ຂປລ
ກອງປະຊຸມໃຫຍ່ສະມາຊິກພັກຂອງອົງຄະນະພັກສູນກາງ ສະຫະພັນແມ່ຍິງລາວ (ສສຍລ) ຄັ້ງທີ V ຈັດຂຶ້ນໃນທ້າຍອາທິດຜ່ານມາ.
ຂປລ. ໂດຍການເປັນປະທານຂອງ ສະຫາຍ ນາງ ອາລີ ວົງໜ່ໍບຸນທໍາ ກຳມະການສູນກາງພັກ, ເລຂາຄະນະພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ໃຫ້ກຽດເຂົ້າຮ່ວມໂດຍສະຫາຍ ກິແກ້ວ ໄຂຄໍາພິທູນ ກຳມະການກົມການເມືອງສູນກາງພັກ, ປະທານ ສູນກາງແນວລາວສ້າງຊາດ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະພັກ, ຄະນະນຳ, ສະມາຊິກພັກພາຍໃນສູນກາງສະ ຫະພັນແມ່ຍິງລາວເຂົ້າຮ່ວມ.ກອງປະຊຸມໄດ້ສະຫລຸບຜົນການນໍາພາ-ຊີ້ນໍາໃນໄລຍະຜ່ານມາ, ຄົ້ນຄວ້າ ແລະ ຮັບຮອງຮ່າງລາຍງານການເມືອງພ້ອມແຜນພັດທະນາ 5 ປີ (2026-2030) ເພື່ອສືບຕ່ໍນໍາພາວຽກງານຂອງ ສສຍລ ຊຶ່ງສະໄໝຜ່ານມາ ສສຍລ ໄດ້ນໍາພາປະຕິບັດ 10 ແຜນງານ, 65 ໂຄງການ ແລະ 3 ແຜນດໍາເນີນງານແຫ່ງຊາດ ດ້ານຄວາມສະເໝີພາບຍິງ-ຊາຍ, ແມ່ ແລະ ເດັກ, ພ້ອມທັງສົ່ງເສີມການພັດທະນາແມ່ຍິງ ແລະ ການສ້າງພະນັກງານເພດຍິງໃຫ້ເຂັ້ມແຂງ.
ພ້ອມນີ້, ກອງປະຊຸມຍັງໄດ້ໃຊ້ສິດປະຊາທິປະໄຕເລືອກຕ້ັງຄະນະບໍລິຫານງານພັກສະໄໝທີ V ຈໍານວນ 11 ສະຫາຍ ຈາກຜູ້ສະໝັກ 14 ສະຫາຍ. ຜົນການເລືອກຕັ້ງ ສະຫາຍ ນາງ ອາລີ ວົງໜໍ່ບຸນທໍາ ໄດ້ຮັບເລືອກເປັນເລຂາຄະນະບໍລິຫານງານພັກ ສະໄໝທີ V, ສະຫາຍ ນາງ ທຳມາ ເພັດວິໄຊ ເປັນຮອງເລຂາ ແລະ ສະຫາຍ ນາງ ຜາສຸກ ວົງວິຈິດ ເປັນປະທານກວດກາພັກ.
ໂອກາດນີ້, ສະຫາຍ ກິແກ້ວ ໄຂຄໍາພິທູນ ໄດ້ມີຄຳເຫັນໂອ້ລົມ ໂດຍໄດ້ສະແດງຄວາມຊົມເຊີຍຕ່ໍຜົນສໍາເລັດຂອງ ສສຍລ ແລະ ເນັ້ນໃຫ້ສືບຕໍ່ເສີມສ້າງວຽກງານການເມືອງ-ແນວຄິດ, ພັດທະນາພະນັກງານແມ່ຍິງ, ຂັບເຄື່ອນຂໍ້ແຂ່ງຂັນ “3 ດີ”, ສ້າງໂອກາດອາຊີບ ແລະ ລາຍໄດ້ໃຫ້ແມ່ຍິງໂດຍສະເພາະໃນເຂດຫ່າງໄກ, ພ້ອມທັງຍົກສູງປະສິດທິພາບອົງການ ແລະ ຂະຫຍາຍການຮ່ວມມືສາກົນ ໃຫ້ມີຜົນສໍາເລັດຫລາຍຂຶ້ນ.
ຂໍ້ມູນ-ພາບ: ໜັງສືພິມປະຊາຊົນ
KPL
