ຂປລ
ຂປລ. ເມື່ອກ້າວເຂົ້າສູ່ໄລຍະທ້າຍເດືອນພຶດສະພາ, ກິ່ນອາຍຂອງລະດູຝົນໄດ້ເລີ່ມປົກຄຸມໄປທົ່ວຜືນປ່າ ພ້ອມກັບການເປີດສາກໜ້າປະຫວັດສາດການທ່ອງທ່ຽວແຫ່ງໃໝ່ ຢູ່ທີ່ ບ້ານນາຫວ້າ ເມືອງໂພນທອງ ແຂວງຈຳປາສັກ. ພິທີເປີດກຸ່ມທ່ອງທ່ຽວຍ່າງປ່າ “ພູມະໂລງ” ຢ່າງເປັນທາງການ ຈັດຂຶ້ນໃນວັນທີ 30 ພຶດສະພາ 2026 ຊຶ່ງເປັນແຫລ່ງທ່ອງທ່ຽວແບບອະນຸລັກ ໂດຍປະຊາຊົນທ້ອງຖິ່ນມີສ່ວນຮ່ວມ ເພື່ອຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດ
ຂປລ. ເມື່ອກ້າວເຂົ້າສູ່ໄລຍະທ້າຍເດືອນພຶດສະພາ, ກິ່ນອາຍຂອງລະດູຝົນໄດ້ເລີ່ມປົກຄຸມໄປທົ່ວຜືນປ່າ ພ້ອມກັບການເປີດສາກໜ້າປະຫວັດສາດການທ່ອງທ່ຽວແຫ່ງໃໝ່ ຢູ່ທີ່ ບ້ານນາຫວ້າ ເມືອງໂພນທອງ ແຂວງຈຳປາສັກ. ພິທີເປີດກຸ່ມທ່ອງທ່ຽວຍ່າງປ່າ “ພູມະໂລງ” ຢ່າງເປັນທາງການ ຈັດຂຶ້ນໃນວັນທີ 30 ພຶດສະພາ 2026 ຊຶ່ງເປັນແຫລ່ງທ່ອງທ່ຽວແບບອະນຸລັກ ໂດຍປະຊາຊົນທ້ອງຖິ່ນມີສ່ວນຮ່ວມ ເພື່ອຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ໄດ້ມາສຳຜັດກັບຄວາມອຸດົມສົມບູນ ທີ່ຍັງຄົງຄວາມບໍລິສຸດຜຸດຜ່ອງໄວ້ຢ່າງຄົບຖ້ວນ.
“ພູມະໂລງ” ບໍ່ໄດ້ມີພຽງແຕ່ຄວາມສວຍງາມທາງທຳມະຊາດເທົ່ານັ້ນ, ແຕ່ບາດກ້າວຂອງການເດີນທາງ ຍັງອົບອວນໄປດ້ວຍກິ່ນອາຍຂອງຕຳນານຮັກສາມເສົ້າອັນລືນາມ ລະຫວ່າງ ທ້າວ ບາຈຽງ, ນາງ ມະໂລງ ແລະ ທ້າວ ຈຳປາສັກ ຊຶ່ງເປັນເລື່ອງເລົ່າຂານຄູ່ກັບແຜ່ນດິນຈຳປາສັກມາຢ່າງຍາວນານ ຍິ່ງເພີ່ມສະເໜ່ໃຫ້ກັບພູໜ່ວຍນີ້ຢ່າງໜ້າອັດສະຈັນ.
ຈາກພາບຖ່າຍມູມສູງ, ເຮົາຈະໄດ້ເຫັນຈອມພູມະໂລງ ທີ່ມີລັກສະນະເປັນໜ້າຜາຫີນຕັ້ງຊັນ ຍື່ນອອກໄປຫາທ້ອງຟ້າຢ່າງທະນົງອົງອາດ. ເທິງຍອດຜາຫີນສີເທົາເຂັ້ມ ທີ່ຜ່ານຮ່ອງຮອຍການເວລາມາຫລາຍຮ້ອຍປີ, ມີກຸ່ມນັກທ່ອງທ່ຽວຜູ້ພິຊິດຢືນຢູ່ເປັນກຸ່ມນ້ອຍໆ ສະແດງໃຫ້ເຫັນເຖິງຄວາມຍິ່ງໃຫຍ່ຂອງທຳມະຊາດ ເມື່ອທຽບກັບຕົວມະນຸດ. ພາບທີ່ສະກົດທຸກສາຍຕາ ຄື “ທະເລໝອກ” ສີຂາວບໍລິສຸດ ທີ່ຈັບຕົວກັນເປັນກ້ອນໜາ ຄ້າຍຄືກັບປຸຍຝ້າຍ ລອຍລ່ອງປົກຄຸມໄປທົ່ວຮ່ອງພູ. ໃນຍາມເຊົ້າ, ໝອກເຫລົ່ານີ້ຈະເຄື່ອນຕົວຢ່າງຊ້າໆ ໂອບກອດເອົາສາຍນ້ຳຂອງ ທີ່ຄົດຄ້ຽວຢູ່ເບື້ອງລຸ່ມ ແລະ ປ່າໄມ້ອັນຂຽວອຸ່ມທຸ່ມ ທີ່ມີພຽງແຕ່ຜູ້ມີສັດທາໃນການເດີນທາງເທົ່ານັ້ນທີ່ຈະໄດ້ມາເຫັນ.
