ຂປລ
ເມື່ອກ້າວເຂົ້າສູ່ຍາມຮ້ອນອົບເອ້ົ້າ ເຮັດຫລາຍໆທ່ານກຳລັງຊອກຫາບ່ອນຜ່ອນຢ່ອນອາລົມທີ່ເຢັນສະບາຍອາກາດບໍລິສຸດບໍ່ໄກຈາກຕົວເມືອງເປັນເລື່ອງທ່ີຄິດຢາກ ແລະ ບໍ່ຮູ້ວ່າຈະໄປບ່ອນໃດດີ.
*ເມື່ອກ້າວເຂົ້າສູ່ຍາມຮ້ອນອົບເອ້ົ້າ ເຮັດຫລາຍໆທ່ານກຳລັງຊອກຫາບ່ອນຜ່ອນຢ່ອນອາລົມທີ່ເຢັນສະບາຍອາກາດບໍລິສຸດບໍ່ໄກຈາກຕົວເມືອງເປັນເລື່ອງທ່ີຄິດຢາກ ແລະ ບໍ່ຮູ້ວ່າຈະໄປບ່ອນໃດດີ. ມື້ນີ້ຜູ້ຂຽນຂໍແນະນໍາ ເພື່ອເປັນຂ້ໍມູນໃຫ້ທ່ານທີ່ສົນໃຈພາຄອບຄົວ, ພໍ່ແມ່, ຍາດພ່ີນ້ອງ, ຄົນຮັກ ແລະ ໝູ່ເພ່ືອນໄປສໍາຜັດບັນຍາກາດທ່ີແຕກຕ່າງອອກໄປໃນເຂດທ່ີບ່ໍໄກຈາກຕົວເມືອງພໍປານໃດນັ້ນຄື ສະຖານທີ່ທ່ອງທ່ຽວນ້ຳຕົກຕາດຫົວເສືອ ຕັ້ງຢູ່ບ້ານດ່ານຊີ ເມືອງນາຊາຍທອງ ຫ່າງຈາກນະຄອນຫລວງວຽງຈັນ ພຽງ 25 ກິໂລແມັດ ເຊິ່ງເສັ້ນທາງເຂົ້າໄປຫາຕາດນັ້ນ ສາມາດໄປໄດ້ທັງລົດໃຫຍ່ ແລະ ລົດຈັກ. ຕາດແຫ່ງນີ້ແມ່ນບໍ່ມີປ້າຍບອກທາງທີ່ຊັດເຈນ, ຜູ້ທີ່ໄປທ່ຽວໄປຊົມສ່ວນຫລາຍແມ່ນອາໄສຖາມປະຊາຊົນບໍລິເວນອ້ອມຂ້າງເມືອງນາຊາຍທອງ ແລະ ເມືອງໃກ້ຄຽງ ເພື່ອແນະນໍາ ແລະ ບອກຈຸດໝາຍປາຍທາງ.
ຖ້າທ່ານໃດມີຈຸດປະສົງຢາກໄປສໍາຜັດ ຫລື ໄປຫລິ້ນພຽງແຕ່ຂັບລົດໄປຕາມເສ້ັນທາງ 13 ເໜືອ ກາຍບ້ານຫົວຂົວ ເມືອງນາຊາຍທອງ ຂຶ້ນໄປແລ້ວໃຫ້ສັງເກດງ່າຍໆ ໃຜທີ່ເຄີຍໄປຕາດຍາວແມ່ນເສັ້ນທາງດຽວກັນທີ່ຈະເຂົ້າໄປຫາຕາດຫົວເສືອ ແຕ່ວ່າຈະຮອດຕາດຍາວກ່ອນຈຶ່ງຮອດຕາດຫົວເສືອ. ຖ້າຂັບລົດເລີ່ມຈາກທາງຫລວງ 13 ເໜືອ ເຂ້ົາໄປຫາບ້ານດ່ານຊີ ແລ້ວຂັບໄປເລື້ອຍໆຈົນເຖິງຕາດຫົວເສືອ ແມ່ນໃຊ້ເວລາປະມານ 30-45 ນາທີ.
ຕາດຫົວເສືອ ຖືໄດ້ວ່າເປັນອີກສະຖານທີ່ໜຶ່ງທີ່ມີຄວາມສວຍງາມຫລາຍອ້ອມຮອບບໍລິເວນນັ້ນ ສີຂຽນໄປດ້ວຍຕົ້ນໄມ້ໃຫຍ່ນ້ອຍຫລວງຫລາຍເຮັດໃຫ້ອາກາດເຢັນສະບາຍຈົນລືມຄວນອິດເມື່ອຍພຸ້ນລະ. ຕາດຫົວເສືອ ມີລັກສະນະພິເສດຢູ່ບ່ອນວ່າເປັນສາຍນໍ້າຫ້ວຍໂຕນລົງຈາກທີ່ສູງຜ່ານໂງ່ນຫີນມີຄວາມສູງປະມານ 20-30 ແມັດ, ສາຍນ້ຳທີ່ຕົກລົງມາ ແມ່ນມີຄວາມສວຍງາມຫລາຍເມື່ອກະທົບໃສ່ກັບໂງ່ນຫີນ ແລະ ມີແສງແດດອ່ອນໆສອດສ່ອງສະທ້ອນໃສ່ຂອບຟ້າອັນສ້າງຄວາມມະຫັດສະຈັນໃຫ້ຜູ້ພົບເຫັນ, ທາງດ້ານລຸ່ມກໍມີພື້ນທີ່ກວ້າງພໍທີ່ຈະລົງຫລິ້ນນ້ຳຖ້າທ່ານໄດ້ໄປສໍາຜັດຮັບຮອງວ່າຈະບໍ່ຜິດຫວັງແນ່ນອນ. ສຳລັບຜ້ທີ່ເດີນທາງໄປທ່ຽວໃນລະດູຝົນຍິ່ງເປັນສິ່ງທ້າທາຍ ແລະ ຈະໄດ້ເຫັນມວນນໍ້າໄຫລຈາກທີ່ສູງໂຕນລົງມາອັນໄດ້ສ້າງຄວາມເພີດເພີນ ແລະ ເບີກບານມ່ວນຊື່ນໃຫ້ທ່ານໄດ້ສຳຜັດຄວາມເປັນທໍາມະຊາດ, ຄວາມສະຫງົບ, ໄດ້ຍິນສຽງນົກ ແລະ ສຽງນໍ້າ ອັນໜ້າອອນຊອນໃຈ. ,
ໂດຍ: ແສງສະຫວັນໂດຍ: ແສງສະຫວັນ
KPL
