນກຮ່ວມມືແລກປ່ຽນ ສະຖານທູດຈີນ ປະຈຳລາວ, ທ່ານ ຫຼົວ ເວີ້ຍຈ້ຽນ ຫົວໜ້າສູນວັດທະນະທຳຈີນ ປະຈຳລາວ, ມີບັນດາຫົວໜ້າ, ຮອງຫົວໜ້າກົມອ້ອມຂ້າງກະຊວງວັດທະນະທຳ ແລະ ການທ່ອງທ່ຽວ, ແຂກຮັບເຊີນທັງສອງຝ່າຍ ລາວ ແລະ ຈີນ ເຂົ້າຮ່ວມ.
ທ່ານ ນາງ ວັນສີ ສຸກຈະເລີນ ໄດ້ກ່າວວ່າ: ລາວ ແລະ ຈີນ ເປັນປະເທດຄູ່ຮ່ວມມືຍຸດທະສາດຮອບດ້ານ, ບ້ານໃກ້ເຮືອນຄຽງທີ່ມີສາຍພູ ແລະ ແມ່ນ້ຳຕິດຈອດກັນ, ປະຊາຊົນສອງຊາດໄດ້ມີການໄປມາຫາສູ່ກັນມາແຕ່ບູຮານນະການ, ການຈັດງານແຂ່ງຂັນຄົນລາວຮ້ອງເພງຈີນຄັ້ງນີ້ ເປັນເວທີໃນການກ້າສະແດງອອກໃຫ້ແກ່ຄົນລາວທີ່ມັກຮັກໃນການຮ້ອງເພງຈີນ, ທັງເປັນການຈັດຕັ້ງຜັນຂະຫຍາຍເນື້ອໃນຂອງແຜນແມ່ບົດການເປັນຄູ່ຮ່ວມຊາຕາກຳ ລາວ-ຈີນ, ການປະກອບສ່ວນໃນການສະເຫຼີມສະຫຼອງວັນຄົບຮອບ 65 ປີ ຂອງການສ້າງຕັ້ງສາຍພົວພັນການທູດ ລາວ-ຈີນ ແລະ ປີມິດຕະພາບ ລາວ-ຈີນ 2026 ໃຫ້ເຕັມໄປດ້ວຍບັນຍາກາດແຫ່ງຄວາມອົບອຸ່ນ ແລະ ຟົດຟື້ນຍິ່ງຂຶ້ນ ແລະ ກິດຈະກຳຄັ້ງນີ້ ບໍ່ພຽງແຕ່ເປັນການແລກປ່ຽນວັດທະນະທຳເທົ່ານັ້ນ, ແຕ່ຍັງເປັນການສະທ້ອນໃຫ້ເຫັນເຖິງສາຍພົວພັນອັນແໜ້ນແຟ້ນ ແລະ ສະທ້ອນໃຫ້ເຫັນເຖິງໄມຕີຈິດມິດຕະພາບຂອງການເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ແລະ ການເປັນຄູ່ຮ່ວມຊາຕາກຳ ຈີນ-ລາວ, ລາວ-ຈີນ ໂດຍຜ່ານກິດຈະກຳແຂ່ງຂັນຮ້ອງເພງດັ່ງກ່າວ. ຄຽງຄູ່ກັນ, ການຈັດງານແຂ່ງຂັນຮ້ອງເພງ ຍັງເປັນມື້ກົງກັບວັນສະເຫຼີມສະຫຼອງບຸນໄຫວ້ພະຈັນ ທີ່ເປັນບຸນປາງໃຫຍ່ທີ່ມີຄວາມໝາຍສຳຄັນທາງດ້ານວັດທະນະທຳ ແລະ ປະຫວັດສາດຂອງຈີນ ອີກດ້ວຍ.
ການແຂ່ງຂັນຄົນລາວຮ້ອງເພງຈີນຄັ້ງນີ້, ບັນດາຜູ້ເຂົ້າຮ່ວມໄດ້ຮັບຊົມການສະແດງສິລະປະວັດທະນະທຳ ລາວ ແລະ ຈີນ, ການແຂ່ງຂັນຮ້ອງເພງຢ່າງຄຶກຄື້ນມ່ວນຊື່ນ ຊຶ່ງໃນຮອບຊີງຊະນະເລີດ ມີຜູ້ແຂ່ງຂັນເຂົ້າຮ່ວມທັງໝົດ 12 ຄົນ ແລະ ຜູ້ທີ່ໄດ້ຮັບລາງວັນຊະນະເລີດ ແມ່ນໝາຍເລກ A8 ນາງ ວຽງສະໄໝ ຢ່າຢົງຊື, ຮອງຊະນະເລີດ ໝາຍເລກ A06 ນາງ ພັດທະນາ ພິມກັນຍາ ແລະ ໝາຍເລກ A10 ທ້າວ ພົງສະຫວັນ ແກ່ນຈັນ.
KPL