ການເດີນທາງຂຶ້ນສູ່ພູມະໂລງ ບໍ່ແມ່ນພຽງແຕ່ການຍ່າງຊົມທິວທັດເທົ່ານັ້ນ, ແຕ່ຄືການຜະຈົນໄພທີ່ປຸກຄວາມກ້າຫານ. ນັກທ່ອງທ່ຽວຈະຕ້ອງໄດ້ໃສ່ອຸປະກອນເຊັບຕີ (Safety) ຢ່າງແໜ້ນໜາ ເພື່ອໄຕ່ຂ້າມຂົວເຊືອກ ແລະ ຂັ້ນໄດໄມ້ໄຜ່ ທີ່ຂຶງຢູ່ລະຫວ່າງຊອກຜາ. ໃນພາບທີ່ໜ້າຕື່ນຕາຕື່ນໃຈ, ຍິງສາວຄົນໜຶ່ງກຳລັງກ້າວຍ່າງຢູ່ເທິງເຊືອກຢ່າງໝັ້ນໃຈ ພ້ອມກັບກາງແຂນອອກ ແລະ ສົ່ງຮອຍຍິ້ມອັນສົດໃສໄປຫາທ້ອງຟ້າອັນກວ້າງໃຫຍ່ ໂດຍມີສາກຫລັງເປັນປຸຍເມກ ແລະ ຜາຫີນສູງຊັນ. ໃນຂະນະດຽວກັນ, ເຮົາກໍໄດ້ເຫັນພາບຄວາມຜູກພັນ ຂອງກຸ່ມນັກທ່ອງທ່ຽວທີ່ຮ່ວມຊະຕາກຳດຽວກັນ. ບາງກຸ່ມນັ່ງລົມກັນຢ່າງສະບາຍໃຈຢູ່ແຄມໜ້າຜາ, ບາງຄົນກໍຢືນຊົມແສງສີທອງທຳອິດຂອງມື້ໃໝ່ ແລະ ສິ່ງທີ່ຂາດບໍ່ໄດ້ໃນການຍ່າງປ່າ ຄືການໄດ້ດື່ມກາເຟຮ້ອນໆ ທີ່ຕົ້ມຈາກກາສະແຕນເລດເທິງຍອດພູ. ພາບຂອງອ້າຍທີມງານທ້ອງຖິ່ນ ທີ່ໃສ່ເສື້ອມີທຸງຊາດລາວ ພວມຍື່ນກາເຟຮ້ອນໆ ສົ່ງຄວັນອວນໆ ໃຫ້ກັບນັກທ່ອງທ່ຽວ ໃນຂະນະທີ່ດວງຕາເວັນກຳລັງໂຜ່ຂຶ້ນຂອບຟ້າ ເປັນພາບທີ່ອົບອຸ່ນ ແລະ ສະທ້ອນເຖິງຄວາມມີນ້ຳໃຈ, ການຕ້ອນຮັບອັນອົບອຸ່ນຂອງປະຊາຊົນບ້ານນາຫວ້າ ໄດ້ເປັນຢ່າງດີ.
ພູມະໂລງ ໃນມື້ນີ້... ຈຶ່ງບໍ່ແມ່ນເປັນພຽງແຕ່ພູເຂົາໃນຕຳນານຮັກສາມເສົ້າອີກຕໍ່ໄປ, ແຕ່ມັນໄດ້ກາຍເປັນ "ສະຫວັນເທິງດິນ" ແຫ່ງໃໝ່ ທີ່ພ້ອມແລ້ວຈະຕ້ອນຮັບທຸກຄົນໃຫ້ເຂົ້າມາສຳຜັດ. ຮອຍຍິ້ມຂອງນັກທ່ອງທ່ຽວທຸກເພດທຸກໄວ ທີ່ມາເຕົ້າໂຮມກັນເທິງຍອດຜາແຫ່ງນີ້, ທັງການຖ່າຍຮູບຮ່ວມກັນ, ການຫລິ້ນໂຢຄະຢຽດຂາ (Split) ເທິງລານຫີນຢ່າງມ່ວນຊື່ນ, ລ້ວນແຕ່ເປັນສິ່ງຢືນຢັນວ່າ: “ພູມະໂລງ ເມືອງໂພນທອງ ຄືອີກໜຶ່ງຈຸດໝາຍປາຍທາງ ທີ່ຄັ້ງໜຶ່ງໃນຊີວິດ ທ່ານຕ້ອງໄດ້ມາສຳຜັດ ແລະ ບັນທຶກຄວາມຊົງຈຳໄວ້ໃນຫົວໃຈ”.
ໂດຍ: ມົນທຽນ ໄຊຍະສິດ
KPL
