ຂປລ. ເນື່ອງໃນໂອກາດ ວັນສື່ມວນຊົນ ແລະ ການພິມ ຈຳໜ່ານໄດ້ໝູນວຽນມາຮອດອີກວາລະໜຶ່ງ ຊຶ່ງສື່ ມວນຊົນທຸກຂະແໜງການທັງສູນກາງ ແລະ ທ້ອງຖິ່ນລ້ວນແຕ່ເອົາໃຈໃສ່ສ້າງຜົນງານ ເພື່ອຂ່ຳນັບຮັບຕ້ອນວັນດັ່ງກ່າວ ໃຫ້ມີຄວາມໝາຍສໍາຄັນເລິກເຊິ່ງ. ດັ່ງນັ້ນ, ມື້ນີ້ ໜັງສືພິມປະເທດລາວ ຂໍຍົກເອົາບາງຄຳເຫັນຂອງ ສະຫາຍ ພົ.ຕ ແສງມະນີວອນ ຄໍາມະນີ ກໍາມະການຄະນະປະຈໍາພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບກອງ ໃນກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ກ່ຽວກັບບົດບາດສໍາຄັນສື່ມວນຊົນປ້ອງກັນຊາດໃຫ້ພວກເຮົາຮັບຮູ້ນຳກັນ.

ສະຫາຍ ພົ.ຕ ແສງມະນີວອນ ຄໍາມະນີ ໄດ້ກ່າວ ວ່າ: ບົດບາດສໍາຄັນຂອງສື່ມວນຊົນປ້ອງກັນຊາດ ໃນການສຶກສາອົບຮົມການເມືອງ-ແນວຄິດທົ່ວກໍາລັງເຫລົ່າຮົບ ແລະ ທົ່ວສັງຄົມ ທັງໄດ້ຕິດພັນກັບຂະບວນວິວັດການກໍາເນີດເຕີບໃຫຍ່ຂະຫຍາຍຕົວ ແລະ ການສູ້ຮົບມີໄຊຂອງທັບ ແລະ ປະຊາຊົນເຮົາ, ມີບົດບາດສໍາຄັນ ບໍ່ພຽງແຕ່ເປັນກະບອກສຽງຮຽກເອີ້ນ ແລະ ໂຄສະນາສຶກສາອົບຮົມການເມືອງ-ແນວຄິດ ຂອງພະນັກງານ-ນັກຮົບ ແລະ ປະຊາຊົນບັນດາເຜົ່າ ເທົ່ານັ້ນ. ແຕ່ຍັງເປັນພາຫະນະ ແລະ ອາວຸດອັນແຫລມຄົມ ເຮັດໃຫ້ກໍາລັງປະກອບອາວຸດປະຊາຊົນ ຮັກສາໄດ້ທາດແທ້ມູນເຊື້ອອັນດີງາມຂອງຕົນສາມາດເຮັດສໍາເລັດໜ້າທີ່ໃນແຕ່ລະໄລຍະ, ປະກອບສ່ວນຮ່ວມກັບສື່ອື່ນໆນໍາສະເໜີແນວທາງແຜນນະໂຍບາຍຂອງພັກ ກົດໝາຍຂອງລັດ, ມູນເຊື້ອປະຫວັດສາດ, ຜົນງານການປົກປັກຮັກສາ ແລະ ສ້າງສາປະເທດຊາດໃນແຕ່ລະໄລຍະ ເພື່ອສຶກສາອົບຮົມການ ເມືອງ-ແນວຄິດ ໃຫ້ພະນັກງານ-ນັກຮົບ ແລະ ປະຊາຊົນບັນດາເຜົ່າຮັບຮູ້ເຂົ້າໃຈ ແລະ ມີຄວາມເປັນເອ ກະພາບສູງ. ເຫັນໄດ້ຄວາມໝາຍຄວາມສໍາຄັນດັ່ງກ່າວນັ້ນ, ຄະນະນໍາກະຊວງປ້ອງກັນປະເທດ ໄດ້ເອົາ ໃຈໃສ່ຊີ້ນໍາຕໍ່ວຽກງານສື່ມວນຊົນໃນກອງທັບຢ່າງໃກ້ສິດ,ໂດຍໄດ້ສຸມໃສ່ປັບປຸງການຈັດຕັ້ງກໍ່ສ້າງບຸກຄະລາກອນ, ປະກອບພາຫະນະເຕັກນິກຢ່າງຄົບຖ້ວນ. ປັດຈຸບັນສື່ມວນຊົນກອງທັບປະກອບມີ (ວິທະຍຸກະຈາຍສຽງກອງທັບ, ໂທລະ ພາບກອງທັບ, ໜັງສືພິມ ກອງທັບ ແລະ ວາລະສານປ້ອງກັນຊາດ), ພ້ອມດ້ວຍຕາໜ່າງຂ່າວ ທີ່ໄດ້ກະຈາຍຢູ່ບັນດາກໍາລັງຫລວງ ແລະ ກໍາລັງທ້ອງຖິ່ນໃນທົ່ວປະເທດ.

