ຂປລ
ທ່ານ ຊາເດີ ນູໂກໂຈເອວິກ ຈາປາໂຣຟ ປະທານາທິບໍດີກຽກກິດສະຖານ ແລະ ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະເຈລະຈາກັນ ຢູ່ພະລາຊະວັງຮາໂມນີ ທີ່ນະຄອນຫລວງ ບິສເກັກ ຂອງກຽກກິດສະຖານ.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 31 ສິງຫານີ້, ທ່ານ ຊາເດີ ນູໂກໂຈເອວິກ ຈາປາໂຣຟ ປະທານາທິບໍດີກຽກກິດສະຖານ ແລະ ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະເຈລະຈາກັນ ຢູ່ພະລາຊະວັງຮາໂມນີ ທີ່ນະຄອນຫລວງ ບິສເກັກ ຂອງກຽກກິດສະຖານ.
ທ່ານ ສີ ຈິ້ນຜິງ ກ່າວວ່າ: ຊຸມປີມໍ່ໆມານີ້, ພາຍໃຕ້ການຊີ້ນຳ ນຳພາຂອງພວກເຮົາ, ສາຍພົວພັນ ລະຫວ່າງ ສປ ຈີນ-ກຽກກິດສະຖານ ໄດ້ຮັບການພັດທະນາ ແບບກ້າວກະໂດດ, ການຮ່ວມມື ໃນຂົງເຂດຕ່າງໆ ໄດ້ຮັບໝາກຜົນທີ່ອຸດົມສົມບູນ, ມີຜົນດີຕໍ່ການພັດທະນາ ຂອງສອງປະເທດ ແລະ ນຳເອົາຜົນປະໂຫຍດຕົວຈິງ ມາໃຫ້ປະຊາຊົນ ສອງປະເທດ, ທັງໄດ້ຊຸກຍູ້ສັນຕິພາບ, ສະຖຽນລະພາບ ແລະ ຄວາມຈະເລີນ ຮຸ່ງເຮືອງໃນພາກພື້ນ. ຈີນຍິນດີຮ່ວມມືກັບ ກຽກກິດສະຖານ ເພື່ອເພີ່ມທະວີ ການເຊື່ອມຕໍ່ຍຸດທະສາດ ດ້ານການພັດທະນາ, ລົງເລິກການແລກປ່ຽນບົດຮຽນ ດ້ານການປົກຄອງປະເທດ ແລະ ການຄຸ້ມຄອງລັດ, ສ້າງໝາກຜົນດ້ານການຮ່ວມມື ອັນແທ້ຈິງທີ່ສາມາດສຳຜັດ ແລະ ເຂົ້າເຖິງໄດ້, ຊຸກຍູ້ໃຫ້ການສ້າງຄູ່ຮ່ວມຊາຕາກຳຈີນ-ກຽກກິດສະຖານ ເລິກເຊິ່ງກວ່າເກົ່າ ແລະ ເປັນຮູບປະທຳກວ່າເກົ່າ.
ທ່ານ ຊາເດີ ນູໂກໂຈເອວິກ ຈາປາໂຣຟ ກ່າວວ່າ: ຈີນ ເປັນບູລິມະສິດສຳຄັນດ້ານນະໂຍບາຍ ການຕ່າງປະເທດຂອງກຽກກິດສະຖານຢ່າງສະເໝີຕົ້ນ ສະເໝີປາຍ, ແມ່ນເພື່ອນມິດ ທີ່ໃກ້ຊິດທີ່ສຸດ ແລະ ຄູ່ຮ່ວມມືທີ່ໜ້າເຊື່ອຖື ທີ່ສຸດຂອງກຽກກິດສະຖານ. ກຽກກິດສະຖານຍຶດໝັ້ນໃນຫລັກການປະເທດຈີນດຽວ, ຍິນດີຮ່ວມກັບ ສປ ຈີນ ພັດທະນາສາຍພົວພັນ ໄມຕີຈິດມິດຕະພາບຖານບ້ານໃກ້ ເຮືອນຄຽງໃຫ້ເລິກເຊິ່ງ ບົນພື້ນຖານການເຄົາລົບນັບຖືເຊິ່ງກັນ ແລະ ກັນ, ສະເໝີພາບ ແລະ ຕ່າງຝ່າຍຕ່າງ ໄດ້ຮັບຜົນປະໂຫຍດ. ກຽກກິດສະຖານຍິນດີຕັ້ງໜ້າ ຊຸກຍູ້ການສ້າງເສັ້ນທາງລົດໄຟຈີນ-ກຽກກິດສະຖານ-ອຸດສະເບກິດສະຖານ ເພື່ອເຮັດໃຫ້້ເສັ້ນທາງລົດໄຟດັ່ງກ່າວ ກາຍເປັນເສັ້ນທາງສາຍໄໝເຫລັກແຫ່ງຍຸກໃໝ່ ແລະ ເປັນຂົວຕໍ່ອັນໃໝ່ຂອງສາຍພົວພັນມິດຕະພາບລະຫວ່າງ ກຽກກິດສະຖານ- ສປ ຈີນ. ໃນໂອກາດທີ່ ທ່ານ ສີ ຈິ້ນຜິງ ຢ້ຽມຢາມ ກຽກກິດສະຖານ ຄັ້ງນີ້, ທັງສອງຝ່າຍ ໄດ້ລົງນາມ ເອກະສານ ຮ່ວມມື 20 ກວ່າສະບັບ ໃນຂົງເຂດຕ່າງໆ ເຊັ່ນ: ວິທະຍາສາດເຕັກໂນໂລຊີ, ການສຶກສາ, ວັດທະນະທຳ, ສື່ມວນຊົນ ແລະ ຂົງເຂດອື່ນໆ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
