ຂປລ
ໂດຍຕອບສະໜອງ ຕາມຄຳເຊີນຂອງ ທ່ານ ກິມເຈິງອຸນ ເລຂາທິການໃຫຍ່ ຄະນະກຳມະການ ສູນກາງພັກແຮງງານເກົາ ຫລີ, ປະທານຄະນະກຳມະການແຫ່ງລັດ ສປປ ເກົາຫລີ, ທ່ານ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ໄດ້ເດີນທາງໄປຢ້ຽມຢາມ ສປປ ເກົາຫລີ ທາງລັດຖະກິດ ລະຫວ່າງ ວັນທີ 8-9 ມິຖຸນານີ້.
ຂປລ.ວິທະຍຸ ໂທລະພາບ ສູນກາງຈີນ, ໂດຍຕອບສະໜອງ ຕາມຄຳເຊີນຂອງ ທ່ານ ກິມເຈິງອຸນ ເລຂາທິການໃຫຍ່ ຄະນະກຳມະການ ສູນກາງພັກແຮງງານເກົາຫລີ, ປະທານຄະນະກຳມະການແຫ່ງລັດ ສປປ ເກົາຫລີ, ທ່ານ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ໄດ້ເດີນທາງໄປຢ້ຽມຢາມ ສປປ ເກົາຫລີ ທາງລັດຖະກິດ ລະຫວ່າງ ວັນທີ 8-9 ມິຖຸນານີ້. ນີ້ຖືກເປັນການ ຢ້ຽມຢາມ ສປປ ເກົາຫລີ ທາງລັດຖະກິດ ອີກຄັ້ງໜຶ່ງໃນຮອບ 7 ປີຜ່ານມາ.ສປ ຈີນ ແລະ ສປປ ເກົາຫລີ ເປັນປະເທດເພື່ອນບ້ານໃກ້ຄຽງ ສັງຄົມນິຍົມ ທີ່ເປັນມິດ ແລະ ຊ່ວຍເຫລືອ ເຊິ່ງກັນແລະກັນ, ປີນີ້ແມ່ນຄົບຮອບ 65 ປີຂອງການເຊັນ “ສົນທິສັນຍາມິດຕະພາບ, ການຮ່ວມມື ແລະ ການຊ່ວຍເຫລືອ ເຊິ່ງກັນ ແລະ ກັນ ລະຫວ່າງ ສປ ຈີນ-ສປປ ເກົາຫລີ”. ໃນຊຸມປີມໍ່ໆມານີ້, ພາຍໃຕ້ການນຳພາ ທາງດ້ານຍຸດທະສາດ ຂອງຜູ້ນຳສູງສຸດສອງພັກສອງລັດ, ສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອ ຂອງສອງປະເທດ ໄດ້ສືບຕໍ່ຂະຫຍາຍຕົວຢ່າງປອດໃສ ແລະ ໝັ້ນທ່ຽງ, ການຮ່ວມມື ໃນຂົງເຂດຕ່າງໆ ເປັນຕົ້ນ: ເສດຖະກິດ, ວັດທະນະທຳ, ການສຶກສາ ແລະ ຊາວໜຸ່ມປະກົດມີຈຸດເດັ່ນ ຢ່າງບໍ່ຢຸດຢັ້ງ ເຊິ່ງໄດ້ສ້າງຄວາມສຸກໃຫ້ແກ່ ສອງປະເທດ ກໍຄື ປະຊາຊົນສອງຊາດ, ພ້ອມທັງ ໄດ້ເພີ່ມເນື້ອໃນໃໝ່ ແຫ່ງຍຸກສະໄໝ ເຂົ້າໃນມິດຕະພາບ ອັນເປັນມູນເຊື້ອລະຫວ່າງ ສປ ຈີນ-ສປປ ເກົາຫລີ ແລະ ປະກອບສ່ວນອັນຕັ້ງໜ້າ ເຂົ້າໃນການຊຸກຍູ້ສັນຕະພາບ ແລະ ການພັດທະນາຂອງພາກພື້ນ. ໃນຊຸມປີມໍ່ໆມານີ້, ການຮ່ວມມືດ້ານເສດຖະກິດ-ການຄ້າລະຫວ່າງຈີນ-ສປປ ເກົາຫລີ ມີທ່າອ່ຽງ ການພັດທະນາທີ່ດີ. ອີງຕາມສະຖິຕິ, ປີ 2025, ການຄ້າ ລະຫວ່າງ ສອງຝ່າຍບັນລຸ 2 ຕື້ ກວ່າໂດລາສະຫະລັດ. ທ່ານ ນາງ ຈ່າງຮຸ້ຍຈື້ ຮອງຫົວໜ້າສູນຄົ້ນຄວ້າ ອາຊີ ຕາເວັນອອກ ສຽງເໜືອ ຂອງມະຫາວິທະຍາໄລ ຈີຫລິນ ເຫັນວ່າ: ການຮ່ວມມື ທີ່ຕິດແທດຕົວຈິງ ໃນຂົງເຂດຕ່າງໆ ເຊັ່ນ: ເສດຖະກິດ ສັງຄົມ ລະຫວ່າງສປ ຈີນ-ສປປ ເກົາຫລີ ຈະນຳພາການຮ່ວມມືສອງຝ່າຍ ແລະ ຫລາຍຝ່າຍ ຂອງພາກພື້ນ ແລະ ເປັນການຄ້ຳປະກັນ ອັນສຳຄັນ ໃຫ້ແກ່ ສະຖຽນລະພາບ ແລະ ຄວາມຈະເລີນຮຸ່ງເຮືອງ ຂອງອາຊີ ຕາເວັນອອກສຽງເໜືອ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
