ຂປລ
ທ່ານ ຫວາງຢີ້ ກຳມະການກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງການຕ່າງປະເທດຈີນ ໄດ້ພົບປະເຈລະຈາກັບ ທ່ານ ໂຊຮະຢຸນ ລັດຖະມົນຕີ ກະຊວງການຕ່າງປະເທດ ສ.ເກົາຫລີ ຢູ່ນະຄອນຫລວງເຊອຸນ ຂອງ ສ.ເກົາຫລີ.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 19 ສິງຫານີ້, ທ່ານ ຫວາງຢີ້ ກຳມະການກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງການຕ່າງປະເທດຈີນ ໄດ້ພົບປະເຈລະຈາກັບ ທ່ານ ໂຊຮະຢຸນ ລັດຖະມົນຕີ ກະຊວງການຕ່າງປະເທດ ສ.ເກົາຫລີ ຢູ່ນະຄອນຫລວງເຊອຸນ ຂອງ ສ.ເກົາຫລີ. ທ່ານ ຫວາງຢີ້ ກ່າວວ່າ: ນັບແຕ່ທ້າຍປີ 2025 ເປັນຕົ້ນມາ, ການຢ້ຽມຢາມເຊິ່ງກັນ ແລະ ກັນ ລະຫວ່າງ ປະມຸກລັດ ສອງປະເທດ ໄດ້ຮັບຜົນສຳເລັດ ຢ່າງຈົບງາມ, ສາຍພົວພັນ ລະຫວ່າງ ສປ ຈີນ-ສ.ເກົາຫລີ ໄດ້ຮັບການປັບປຸງ ໃຫ້ດີຂຶ້ນຢ່າງຕໍ່ເນື່ອງ, ສອງຝ່າຍ ຄວນຮັບປະກັນໃຫ້ການພົວພັນ ລະຫວ່າງ ສອງຝ່າຍ ພັດທະນາ ຢ່າງປອດໄສ ແລະ ໝັ້ນທ່ຽງ. ໃນອີກບໍ່ດົນ, ສປ ຈີນ ແລະ ສ.ເກົາຫລີ ຈະຕ້ອນຮັບຄົບຮອບ 34 ປີ ຂອງການສ້າງຕັ້ງ ການພົວພັນ ທາງການທູດ ລະຫວ່າງ ສອງປະເທດ, ສອງຝ່າຍ ຄວນຈັດກິດຈະກຳລະນຶກ ຄົບຮອບ 35 ປີ ແຫ່ງການສ້າງຕັ້ງການພົວພັນ ທາງການທູດ ໃນປີໜ້າໃຫ້ດີ, ຄວນຊຸກຍູ້ ໃຫ້ການຮ່ວມມື ໄດ້ຮັບການຍົກລະດັບສູງຂຶ້ນຕື່ມອີກ ແລະ ເລັ່ງລັດການເຈລະຈາ ໄລຍະທີສອງ ຂອງສັນຍາການຄ້າເສລີ ຈີນ-ສ.ເກົາຫລີ. ທ່ານ ໂຊຮະຢຸນ ກ່າວວ່າ: ສ.ເກົາຫລີ ຍຶດໝັ້ນນະໂຍບາຍ ປະເທດຈີນດຽວ ຢ່າງສະເໝີຕົ້ນ ສະເໝີປາຍ, ຫວັງວ່າຈະຖືເອົາການເຂົ້າຮ່ວມ ກອງປະຊຸມຜູ້ນຳເສດຖະກິດ ຂອງອົງການຮ່ວມມື ເສດຖະກິດອາຊີ-ປາຊີຟິກ ຂອງ ທ່ານ ລີແຈມຽງ ປະທານາທິບໍດີ ສ.ເກົາຫລີ ແລະ ການສ້າງຕັ້ງການພົວພັນ ທາງການທູດ ສ.ເກົາຫລີ- ສປ ຈີນ ຄົບຮອບ 35 ປີເປັນໂອກາດທີ່ດີ ເພື່ອລົງເລິກການແລກປ່ຽນ ໃນຂົງເຂດຕ່າງໆ ແລະ ຊຸກຍູ້ໃຫ້ການພົວພັນ ຄູ່ຮ່ວມມືຍຸດທະສາດ ລະຫວ່າງ ສອງປະເທດພັນທະນາ ຂຶ້ນສູ່ລະດັບໃໝ່./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
