ຂປລ
ໃນໂອກາດເຂົ້າຮ່ວມ ກອງປະຊຸມສຸດຍອດ ອົງການຮ່ວມມື ຊຽງໄຮ້ປີ 2026, ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະກັບ ທ່ານ ວະລາດີເມຍ ປູຕິນ ປະທານາທິບໍດີ ຣັດເຊຍ ໃນວັນທີ 31 ສິງຫານີ້.
ຂປລ.ວິທະຍຸ ໂທລະພາບ ສູນກາງຈີນ, ໃນໂອກາດເຂົ້າຮ່ວມ ກອງປະຊຸມສຸດຍອດ ອົງການຮ່ວມມື ຊຽງໄຮ້ປີ 2026, ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະກັບ ທ່ານ ວະລາດີເມຍ ປູຕິນ ປະທານາທິບໍດີ ຣັດເຊຍ ໃນວັນທີ 31 ສິງຫານີ້.ໃນໂອກາດນີ້ ທ່ານ ສີຈິ້ນຜິງ ໄດ້ຊີ້ອອກວ່າ: ປັດຈຸບັນ, ສະພາບການປ່ຽນແປງຂອງໂລກ ທີ່ບໍ່ເຄີຍມີໃນຮອບຮ້ອຍປີຜ່ານມານີ້ ພວມເລັ່ງໄວຂຶ້ນ, ແຕ່ຄວາມປາດຖະໜາ ຂອງປະຊາຊົນທົ່ວໂລກ ໃນການສະແຫວງຫາ ສັນຕິພາບ, ການພັດທະນາ, ການຮ່ວມມື ແລະ ການໄດ້ຮັບຜົນປະໂຫຍດຮ່ວມກັນ ບໍ່ປ່ຽນແປງ. ອົງການຮ່ວມມື ຊຽງໄຮ້ ມີພາລະກິດສຳຄັນ ໃນການຮັກສາສະຖຽນລະພາບ ແລະ ຊຸກຍູ້ການພັດທະນາ ຂອງພາກພື້ນ. ສປ ຈີນ ຍິນດີຮ່ວມກັບ ທຸກຝ່າຍທີ່ລວມທັງ ຣັດເຊຍ ປຶກສາຫາລື ກ່ຽວກັບ ແຜນການພັດທະນາ ຂອງອົງ ການຮ່ວມມື ຊຽງໄຮ້ ເພື່ອຊຸກຍູ້ກຳລັງແຮງ ໃນການສ້າງໂລກ ທີ່ມີຫລາຍຂົ້ວ ຢ່າງສະເໝີພາບ ແລະ ເປັນລະບຽບຮຽບຮ້ອຍ.
ທ່ານ ປູຕິນ ກ່າວວ່າ: ພາຍໃຕ້ ຄວາມພະຍາຍາມຮ່ວມກັນ ຂອງທຸກຝ່າຍ, ອົງການຮ່ວມມືຊຽງໄຮ້ ໄດ້ກາຍເປັນເວທີຮ່ວມມືພາກພື້ນ ທີ່ມີອິດທິພົນສຳຄັນໃນສາກົນ, ຣັດເຊຍ ແລະ ສປ ຈີນ ຄວນເພີ່ມທະວີ ຄວາມສາມັກຄີ ແລະ ການຮ່ວມມື ພາຍໃນອົງການຢ່າງຕໍ່ເນື່ອງ ດ້ວຍການເສີມຂະຫຍາຍ ບົດບາດການນຳພາ. ຣັດເຊຍ ຍິນດີເພີ່ມທະວີການປະສານງານ ແລະ ຮ່ວມມືກັບ ສປ ຈີນ ເພື່ອພ້ອມກັນ ປົກປັກຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງໂລກ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
