ຂປລ
ເກີດໄຟໄໝ້ກຳປັ່ນຂ້າມຟາກລຳໜຶ່ງໃນນ່ານນ້ຳໃກ້ກັບເກາະມາດູຣາ ແຂວງ ຊາວາ ຕາເວັນອອກ, ເຮັດໃຫ້ມີ ຜູ້ເສຍ ຊີວິດຢ່າງໜ້ອຍ 5 ຄົນ, ຫາຍສາບສູນ 41 ຄົນ ແລະ ໄດ້ຮັບການຊ່ວຍເຫລືອ 225 ຄົນ.
ຂປລ.ວິທະຍຸ-ໂທລະພາບ ສູນກາງຈີນ,ວັນທີ 2 ສິງຫານີ້, ພາກສ່ວນທີ່ກ່ຽວຂ້ອງ ຂອງທາງການອິນໂດເນເຊຍ ໃຫ້ຮູ້ວ່າ: ເກີດໄຟໄໝ້ກຳປັ່ນຂ້າມຟາກລຳໜຶ່ງໃນນ່ານນ້ຳໃກ້ກັບເກາະມາດູຣາ ແຂວງ ຊາວາ ຕາເວັນອອກ, ເຮັດໃຫ້ມີ ຜູ້ເສຍຊີວິດຢ່າງໜ້ອຍ 5 ຄົນ, ຫາຍສາບສູນ 41 ຄົນ ແລະ ໄດ້ຮັບການຊ່ວຍເຫລືອ 225 ຄົນ.ໃນຂະນະເກີດເຫດ ກຳປັ່ນດັ່ງກ່າວກຳລັງແລ່ນຕາມເສັ້ນທາງເດີນເຮືອ ລະຫວ່າງ ນະຄອນຊູຣາບາຢາ-ນະຄອນມາຄາຊາ. ຢູ່ເທິງກຳປັ່ນ ມີທັງໝົດ 271 ຄົນ, ໃນນັ້ນ ມີຜູ້ໂດຍສານ 232 ຄົນ ແລະ ລູກເຮືອ 39 ຄົນ. ໃນຂະນະນັ້ນ, ກຳປັ່ນລຳນີ້ ຢູ່ຫ່າງໄກ ຈາກຝັ່ງປະມານ 35 ກິໂລແມັດ, ຕົວກຳປັ່ນຖືກໄຟ ເກືອບໝົດ. ຜູ້ໂດຍສານສ່ວນໜຶ່ງ ກຳລັງລໍຖ້າການຊ່ວຍເຫລືອ ຢູ່ຫ້ອງຂັບເຮືອ ແລະ ຫົວເຮືອ. ອົງການຄົ້ນຫາ ແລະ ກູ້ໄພແຫ່ງຊາດ ອິນໂດເນເຊຍ ແຈ້ງໃຫ້ຮູ້ວ່າ: ມີເຮືອຫລາຍລຳ ທີ່ຢູ່ບໍລິເວນເກີດເຫດ ໄດ້ເຂົ້າຮ່ວມການ ຊ່ວຍເຫລືອກູ້ໄພ. ປັດຈຸບັນ, ການຄົ້ນຫາ ແລະ ກູ້ໄພ ຍັງດຳເນີນຢູ່, ສ່ວນສາເຫດ ຂອງການເກີດໄຟໄໝ້ ຍັງບໍ່ທັນຮູ້ຊັດເຈນເທື່ອ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
