ຂປລ
ຢູ່ນະຄອນຫລວງ ຮ່າໂນ້ຍ, ສະຖາບັນສະພາດຳເນີນທຸລະກິດ ສ.ອາເມລິກາ-ອາຊຽນ ພ້ອມກັບ ບັນດາ ຄູ່ຮ່ວມມືໃຫຍ່ ຂອງ ສ.ອາເມລິກາ ໄດ້ມີການພົບປະ ແລະ ເຮັດວຽກກັບສະມາຄົມ ຫວຽດນາມ-ສ.ອາເມລິກາ.
ຂປລ.ວິທະຍຸກະຈາຍສຽງ ຫວຽດນາມ: ເມື່ອບໍ່ດົນມານີ້, ຢູ່ນະຄອນຫລວງ ຮ່າໂນ້ຍ, ສະຖາບັນສະພາດຳເນີນທຸລະກິດ ສ.ອາເມລິກາ-ອາຊຽນ ພ້ອມກັບ ບັນດາ ຄູ່ຮ່ວມມືໃຫຍ່ ຂອງ ສ.ອາເມລິກາ ໄດ້ມີການພົບປະ ແລະ ເຮັດວຽກກັບສະມາຄົມ ຫວຽດນາມ-ສ.ອາເມລິກາ. ໃນຂະນະດຽວກັນ, ສະຖາບັນ ສະພາ ດຳເນີນ ທຸລະກິດ ສ.ອາເມລິກາ-ອາຊຽນ ໄດ້ປະກາດບ້ວງເງິນ ຊ່ວຍເຫລືອ ເຄື່ອງອຸປະກອນ, ບຳລຸງສ້າງ ແລະ ມາດຕະການ ດ້ານເຕັກນິກ ທີ່ກ້າວໜ້າ ລວມມີ ມູນຄ່າ ຫລາຍກວ່າ 450.000 ໂດລາ ສະະຫລັດ, ເພື່ອໜູນຊ່ວຍ ຢ່າງຮອບດ້ານ ໃຫ້ແກ່ ບັ້ນການເຄື່ອນໄຫວ ຊອກຫາ ຜູ້ຫາຍສາບສູນ ແລະ ໄກ່ເກ່ຍ ຫລັງສົງຄາມ ຢູ່ ຫວຽດນາມ.
ທ່ານນາງ Margaret Hanson-Muse, ປະທານ ທັງເປັນ ຜູ້ອຳນວຍການໃຫຍ່ ສະຖາບັນ ສະພາ ດຳເນີນທຸລະກິດ ສ.ອາເມລິກາ-ອາຊຽນ ໃຫ້ຮູ້ວ່າ: ໂຄງການ ດັ່ງກ່າວ ແມ່ນການສືບຕໍ່ ແບບທຳມະຊາດ ໃຫ້ແກ່ ຄຳໝັ້ນສັນຍາ ຂອງ ຝ່າຍ ສ.ອາເມລິກາ ໃນການ ປັບປຸງ ຄວາມໄວ້ເນື້ອ ເຊື່ອໃຈ ແລະ ສາຍພົວພັນ ຄູ່ຮ່ວມມື ຍາວນານ ລະຫວ່າງສອງປະເທດ.
ການຮ່ວມມື ລະຫວ່າງ ລັດຖະບານ, ບັນດາ ບໍລິສັດ ແລະ ປະຊາຄົມ ຊ່ວຍແກ້ໄຂ ຜົນຮ້າຍ ຢ້ອນຫລັງ ຂອງການປະທະກັນ, ພ້ອມທັງ ສ້າງສາຍພົວພັນ ຢ່າງແໜ້ນແຟ້ນ ໃຫ້ແກ່ອະນາຄົດ. ນອກຈາກນັ້ນ, ສອງຝ່າຍ ຈະເປີດກວ້າງ ການຮ່ວມມື ໃນບາງຂົງເຂດ ຈຸດສຸມ, ເຊິ່ງລວມມີ: ການກຳຈັດສານ ດີໂອຊິນ, ສະຖິຕິ ຈຳນວນ ຜູ້ຫາຍສາບສູນ ໃນປາງສົງຄາມ ແລະ ການເກັບກູ້ ລະເບີດ ຍັງບໍ່ທັນແຕກ ຫລັງສົງຄາມ.
ສຳລັບ ຝ່າຍ ຫວຽດນາມ, ທ່ານຟ້າມກວາງວິງ ເອກອັກຄະລັດຖະທູດ , ປະທານ ສະມາຄົມ ຫວຽດນາມ-ສ.ອາເມລິກາ ໄດ້ຢັ້ງຢືນວ່າ ຈະສືບຕໍ່ ປະສານສົມທົບ, ຕິດຕໍ່ກັບ ບັນດາ ອົງການທ້ອງຖິ່ນ ເພື່ອຜັນຂະຫຍາຍ ໂຄງການດັ່ງກ່າວ ຢ່າງມີປະສິດທິຜົນ./
KPL
