ຂປລ
10 ເດືອນຂອງປີນີ້, ຍອດມູນຄ່າ ການຄ້າສິນຄ້າ ຂາເຂົ້າ-ຂາອອກ ຂອງ ສປ ຈີນ ເພີ່ມຂຶ້ນ 20% ເມື່ອທຽບໃສ່ ໄລຍະດຽວກັນ ຂອງປີກາຍ, ສືບຕໍ່ຮັກສາທ່າອຽງ ເພີ່ມຂຶ້ນ ຢ່າງເຂັ້ມແຂງ.
ຂປລ.ວິທະຍຸ ໂທລະພາບ ສູນກາງຈີນ, ອີງຕາມຕົວເລກ ສະຖິຕິ ຫລ້າສຸດ ທີ່ອົງການພາສີ ແຫ່ງຊາດຈີນ ເປີດເຜີຍ ໃນວັນທີ 11 ພະຈິກນີ້ວ່າ: 10 ເດືອນຂອງປີນີ້, ຍອດມູນຄ່າ ການຄ້າສິນຄ້າ ຂາເຂົ້າ-ຂາອອກ ຂອງ ສປ ຈີນ ເພີ່ມຂຶ້ນ 20% ເມື່ອທຽບໃສ່ ໄລຍະດຽວກັນ ຂອງປີກາຍ, ສືບຕໍ່ຮັກສາທ່າອຽງ ເພີ່ມຂຶ້ນ ຢ່າງເຂັ້ມແຂງ. ໃນ 10 ເດືອນຂອງປີນີ້, ຍອດມູນຄ່າ ຂາເຂົ້າ-ຂາອອກ ຂອງ ສປ ຈີນ ກັບ 180 ກວ່າປະເທດ ແລະ ເຂດແຄວ້ນ ມີການເຕີບໂຕເພີ່ມຂຶ້ນ, ໃນນັ້ນ, ຍອດມູນຄ່າ ຂາເຂົ້າ-ຂາອອກ ກັບຕະຫລາດ ຈະເລີນໃໝ່ຕ່າງໆ ຄື: ອາຊຽນ, ອາເມລິກາລາຕິນ ແລະ ອາຟຣິກາ ຕ່າງໄດ້ເພີ່ມຂຶ້ນ 24,2%, 14,4% ແລະ 17,6% ຕາມລຳດັບ, ສ່ວນຍອດມູນຄ່າ ຂາເຂົ້າ-ຂາອອກ ກັບສະຫະພາບ ເອີຣົບ ແລະ ສ.ອາເມລິກາ ເພີ່ມຂຶ້ນ 8,5% ແລະ 6,3% ຕາມລຳດັບ. ໃນໄລຍະດຽວກັນ, ຍອດມູນຄ່າຂາເຂົ້າ-ຂາອອກ ຂອງ ສປ ຈີນ ກັບເຂດເສດຖະກິດອື່ນ ໃນອົງການຮ່ວມມື ເສດຖະກິດ ອາຊີ ປາຊີຟິກ ຫລື APEC ມີເຖິງ 27.080 ຕື້ຢວນ, ເພີ່ມຂຶ້ນ 25.4% ແລະ ຍອດມູນຄ່າ ຂາເຂົ້າ-ຂາອອກຂອງ ສປ ຈີນ ກັບປະເທດ ທີ່ຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ມີເຖິງ 22.880 ຕື້ຢວນ, ເພີ່ມຂຶ້ນ 18,5%./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
