ຂປລ. ເມື່ອເວົ້າເຖິງ "ສິ້ນໄໝມ້ອນຊຳເໜືອ" ຫລາຍຄົນຕ້ອງນຶກເຖິງຄວາມປານີດ, ລວດລາຍອັນສວຍ​ງາມ ແລະ ເອກະລັກອັນໂດດເດັ່ນ ຊຶ່ງ​ສ່ອງ​ແສງ​ໃຫ້​ເຫັນ​ເຖິງ​ສິລະ​ປະ, ວັດທະນະທໍາ, ພູມປັນຍາ ​ແລະ ວິຖີຊີວິດ​ຂອງ​ແມ່ຍິງ​ລາວ ທີ່ສືບທອດກັນມາແຕ່ດົນນານຈົນ​ກາຍ​ເປັນ​ວັດທະນະ​ທໍາ​ການ​ນຸ່ງ​ຖື​ ທີ່​ມີ​ຄວາມ​ໂດດ​ເດັ່ນ​ໃນ​ສາຍຕາຂອງ​ຊາວ​ໂລກ ​ໂດຍ​ສະ​ເພາະ​ແມ່ນ​ການ​ນຸ່ງ​ສິ້ນ,​ ເກົ້າຜົມ, ​ບ່ຽງ​ແພ. ສະນັ້ນ, ພູມ​ປັນຍາ​ ທາງ​ວັດທະນະ​ທໍາ​ເຫລົ່າ​ນີ້ມັນ​ໄດ້​ກາຍ​ເປັນ​ອາຊີບ​ທີ່​ໝັ້ນຄົງ​ໃຫ້​ປະຊາຊົນ.​ ເໝືອນດັ່ງທ່ານ ນາງ ສຸນິຕາ ​ເຈົ້າ​ຂອງ​ຮ້ານ ສຸນິຕາ ຜ້າໄໝ ຜູ້ທີ່ເຕີບໃຫຍ່ມາໃນຄອບຄົວຫັດຖະກຳໄໝມ້ອນຊໍາ​ເໜືອ ຫລາຍກວ່າ 30 ປີ.

ທ່ານ ນາງ ສຸນິຕາ  ​ເວົ້າ​ສູ່ຟັງໃນໂອກາດກອງປະຊຸມວຽກງານສື່ມວນຊົນ ຄັ້ງທີ I ໃນ​ເດືອນ​ຜ່ານ​ມາ ທີ່ຫໍປະຊຸມແຫ່ງຊາດວ່າ:  ຕົນ​ເອງ​ແມ່ນ ຄົນໜຶ່ງທີ່​ໄດ້ກິ້​ງ​ເກືອກ​ລີເລືອ​ຢູ່​ກັບຫັດຖະ​ກໍາ​ຕໍ່າ​ແຜ່ນ​ນີ້ມາ​ເປັນ​ເວລາ 30 ກວ່າ​ປີ​ ຈຶ່ງ​ມີ​ຄວາມ​ຮູ້, ປະສົບ​ການ​​ກ່ຽວກັບ​ອາຊີບ​ນີ້ຫລາຍ​ສົມຄວນ  ຈຶ່ງ​ສືບຕໍ່​ເຮັດ​ສິ່ງ​ທີ່​ມັກ ​​ ​ເພື່ອ​ສ້າງ​ເສດຖະກິດ​ຄອບຄົວ ນັ້ນ​ກໍ​ຄື​ການ​ຂາຍ​ສິ້ນ​ໄໝ ຊໍາ​ເໜືອ   ​​ເປັນ​ເວລາ 15 ປີ. ​ໂດຍ​ສິ້ນ​ທີ່​ນໍາ​ມາ​ຂາຍ​ແມ່ນ​ຜະລິດເອງ ​ແລະ ຮັບ​ຊື້​ຈາກ​ປະຊາຊົນ ຫລາຍກວ່າ 20 ຄອບຄົວ, ໂດຍທາງຮ້ານຈະລົງທຶນຊື້​ໄໝ​ໃຫ້ ແລະ ໃຫ້ຊາວບ້ານເປັນຜູ້ຕ່ຳ ​ແລ້ວ​ກໍ​ໄປ​ເກັບ​ຊື້ ​ໃນ​ລາຄາ  500.000 ກີບ ຫາ 5.000.000 ກີບຕໍ່ຜືນ ຂຶ້ນກັບຄວາມຍາກງ່າຍຂອງລາຍ  ​ຊຶ່ງສະ​ເລ່ຍ​ແລ້ວ ​ຄອບຄົວໜຶ່ງຈະ​ສາດ​ສ້າງ​ລາຍ​ຮັບ ຈາກ​ການ​ຂາຍ​ສິ້ນ​ປະມານ 10.000.000-20.000.000 ກີບຕໍ່​ເດືອນ ​ຊຶ່ງຈຸດ​ນີ້ ກໍ​ເປັນ​ສິ່ງ​ທີ່​ດີ ​ເພາະນອກຈາກ​ຈະ​ສ້າງລາ​ຍຮັບ​ໃຫ້ຄອບຄົວ​ເປັນ​ກອບເປັນ​ກໍາ​ແລ້ວ ຍັງ​ສ້າງ​ອາຊີບ, ສ້າ​ງລາຍ​ຮັບ​ທີ່ຄວາມໝັ້ນຄົງ​ໃຫ້​ປະຊາຊົນ​ອີກ​ດ້ວຍ.

