(ເນ່ືອງໃນໂອກາດວັນສິ່ງແວດລ້ອມໂລກ ຄົບຮອບ 53 ປີ ແລະ ວັນສ່ິ່ງແວດລ້ອມແຫ່ງຊາດ ຄົບຮອບ 27 ປີ)

*ວັນທີ 5 ມິຖຸນາ ຂອງທຸກໆປີ ກໍແມ່ນອີກວັນໜຶ່ງທີ່ມີຄວາມໝາຍຄວາມສໍາຄັນຫລາຍ ໂດຍສະເພາະແມ່ນວັນສ້າງຕັ້ງວັນສິ່ງແວດລ້ອມໂລກຄົບຮອບ 53 ປີ ແລະ ວັນສ້າງຕັ້ງວັນສິ່ງແວດລ້ອມແຫ່ງຊາດ ຄົບຮອບ 27ປີ ຊຶ່ງໃນແຕ່ລະປີ ທົ່ວພັກ-ລັດ, ທົ່ວສັງຄົມລ້ອມແຕ່ໄດ້ພ້ອມກັນຈັດພິທີສະເຫລີມສະຫລອງວັນດັ່ງກ່າວຢ່າງມີຄວາມໝາຍເລິກເຊິ່ງ ທັງນີ້ກໍ່ເພື່ອເປັນການສົ່ງເສີມປູກຈິດສໍານຶກ, ຍົກລະດັບຄວາມຕື່ນຕົວໃນການປົກປັກຮັກສາສິ່ງແວດລ້ອມ ແລະ ປຸກລະ ດົມໃຫ້ປວງຊົນລາວບັນດາເຜົ່າ, ບັນດາອົງການຈັດຕັ້ງລັດ, ເອກະຊົນ ແລະ ອົງການຈັດຕັ້ງສັງຄົມໃນຂອບເຂດທົ່ວປະເທດ ໄດ້ສະແດງຄວາມຮັກ, ຫວງແຫນ, ເຫັນຄວາມສໍາຄັນຂອງສິ່ງແວດລ້ອມ ແລະ ເປັນເຈົ້າການຮ່ວມມືກັນປົກປັກຮັກສາສິ່ງແວດລ້ອມ ອັນລໍ້າຄ່າຂອງພວກເຮົາ.   

ດັ່ງທີ່ພວກເຮົາຮູ້ແລ້ວວ່າ, ສິ່ງແວດລ້ອມ ແມ່ນປັດໄຈຕົ້ນຕໍໃນການດໍາລົງຊີວິດຂອງຄົນເຮົາ ແລະ ເປັນທຸກສິ່ງທຸກຢ່າງທີ່ເຮັດໃຫ້ສິ່ງມີທີ່ຊີວິດດໍາລົງຄົງຕົວຢູ່ໄດ້ຕາມສະພາບຂອງມັນ, ໝາຍຄວາມວ່າ ຖ້າຫາກພວກເຮົາມີສິ່ງແວດ ລ້ອມທີ່ດີ ຄົນ, ສັດ ແລະ ພືດ ກໍມີສຸຂະພາບດີ, ລະບົບນິເວດກໍອຸດົມສົມບູນ, ການດໍາລົງຢູ່ຂອງສິ່ງມີຊີວິດ ມີຄວາມປອດໄພ, ສະອາດ ແລະ ທໍາມະຊາດກໍຂຽວສົດງົດງາມ. ປັດຈຸບັນ, ປະຊາກອນໂລກໃນທຸກພາກພື້ນ ກໍາລັງຜະເຊີນກັບສິ່ງທ້າທາຍຈາກການເສື່ອມໂຊມຂອງສິ່ງແວດລ້ອມ, ການສູນເສຍຄວາມຫລາກຫລາຍທາງດ້ານຊີວະນາໆພັນ ແລະ ການປ່ຽນແປງຂອງສະພາບດິນຟ້າອາກາດ ເປັນຕົ້ນ ບັນຫາມົນລະພິດ, ໄພແຫ້ງແລ້ງ, ໄພນໍ້າຖ້ວມ ແລະ ອາກາດທີ່ຮ້ອນອົບເອົ້າຂຶ້ນນັບມື້. ເນື່ອງຈາກການຂະຫຍາຍຕົວຢ່າງໄວວາຂອງເສດຖະກິດໂລກໃນໄລຍະຜ່ານມາ, ສັງຄົມເຮົາໄດ້ມີການຜະລິດ ແລະ ນໍາໃຊ້ຜະລິດຕະພັນ ທີ່ເຮັດດ້ວຍປລາສຕິກ ເພື່ອອໍານວຍຄວາມສະດວກໃນຊີວິດປະຈໍາວັນຫລາຍຂຶ້ນ ຊຶ່ງເປັນການສ້າງຂີ້ເຫຍື້ອເພີ່ມຂຶ້ນ ແລະ ກາຍເປັນບັນຫາໃຫຍ່ທາງດ້ານສິ່ງແວດລ້ອມ.

