ຂປລ
ທາງລົດໄຟ ລາວ-ຈີນ ເປີດແລ່ນຂະບວນລົດໄຟຖ້ຽວເຊົ້າ (C95) ຄັ້ງທຳອິດ ຈາກສະຖານີບໍ່ເຕ່ນ-ນະຄອນຫຼວງວຽງຈັນ ຢ່າງເປັນທາງການ ໃນວັນທີ 28 ກັນຍາ 2026 ນີ້.
ຂະບວນລົດໄຟຖ້ຽວ C95 ຈະອອກເດີນທາງຈາກສະຖານີບໍ່ເຕ່ນ ໃນເວລາ 08:00 ໂມງ ແລະ ຮອດສະຖານີນະຄອນຫຼວງວຽງຈັນ ໃນເວລາ 11:47 ໂມງ, ຫຼັງຈາກນັ້ນ ຂະບວນລົດໄຟຖ້ຽວ C96 ຈະອອກເດີນທາງກັບຄືນຈາກສະຖານີນreportນະຄອນຫຼວງວຽງຈັນ ເວລາ 14:05 ໂມງ ແລະ ຮອດສະຖານີບໍ່ເຕ່ນ ໃນເວລາ 18:32 ໂມງ ຂອງມື້ດຽວກັນ. ຂະບວນລົດໄຟຖ້ຽວນີ້ ຈະອຳນວຍຄວາມສະດວກຢ່າງຫຼວງຫຼາຍ ໃຫ້ແກ່ປະຊາຊົນທາງແຂວງພາກເໜືອຂອງລາວ ໃນການເດີນທາງໄປມາປະຈຳ, ເດີນທາງດ້ານທຸລະກິດ ຫຼື ຢ້ຽມຢາມພີ່ນ້ອງ ແລະ ອື່ນໆ ຊຶ່ງປະຊາຊົນແຂວງພາກເໜືອສາມາດນັ່ງລົດໄຟໄປ-ກັບ ນະຄອນຫຼວງວຽງຈັນ ແລະ ບໍ່ເຕ່ນ ພາຍໃນມື້ດຽວໄດ້.
ຂະບວນລົດໄຟຖ້ຽວໄປ-ກັບ C95/C96 ຈະເປີດແລ່ນທຸກວັນສຸກ, ວັນເສົາ, ວັນອາທິດ ແລະ ວັນຈັນ. ຂະບວນລົດໄຟຖ້ຽວນີ້ ຈະຈອດ 6 ສະຖານີ ຄື: ສະຖານີບໍ່ເຕ່ນ, ສະຖານີນາເຕີຍ, ສະຖານີເມືອງໄຊ, ສະຖານີຫຼວງພະບາງ, ສະຖານີວັງວຽງ ແລະ ນະຄອນຫຼວງວຽງຈັນ.
ການເປີດແລ່ນຂະບວນລົດໄຟຖ້ຽວ C95/C96 ຈະຊ່ວຍຍົກລະດັບເຄືອຂ່າຍການຂົນສົ່ງຜູ້ໂດຍສານຂອງທາງລົດໄຟ ລາວ-ຈີນ ໃຫ້ສົມບູນແບບຍິ່ງຂຶ້ນ, ພ້ອມທັງອຳນວຍຄວາມສະດວກໃຫ້ປະຊາຊົນລາວບັນດາເຜົ່າ ໃນການເລືອກເວລາເດີນທາງທີ່ຫຼາຍຂຶ້ນ, ຊ່ວຍສົ່ງເສີມການພັດທະນາອຸດສາຫະກຳການທ່ອງທ່ຽວຕາມແລວທາງລົດໄຟ ລາວ-ຈີນ, ຊຸກຍູ້ການກໍ່ສ້າງໂຄງການເສດຖະກິດລະຫວ່າງ ລາວ-ຈີນ ແລະ ເປັນການຮ່ວມມືກັນສ້າງໂຄງການຂອງ “ໜຶ່ງແລວ ໜຶ່ງເສັ້ນທາງ” ໃຫ້ມີລະບົບພື້ນຖານການຂົນສົ່ງທີ່ໝັ້ນຄົງຍິ່ງຂຶ້ນ.
ເພື່ອເຮັດໃຫ້ການເປີດດຳເນີນງານຂະບວນລົດຖ້ຽວ C95/C96 ດຳເນີນໄປຢ່າງໂລ່ງລ່ຽນ, ບໍລິສັດ ທາງລົດໄຟ ລາວ-ຈີນ ໄດ້ກຽມພ້ອມປະສານງານດ້ານການຂົນສົ່ງ, ປັບປຸງ ແລະ ຈັດຕັ້ງການຂົນສົ່ງໃຫ້ດີຂຶ້ນ, ພ້ອມທັງເນັ້ນໜັກໃນການຖືເອົາຄວາມປອດໄພເປັນຫຼັກ, ການເບິ່ງແຍງຜູ້ໂດຍສານຂຶ້ນ-ລົງລົດໄຟ ແລະ ອື່ນໆ.
ການເປີດດຳເນີນງານດັ່ງກ່າວ ແມ່ນການຈັດຕັ້ງປະຕິບັດຂໍ້ຕົກລົງຮ່ວມຂອງຜູ້ນຳສອງປະເທດ ລາວ-ຈີນ, ຊຸກຍູ້ການສ້າງຄູ່ຮ່ວມຊາຕາກຳ ລາວ-ຈີນ ຊຶ່ງໄດ້ປ່ຽນມິດຕະພາບລະຫວ່າງສອງຊາດ ລາວ-ຈີນ ຈາກຄວາມໄວ້ເນື້ອເຊື່ອໃຈລະຫວ່າງຜູ້ນຳຂັ້ນສູງ ໃຫ້ກາຍເປັນຜົນປະໂຫຍດຮ່ວມກັນທີ່ປະຊາຊົນບັນດາເຜົ່າສາມາດຈັບຕ້ອງໄດ້.
ຂ່າວ-ພາບ: ທະນູທອງ
KPL