   ພ້ອມນີ້, ໃນໄລຍະຜ່ານມາໄດ້ເອົາໃຈໃສ່ຊີ້ນໍາສື່ມວນຊົນກອງທັບ ໃນຂົງເຂດຄວາມຮັບຜິດຊອບຂອງຕົນ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຫ້າວຫັນຕໍ່ໜ້າທີ່ວິຊາສະເພາະ, ສຸມໃສ່ໂຄສະນາ  ບັນຫາສໍາຄັນຕ່າງໆຂອງຊາດຂອງພັກ-ລັດ ແລະ ຂອງກອງທັບຕິດຕາມການ ເຄື່ອນໄຫວຂອງການນໍາ ພັກ-ລັດ, ຄະນະນໍາກະຊວງປ້ອງກັນປະເທດ ແລະ ການເຄື່ອນໄຫວຂອງບັນດາກົມກອງໃນຂອບເຂດ ທົ່ວກະຊວງປ້ອງກັນປະເທດໂດຍສະເພາະການສະເຫລີມສະຫລອງ 3 ວັນປະຫວັດສາດໃນປີຜ່ານມາ, ຜົນສໍາເລັດຂອງກອງປະຊຸມໃຫຍ່ຜູ້ແທນຄັ້ງທີ XII ຂອງພັກປະຊາຊົນປະຕິວັດລາວ, ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ, ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ. ໃນນີ້, ວຽກງານທີ່ພົ້ນເດັ່ນ ສະເພາະສື່ມວນຊົນໃນກອງທັບໄລຍະຜ່ານມາ ແມ່ນໄດ້ເອົາໃຈໃສ່ປັບປຸງ ພັດທະນາເນື້ອໃນໜັງສືພິມ, ວາລະສານປ້ອງກັນຊາດ, ການຈັດທຳລາຍການວິທະຍຸ-ໂທລະພາບ, ໃຫ້ນັບມື້ ມີຄວາມອຸດົມສົມບູນ, ຄົມແຫລມ, ຫລາກຫລາຍ ຮູບແບບສີສັນ ແລະ ທັນສະໄໝ ທັງສື່ສິ່ງພິມ ແລະ ສື່ເອເລັກໂຕລນິກ ເພື່ອດຶງດູດຜູ້ອ່ານ, ຜູ້ຟັງ, ຜູ້ຊົມ ( ສະແດງອອກຄື: ການບໍລິໂພກຂ່າວ ແລະ ການເຂົ້າ ເຖິງຂອງທົ່ວສັງຄົມ, ກໍຄືບັນດາສື່ຂອງກອງທັບເຊັ່ນ: ລາຍການໂທລະພາບ 90%, ໜັງສືພິມ 90%, ລາຍ ການວິທະຍຸກະຈາຍສຽງ 75% ແລະ ວາລະສານ ປ້ອງກັນຊາດ 60% ).  ທັງຮັບໃຊ້ໜ້າທີ່ການເມືອງ ໃນຖານະເປັນກະບອກສຽງຂອງຄະນະພັກກະຊວງ ປ້ອງກັນປະເທດ ຮັບປະກັນການໂຄສະນາ ໄປຕາມ ທິດຊີ້ນໍາຂອງພັກ-ລັດ, ປະກອບສ່ວນ ແລະ ມີບົດ ບາດອັນສໍາຄັນເຂົ້າໃນການປຸກລະດົມຊຸກຍູ້ການເມືອງແນວຄິດ ຂອງພະນັກງານນັກຮົບ, ການປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະ ເທດຊາດ, ຂະບວນການຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ຄັ້ງທີ XII ຂອງພັກ, ຂະບວນການ ສ້າງຜົນງານອຸທິດໃຫ້ແກ່ວັນປະຫວັດສາດສໍາຄັນ ຂອງຊາດຂອງພັກ ແລະ ຂອງກອງທັບ, ຂະບວນການປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ ວ່າດ້ວຍ 4 ໜ້າທີ່ໃຫຍ່ 26 ແຜນງານ.

KPL