ຂປລ
ຄະນະໂຄສະນາອົບຮົມສູນກາງພັກ (ຄອສພ) ຈັດສຳມະນາວິທະຍາສາດສື່ມວນຊົນ ພາຍໃຕ້ຫົວຂໍ້ “ພັດທະນາວຽກງານສ່ືມວນຊົນໄປສູ່ຄຸນນະພາບໃໝ່ຢ່າງແຂງແຮງ” ໃນວັນທີ 16 ມິຖຸນາ 2026.
ຂປລ. ເພື່ອກະກຽມໃຫ້ແກ່ກອງປະຊຸມວຽກງານສ່ືມວນຊົນທ່ົວປະເທດຄັ້ງທີ 1 ໂດຍການເປັນປະທານ ຂອງສະຫາຍ ຄໍາພັນ ເຜີຍຍະວົງ ກຳມະການກົມການເມືອງສູນກາງພັກ, ຫົວໜ້າ ຄອສພ, ມີບັນດາຕາງໜ້າກົມກອງ, ກະຊວງ, ອົງການອ້ອມຂ້າງຂັ້ນສູນກາງທີ່ກ່ຽວຂ້ອງກັບການເຄື່ອນໄຫວວຽກງານສ່ືມວນຊົນ ເຂົ້າຮ່ວມ.
ສະຫາຍ ຄຳພັນ ເຜີຍຍະວົງ ໄດ້ກ່າວວ່າ: ການສໍາມະນາຄ້ັງນ້ີ,ຈະໄດ້ພ້ອມກັນຄ້ົນຄວ້າເນ້ືອໃນຮ່າງບົດສະຫລຸບການຕີລາຄາການເຄື່ອນໄຫວວຽກງານສື່ມວນຊົນໃນໄລຍະຜ່ານມາ ແລະ ການກໍານົດທິດທາງລວມຕໍ່ໜ້າຮອດປີ 2030, ພ້ອມນີ້ຍັງຈະໄດ້ຄົ້ນຄວ້າລົງເລິກເນື້ອໃນຮ່າງມະຕິຂອງກົມການເມືອງສູນກາງພັກ ທີ່ຈະປ່ຽນແທນມະຕິ 36 ຂອງກົມການເມືອງສູນກາງພັກ ກ່ຽວກັບການເພີ່ມທະວີການນໍາພາຂອງພັກ ແລະ ການຄຸ້ມຄອງຂອງລັດຕໍ່ສື່ມວນຊົນໃນໄລຍະໃໝ່, ລົງວັນທີ 19 ມິຖຸນາ ປີ 1993 ຊຶ່ງເຫັນວ່າເອກະສານດັ່ງກ່າວ ນໍາໃຊ້ມາເປັນເວລາຍາວນານສົມຄວນແລ້ວ. ສະນັ້ນ, ເພ່ືອໃຫ້ສອດຄ່ອງກັບວຽກງານການ ພັດທະນາເສດຖະກິດ-ສັງຄົມ ໃນໄລຍະໃໝ່ ຕ້ອງໄດ້ຄົ້ນຄວ້າປັບປຸງຄືນ; ກອງປະຊຸມຈະໄດ້ລົງເລິກສອງເອກະສານສໍາຄັນ ເພື່ອກະກຽມໃຫ້ແກ່ກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ 1 ແລະ ຖືວ່າເປັນກອງປະຊຸມຄັ້ງປະຫວັດສາດ, ຄັ້ງທໍາອິດຂອງວຽກງານສື່ມວນຊົນທົ່ວປະເທດທີ່ຈະພ້ອມກັນສຸມໃສ່ສະຫລຸບຕີລາຄາຄືນການເຄື່ອນໄຫວວຽກງານຂອງສື່ມວນຊົນ ໄລຍະຜ່ານມາ ແລະ ກໍານົດທິດທາງ ລວມຮອດປີ 2030 ເພື່ອໃຫ້ມີການຫັນປ່ຽນໄປສູ່ຄຸນນະພາບໃໝ່ຢ່າງ ແຂງແຮງ. ພ້ອມນ້ີ, ສະຫາຍ ຄຳພັນ ເຜີຍຍະວົງ ຍັງໄດ້ຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມຈົ່ງເຊີດຊູຄວາມຮັບຜິດຊອບສູງ, ເອົາໃຈໃສ່ຄົ້ນຄວ້າ, ສຸມສະຕິປັນຍາເຂົ້າໃນການປະກອບຄຳຄິດຄຳເຫັນໃສ່ຮ່າງເອກະສານສຳຄັນຮ່າງບົດສະຫລຸບຕີລາຄາ, ຮ່າງມະຕິດັ່ງກ່າວ ທີ່ກອງເລຂາຄະນະຮັບຜິດຊອບຈະໄດ້ນໍາສະເໜີຜ່ານກອງປະຊຸມສໍາມະນາ ແລະ ບັນດາ ເອກະສານທີ່ກອງເລຂາແຈກຢາຍ ໄປກ່ອນແລ້ວນັ້ນ ເພື່ອໃຫ້ມີເນື້ອໃນຄົບຖ້ວນ, ເລິກເຊິ່ງ ແລະ ສອດຄ່ອງກັບສະພາບຕົວຈິງໃນປັດຈຸບັນ.
ຂ່າວ: ສົມຫວັງ ພາບ: ຂັນໄຊ
KPL