ໃນໄລຍະຜ່ານມາ ອົງການສະຫະປະຊາຊາດ  ເພື່ອການພັດທະນາ ປະຈຳ ສປປ ລາວ ໄດ້ຮ່ວມ ກັບລັດຖະບານໃນການແກ້ໄຂການປ່ຽນແປງດິນຟ້າອາກາດ ເປັນບຸລິມະສິດໜຶ່ງ ແລະ ສະແດງຄວາມມຸ່ງໝັ້ນທີ່ຈະຕໍ່ສູ້ກັບການປ່ຽນແປງດິນຟ້າອາກາດ.  ເຖິງແມ່ນວ່າການປ່ອຍອາຍກາສສູ່ໂລກຂອງ ສປປ ລາວ ມີໜ້ອຍ, ແຕ່ ສປປ ລາວ ກໍໄດ້ຮັບຜົນປະໂຫຍດຫລາຍຈາກການຫລຸດຜ່ອນຜົນກະທົບຈາກການປ່ຽນແປງດິນຟ້າອາກາດ ແລະ ການປັບຕົວເຂົ້າກັບຜົນກະທົບຈາກການປ່ຽນແປງດິນຟ້າອາກາດ  ໃນຂະແໜງການຜະລິດຕ່າງໆ. ການປ່ຽນແປງດິນຟ້າອາກາດ ໂດຍສະເພາະ ສປປ ລາວ ກຳລັງກ້າວສູ່ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ ຜົນປະໂຫຍດທີ່ໄດ້ມາຈາກການພັດທະນາທີ່ໃຫຍ່ຫລວງນີ້ ອາດຈະຖືກທຳລາຍໂດຍໄພພິບັດທາງທຳມະຊາດກໍ່ເປັນໄດ້ເປັນຕົ້ນ ນໍ້າຖ້ວມ, ໄພແຫ້ງ ແລ້ງ, ດິນເຈື່ອນ ແລະ ອື່ນໆ ໄດ້ສ້າງຄວາມເສຍຫາຍໃຫ້ແກ່ປະເທດທີ່ບໍ່ມີຊາຍແດນຕິດກັບທະເລເປັນເວລາຫລາຍປີແລ້ວ. ການເກີດໄພພິບັດເຫລົ່ານີ້  ມີແນວໂນ້ມທີ່ຈະເພີ່ມສູງຂຶ້ນ ເນື່ອງຈາກການປ່ຽນແປງດິນຟ້າອາກາດ ແລະ ບັນຫາສິ່ງແວດລ້ອມເສື່ອມໂຊມເຊັ່ນ: ສະພາບອາກາດມີການປ່ຽນແປງໂດຍສະເພາະໃນລະດູແລ້ງ ອາກາດຮ້ອນອົບເອົ້າ ອຸນຫະພູມຂຶ້ນສູງ ເກີດມີໄຟໄໝ້ລາມປ່າ, ບັນຫາໝອກຄວັນ ແລະ ຝຸ່ນລະອອງ PM 2,5 ເກີດມາດຕະຖານໃນບາງເຂດ, ຝົນຕົກບໍ່ຖືກຕາມລະດູການ ແລະ ບັນຫາອື່ນໆ ຊຶ່ງໄດ້ສົ່ງຜົນກະທົບຕໍ່ພື້ນຖານໂຄງລ່າງ ພື້ນທີ່ທຳການຜະລິດ ແລະ ສົ່ງຜົນຕໍ່ກັບຊີວິດການເປັນຢູ່ຂອງປະຊາຊົນລາວບັນດາເຜົ່າ ລວມທັງການພັດທະນາເສດຖະກິດສັງຄົມຂອງຊາດ.

ຕໍ່ບັນຫາດັ່ງກ່າວ ລັດຖະບານ ໄດ້ໃຫ້ຄວາມສໍາຄັນຂອງການແກ້ໄຂ ບັນຫາການປ່ຽນແປງດິນຟ້າອາກາດ ໂດຍການສ້າງນິຕິກຳ ແລະ ຍຸດທະສາດທີ່ສໍາຄັນ ເຊັ່ນ: ຍຸດທະສາດ ແຫ່ງຊາດ ການແກ້ໄຂບັນຫາການປ່ຽນແປງດິນຟ້າອາກາດ, ດຳລັດວ່າດ້ວຍການປ່ຽນແປງດິນຟ້າອາກາດ, ດຳລັດວ່າດ້ວຍສິນເຊື່ອກາກບອນ ແລະ ໄດ້ເຊື່ອມສານເອົາວຽກງານດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2026-2030) ແລະ ໄດ້ກຳນົດຄາດໝາຍການຫລຸດຜ່ອນການປ່ອຍ ແລະ ເພີ່ມການດູດຊັບທາດອາຍເຮືອນແກ້ວໃຫ້ໄດ້ 60% ພາຍໃນປີ 2030 ແລະ ໃຫ້ເປັນສູນ ໃນປີ 2050 (Net Zero Emission by 2050) ໂດຍການຫັນໄປສູ່ການຜະລິດພະລັງງານສະອາດ ການນໍາໃຊ້ລົດໄຟຟ້າ, ການອະນຸລັກຊີວະນາໆພັນ ແລະ ເພີ່ມເນື້ອທີ່ປົກຫຸ້ມປ່າໄມ້ ໃຫ້ໄດ້ 70% ໃນປີ 2035.

ຢ່າງໃດກໍດີວັນສິ່ງແວດລ້ອມໂລກປີນີ້, ພວກເຮົາຈົ່ງຮ່ວມມືກັນໃນການຄຸ້ມຄອງສິ່ງເສດເຫລືອຕ່າງໆ, ຄຸ້ມຄອງປ່າໄມ້, ປູກໄມ້ ເພື່ອຮັກສາໂລກຂອງພວກເຮົາໃຫ້ມີຄວາມໜ້າຢູ່ ອາກາດປອດໂປ່ງ ທັງສ້າງໄປສູ່ໂລກທີ່ສະອາດ  ແລະ ເປັນມິດກັບສິ່ງແວດລ້ອມຫລາຍຂຶ້ນ ແລະ ເພື່ອຄວາມສວຍງາມ,  ຄວາມສະອາດ ແລະ ຄວາມເປັນມິດຕໍ່ສິ່ງແວດລ້ອມຂອງ ສປປ ລາວເຮົາ. 

KPL