ຂປລ
ບໍລິສັດການບິນ ກຳປູເຈຍ ແລະ ບໍລິສັດເຮືອບິນການຄ້າຈີນ ຈຳກັດ ໄດ້ເຊັນສັນຍາ ວ່າດ້ວຍການຈັດຊື້ເຮືອບິນ C909 ຈຳນວນ 20 ລຳ ຢູ່ນະຄອນຊຽງໄຮ້ຂອງ ສປ ຈີນ.
ຂປລ.ວິທະຍຸ ໂທລະພາບສູນກາງຈີນ, ເມື່ອບໍ່ດົນມານີ້, ບໍລິສັດການບິນ ກຳປູເຈຍ ແລະ ບໍລິສັດເຮືອບິນການຄ້າຈີນ ຈຳກັດ ໄດ້ເຊັນສັນຍາ ວ່າດ້ວຍການຈັດຊື້ເຮືອບິນ C909 ຈຳນວນ 20 ລຳ ຢູ່ນະຄອນຊຽງໄຮ້ຂອງ ສປ ຈີນ. ຂະນະດຽວກັນ, ອົງການການບິນ ພົນລະເຮືອນ ກຳປູເຈຍ ແລະ ບໍລິສັດເຮືອບິນ ການຄ້າຈີນ ຈຳກັດ ຍັງໄດ້ເຊັນບົດບັນທຶກ ຄວາມເຂົ້າໃຈ ເພື່ອຮັບປະກັນ ໃຫ້ເຮືອບິນ C909 ປະຕິບັດງານ ຢ່າງສຳເລັດຜົນ, ພ້ອມທັງ ລົງເລິກການຮ່ວມມື ໃນຂົງເຂດຕ່າງໆ ລະຫວ່າງ ສອງຝ່າຍຕື່ມອີກ ເຊັ່ນ: ພື້ນຖານໂຄງລ່າງ ດ້ານການບິນພົນລະເຮືອນ, ການຮັບປະກັນ ການດຳເນີນງານ, ການບຳລຸງ ສ້າງບຸກຄະລາກອນ, ການຝຶກອົບຮົມ ດ້ານການສ້ອມແປງ ແລະ ອື່ນໆ. ເຮືອບິນ C909 ແມ່ນເຮືອບິນໂດຍສານ 90 ບ່ອນນັ່ງ ທີ່ບິນໄລຍະທາງກາງ ແລະ ສັ້ນ ເຊິ່ງຄົ້ນຄວ້າ ແລະ ຜະລິດໂດຍ ສປ ຈີນ, ຕົ້ນຕໍ່ແມ່ນປະຕິບັດໜ້າທີ່ ຂົນສົ່ງໂດຍສານ ລະຫວ່າງ ຕົວເມືອງຂະໜາດກາງ ແລະ ນ້ອຍ, ປັດຈຸບັນ, ໄດ້ເຂົ້າສູ່ຕະຫລາດຂອງຫລາຍປະເທດ ເຊັ່ນ: ສປປ ລາວ, ອິນໂດເນເຊຍ, ສສ ຫວຽດນາມ ແລະ ປະເທດອື່ນໆ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