 ສໍາລັບລາຍ​ເອກະລັກສິ້ນ​ຂອງ​ຮ້ານ​ ແມ່ນ​ລວດລາຍດັ້ງເດີມ ເຊັ່ນ: ລາຍນາກ ແລະ ລາຍນອນ ຊຶ່ງເປັນສັນຍະລັກຂອງຄວາມງາມອັນມີຄຸນຄ່າ ຂອງ​ແມ່ຍິງ​ລາວ ​​ເນື່ອງ​ຈາກ​ວ່າການ​ຜະລິດ ສອງ​ລາຍ​ນີ້ ມັນ​ຕ້ອງ​​ໃຊ້ຄ​ວາ​ມພະຍາຍາມ, ຄວາມ​ອົດ​ທົນ​​ເພາະ​ເປັນ​ລາຍ​ທີ່​ຊັບຊ້ອນ​ແຕ່​ສວຍ​ງາມ ຈົນ​ເຮັດໃຫ້ ​ລາຍ​ນາກ  ​ໄດ້​ຖືກ​ຮອງ​ຮັບ​ເປັນ​ມໍລະດົກ​ໂລກ​ ທີ່ບໍ່ສາມາດຈັບຕ້ອງໄດ້ ຈາກອົງການ ອຸຍແນັສໂກ (UNESCO) .ສະ​ນັ້ນ, ຈຶ່ງ​ເວົ້າ​ໄດ້​ວ່າການນຸ່ງສິ້ນ, ບ່ຽງແພ ຂອງແມ່ຍິງລາວ ບໍ່ພຽງແຕ່ເປັນການແຕ່ງກາຍໄປການ ຫລື ໄປງານປະເພນີເທົ່ານັ້ນ, ແຕ່ແມ່ນການເຊີດຊູວັດທະນະທຳ ແລະ ປະກາດຄວາມເປັນລາວໃຫ້ສາກົນໄດ້ຮັບຮູ້. ສະ​ນັ້ນ, ຈຶ່ງ​ຢາກ ໃຫ້ທຸກພາກສ່ວນຮ່ວມກັນປົກປັກ​ຮັກສາ ພູມ​ປັນຍາ​ທີ່​ມີ​ຄຸນ​ຄ່າ​ແບບ​ນີ້ ໃຫ້ຢູ່ຄູ່ກັບແມ່ຍິງລາວຕະຫລອດໄປ".

ທ່ານ ນາງ ສຸນິຕາ   ​ເວົ້າ​ເສີມ​ວ່າ:   ເຖິງຢ່າງໃດກໍຕາມ, ເພື່ອໃຫ້ທຸລະກິດຫັດຖະກໍາພື້ນເມືອງລາວນີ້ສາມາດເຕີບໃຫຍ່ ແລະ ຂະຫຍາຍຕົວຢ່າງແຂງແຮງ, ຝາກເຖິງພາກລັດ ແລະ ພາກສ່ວນກ່ຽວຂ້ອງໃຫ້ຊ່ວຍຊຸກຍູ້ໃນການຊອກຫາຕະຫລາດຮອງຮັບໃຫ້ກວ້າງຂວາງຕື່ມອີກ. ພ້ອມດຽວກັນນັ້ນ, ຍັງໄດ້ກ່າວສະແດງຄວາມຂອບໃຈ ແລະ ເປີດຮັບຄໍາຕໍານິຕິຊົມຈາກລູກຄ້າທຸກທ່ານ ເພື່ອນໍາມາປັບປຸງ ແລະ ພັດທະນາຄຸນນະພາບຜະລິດຕະພັນຜ້າໄໝລາວ ໃຫ້ມີຄວາມສະຫງ່າງາມໃນທຸກມຸມໂລກ ແລະ ຍືນຍົງຄູ່ກັບສັງຄົມລາວຕະຫລອດໄປ.

  ສໍາລັບ ທ່ານ​​ໃດ ຢາກ​ໄດ້​ສິ້ນ​ໄໝມ້ອນ​ງາມໆ ສາມາດ ມາ​ເບິ່ງ​ຢູ່ ໜ້າຮ້ານ ​ໄອ​ເຕັກຕຶກເກົ່າ (ຊັ້ນ 1)  ແລະ ຕຶກໃໝ່ (ໂຊນວາງສະແດງ) ຫລື ສັ່ງ​ຊື້ ​ໄດ້​ທີ່ Facebook Page: Sunita Silk ສຸນິຕາ ຜ້າໄໝ.

ໂດຍ: ມາລີດາ

KPL