ຂປລ. ການທ່ອງທ່ຽວ ແມ່ນວຽກງານໜຶ່ງທີ່ພັກ, ລັດ ໃຫ້ຄວາມເອົາໃຈໃສ່ ແລະ ຖືເປັນວຽກງານໜຶ່ງທີ່ສຳຄັນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດ, ສ້າງວຽກເຮັດງານທໍາ, ສ້າງລາຍຮັບໃນການດໍາລົງຊີວິດ ໃຫ້ພໍ່ແມ່ປະຊາຊົນບັນດາເຜົ່າເປັນຢ່າງດີ, ປະກອບສ່ວນສຳຄັນ ເຂົ້າໃນການເຕີບໂຕ ທາງດ້ານເສດຖະກິດຂອງປະເທດຢ່າງຕໍ່ເນື່ອງ. ຢາກເຮັດໄດ້ແນວນັ້ນ ການເພີ່ມທະວີການຈັດຕັ້ງປະຕິບັດ ກົດໝາຍວ່າດ້ວຍການທ່ອງທ່ຽວ ແລະ ກົດໝາຍອື່ນທີ່ກ່ຽວຂ້ອງ ໂດຍການມີສ່ວນຮ່ວມ ຂອງປະຊາຊົນບັນດາເຜົ່າ ແລະ ການຕິດຕາມກວດກາ ຂອງອົງການ ໄອຍະການປະຊາຊົນ ເຂົ້າສູ່ຊີວິດຕົວຈິງຂອງສັງຄົມ ແມ່ນມີຄວາມຈຳເປັນເພື່ອໃຫ້ກົດໝາຍສັກສິດ.

ທ່ານ ສົມເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ຍົກໃຫ້ເຫັນຄວາມຮັບຮູ້ກ່ຽວກັບກົດໝາຍ, ການປະຕິບັດ, ການຈັດຕັ້ງປະຕິບັດ ກົດໝາຍວ່າດ້ວຍການທ່ອງທ່ຽວ ເຊິ່ງກົດໝາຍດັ່ງກ່າວ, ກຳນົດຫລັກການ, ລະບຽບ​ການ ແລະ ມາດ​ຕະການ ກ່ຽວ​ກກັບການ​ຄຸ້ມ​ຄອງ, ​ຕິດຕາມກວດກາ ວຽກ​ງານ​ທ່ອງ​ທ່ຽວ ເພື່ອ​ເຮັດ​ໃຫ້​ວຽກງານ​ດັ່ງກ່າວ, ມີ​ຄຸນ​ນະ​ພາບ, ປະສິດທິພາບ, ຊັບພະຍາກອນທ່ອງທ່ຽວ, ແຫລ່ງ​ທ່ອງ​ທ່ຽວ ແລະ ສະຖານທີ່ທ່ອງທ່ຽວ ໄດ້​ຮັບ​ການ​ອະນຸລັກ, ບູລະ ນະ ແລະ ຮັກສາ ແນໃສ່ຮັບປະກັນການສົ່ງເສີມ ແລະ ພັດທະນາ​ການທ່ອງທ່ຽວ ທາງ​ດ້ານທໍາ​ມະ​ຊາດ, ວັດທະນະທໍາ ແລະ ປະຫວັດສາດ ໃຫ້​ຂະຫຍາຍຕົວຢ່າງຕໍ່ເນື່ອງ, ກາຍເປັນ​ອຸດສາຫະກຳ​ທ່ອງ​ທ່ຽວທີ່​ທັນ​ສະໄໝ, ເສີມ​ສ້າງຄວາມ​ເຂົ້າໃຈ ເຊິ່ງ​ກັນ ແລະ ກັນ, ສັນຕິພາບ, ມິດຕະພາບສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການ ພັດທະນາ ເສດຖະກິດ-ສັງຄົມຂອງຊາດ ຕາມທິດສີຂຽວ ແລະ ຍືນຍົງ.

ກົດໝາຍວ່າດ້ວຍການທ່ອງທ່ຽວ ແມ່ນກົດໝາຍປົກຄອງ ທີ່ກຳນົດສາຍພົວພັນທາງດ້ານການ ທ່ອງທ່ຽວ ລະຫວ່າງ ລັດກັບປະຊາຊົນ ໂດຍະສະເພາະ ລະຫວ່າງ ກະຊວງ, ພະແນກ ແລະ ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ທີ່ເປັນຜູ້ຄຸ້ມຄອງການທ່ອງທ່ຽວ, ຜູ້ບໍລິການການທ່ອງທ່ຽວ ແລະ ນັກທ່ອງທ່ຽວ. ສະນັ້ນ ກົດໝາຍວ່າດ້ວຍການທ່ອງທ່ຽວ ຈຶ່ງສ້າງຂຶ້ນເພື່ອຄຸ້ມຄອງການ ທ່ອງທ່ຽວ ໂດຍສະເພາະ ການເຄື່ອນໄຫວຂອງພາກສ່ວນ​ຕ່າງໆໃນສາຍພົວພັນທ່ອງທ່ຽວ ຄື: ຜູ້ຄຸ້ມຄອງວຽກງານທ່ອງທ່ຽວ ໃນການຈັດຕັ້ງປະຕິບັດ ແລະ ການປະຕິບັດກົດໝາຍ ວ່າດ້ວຍການທ່ອງທ່ຽວ, ຜູ້ບໍລິການການທ່ອງທ່ຽວ ແລະ ນັກທ່ອງທ່ຽວ ໃຫ້ເປັນຕາມກົດໝາຍທີ່ໄດ້ກຳນົດໄວ້.

ສັງລວມແລ້ວ, ການ​ປະຕິບັດກົດໝາຍວ່າດ້ວຍການທ່ອງທ່ຽວ ແມ່ນມີຄວາມຈໍາເປັນ ເພື່ອໃຫ້ກົດໝາຍ ມີຄວາມສັກສິດຈຶ່ງ​ເລັ່ງທວງ ອົງການຄຸ້ມຄອງ ວຽກງານທ່ອງທ່ຽວ, ຜູ້ບໍລິການການທ່ອງທ່ຽວ, ນັກທ່ອງທ່ຽວ ແລະ ທົ່ວສັງຄົມ ເພີ່ມທະວີຄວາມຮັບຜິດຊອບຂອງຕົນ ​ໃນການປະ​ຕິ​ບັດ​ກົດ​ໝາຍຖືກ​ຕ້ອງ ແລະ ເປັນເອກະພາບ, ຍົກສູງບົດບາດການປົກຄອງ ດ້ວຍກົດໝາຍ, ບໍລິການຮັບໃຊ້ປະຊາຊົນ ດ້ວຍຄວາມຊື່ສັດບໍລິສຸດ, ປົກປ້ອງສິດ ແລະ ຜົນປະໂຫຍດອັນຊອບທໍາ ຂອງພົນລະເມືອງ, ເພີ່ມທະວີນິຕິທໍາ, ປະກອບສ່ວນເຮັດໃຫ້ຫາງສຽງຕ່າງໆ ຕໍ່ການປະຕິບັດໜ້າທີ່ ວຽກງານຂອງການຈັດຕັ້ງ ຂອງລັດຫລຸດລົງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດຂອງຊາດ ໄດ້ຮັບການພັດທະນາກ້າວຂຶ້ນຢ່າງບໍ່ຢຸດຢັ້ງ ​ຕາມ​ທິດ​ສັງ​ຄົມ​ນິ​ຍົມ.

ຂ່າວ: ກິດຕາ

KPL