ຂປລ
ກອງປະຊຸມ ລະບົບນິເວດ ຫຸ່ນຍົນອັດສະລິຍະ ສູ່ລະດັບໂລກ ໄດ້ຈັດຂຶ້ນຢູ່ ນະຄອນຫລິວໂຈ່ວ ເຂດປົກຄອງຕົນເອງ ເຜົ່າຈວ້າງກວາງຊີ ຂອງ ສປ ຈີນ ເມື່ອບໍ່ດົນມານີ້ ໂດຍມີ ຜູ້ຊ່ຽວຊານ ແລະ ຜູ້ຕາງໜ້າດ້ານອຸດສາຫະກຳຫຸ່ນ ຍົນອັດສະລິຍະ ຈາກແຫ່ງຕ່າງໆຂອງ ສປ ຈີນ ລວມທັງ ແຂກຜູ້ມີກຽດ ຈາກປະເທດ ສະມາຊິກ ອາຊຽນ
ຂປລ.ວິທະຍຸ ໂທລະພາບ ສູນກາງຈີນ, ກອງປະຊຸມ ລະບົບນິເວດ ຫຸ່ນຍົນອັດສະລິຍະ ສູ່ລະດັບໂລກ ໄດ້ຈັດຂຶ້ນຢູ່ ນະຄອນຫລິວໂຈ່ວ ເຂດປົກຄອງຕົນເອງ ເຜົ່າຈວ້າງກວາງຊີ ຂອງ ສປ ຈີນ ເມື່ອບໍ່ດົນມານີ້ ໂດຍມີ ຜູ້ຊ່ຽວຊານ ແລະ ຜູ້ຕາງໜ້າດ້ານອຸດສາຫະກຳຫຸ່ນ ຍົນອັດສະລິຍະ ຈາກແຫ່ງຕ່າງໆຂອງ ສປ ຈີນ ລວມທັງ ແຂກຜູ້ມີກຽດ ຈາກປະເທດ ສະມາຊິກ ອາຊຽນ ໄດ້ເຕົ້າໂຮມກັນ ຢູ່ສະຖານທີ່ແຫ່ງນີ້, ເພື່ອຮ່ວມກັນປຶກສາຫາລື ກ່ຽວກັບ ການສ້າງລະບົບນິເວດ ອຸດສາຫະກຳ ຫຸ່ນຍົນອັດສະລິຍະ ແລະ ການຮ່ວມມື ທາງຕະຫລາດ ໃນຕ່າງປະເທດ ທີ່ອວ່າຍໜ້າສູ່ ອາຊຽນ. ທ່ານ ວົງປາໂນ ສີປະເສີດ ກົງສຸນໃຫຍ່ລາວ ປະຈຳນະຄອນໜານນິງ ເຂດກວາງຊີ ສະແດງຄວາມ ຫວັງວ່າ ສປປ ລາວ ແລະ ສປ ຈີນ ຈະລົງເລິກການຮ່ວມມື ໃນຂົງເຂດຫຸ່ນຍົນ. ພ້ອມທັງ ຊີ້ໃຫ້ເຫັນວ່າ: ປັດຈຸບັນ, ສປປ ລາວ ພວມ ກຳລັງໃຫ້ຄວາມສຳຄັນ ກັບການພັດທະນາ ປັນຍາປະດິດ, ເສດຖະກິດດິຈີຕອນ ແລະ ອຸດສາຫະກຳ ທີ່ມີວິທະຍາສາດ ເຕັກໂນໂລຊີ ທັນສະໄໝ, ຫວັງວ່າ ວິສາຫະກິດຫຸ່ນຍົນຂອງ ສປ ຈີນ ຈະເຂົ້າໄປລົງທຶນຢູ່ ສປປ ລາວ ເພື່ອເພີ່ມທະວີຄວາມສາມາດດ້ານການພັດທະນາ ເສດຖະກິດ ຂອງທ້ອງຖິ່ນ,ພ້ອມທັງ ນຳໃຊ້ສູນຝຶກວິຊາຊີບ ຫຼູປ່ານ ແລະ ໂຄງການສຶກສາວິຊາຊີບອື່ນໆ ເລັ່ງລັດການບົ່ມເພາະ ສ້າງບຸກຄະລາກອນ ດ້ານດິຈີຕອນ ແລະ ອັດສະລິຍະຢູ່ທ້ອງຖິ່ນ.ໃນໄລຍະກອງປະຊຸມ,“ບົດບັນທຶກຄວາມເຂົ້າໃຈ ກ່ຽວກັບ ການຮ່ວມກັນ ສ້າງເວທີບໍລິ ການອຸດສາຫະກຳຫຸ່ນຍົນ ອັດສະລິຍະ ທີ່ອວ່າຍໜ້າ ສູ່ອາຊຽນ” ແລະໃບສັ່ງຊື້ເພື່ອສົ່ງອອກ ແລະ ໂຄງການຮ່ວມມືຫລາຍສະບັບ ໄດ້ຖືກລົງນາມ ຜ່ານທາງເອເລັກໂຕຣນິກ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
