ຂປລ.ວິທະຍຸກະຈາຍສຽງ ຫວຽດນາມ: ​ໃນ​ຕອນ​ເຊົ້າ​ວັນ​ທີ 01 ເມ​ສາ, ຢູ່​ນະຄອນຫລວງ ຮ່າ​ໂນ້ຍ(ຫວຽດນາມ), ກະ​ຊວງກ​ະ​ສິ​ກຳ ແລະ ສິ່ງ​ແວດ​ລ້ອມ ຫວຽດ​ນາມ ໃຫ້​ຮູ້​ວ່າ: ໄລ່​ສະ​ເລ່ຍ 3 ເດືອນ ​ຕົ້ນ​ປີ 2026, ວົງ​ເງິນ​ສົ່ງ​ອອກ ​ຜະ​ລິດ​ຕະ​ພັນ​ກະ​ເສດ, ເຄື່ອງ​ປ່າ​ຂອງ​ດົງ, ສິນ​ໃນ​ນ້ຳ ​ບັນ​ລຸ 16,69 ຕື້ໂດລາສະຫະລັດ (ເພີ່ມ​ຂຶ້ນ 5,9% ເມື່ອ​ທຽບ​ໃສ່ ​ໄລ​ຍະ​ດຽວ​ກັນ​ຂອງ​ປີ 2025). ໂດຍສະເພາະ ວົງ​ເງິນ​ສົ່ງ​ອອກ​ ຜະ​ລິດ​ຕະ​ພັນ ​ກະ​ເສດ, ເຄື່ອງ​ປ່າ​ຂ​ອງ​ດົງ, ສິນ​ໃນ​ນ້ຳ​ ໃນ​ເດືອນເມ​ສາ 2026,  ຄາດ​ວ່າ ຈະ​ບັນ​ລຸ 6,02 ຕື້ໂດລາສະຫະລັດ (ເພີ່ມຂຶ້ນ​ເຖິງ 47,8% ເມື່ອ​ທຽບ​ໃສ່​ເດືອນ​ຜ່ານມາ).

ໃນ​ນັ້ນ, ການ​ສົ່ງ​ອອກ ​ຜະ​ລິດ​ຕະ​ພັນ​ ກະ​ເສດ​ ບັນ​ລຸ 8,93 ຕື້ໂດລາສະຫະລັດ; ສິນ​ໃນ​ນ້ຳ​ບັນ​ລຸ 2,62 ຕື້ ໂດລາສະຫະລັດ. ຕົວເລກ ດັ່ງກ່າວ ໄດ້ສະແດງໃຫ້ເຫັນເຖິງ ​ ລະ​ດັບ​ການ​ເຕີບ​ໂຕ​ ຢ່າງ​ຕັ້ງ​ໜ້າ. ໂດຍສະເພາະ ການ​ສົ່ງ​ອອກ​ຜະ​ລິດ​ຕະ​ພັນ ​ສັດ​ລ້ຽງ​ເພີ່ມ​ຂຶ້ນ 54,3%, ບັນ​ລຸ​ເກືອບ 198 ລ້ານໂດລາສະຫະລັດ. ໃນຂະນະດຽວກັນ, ການ​ສົ່ງ​ອອກ​ຜະ​ລິດ​ຕະ​ພັນ​ ເຄື່ອງ​ປ່າ​ ຂອງ​ດົງ ຫລຸດ​ລົງ​ ເລັກ​ນ້ອຍ 2,4%, ຍ້ອນວ່າ ຜະເຊີນກັບ ຄວາມ​ຫຍຸ້ງ​ຍາກ​ ກ່ຽວ​ກັບ​ ຕະຫລາດ ແລະ ຄວາມ​ຕ້ອງ​ການ​ບໍ​ລິ​ໂພກ. ຖ້າ​ຄິດ​ໄລ່​ ຕາມ​ຕະຫລາດ​ແລ້ວ, ອາ​ຊີ ຍັງສືບ​ຕໍ່ ​ເປັນ​ພື້ນທີ່ ​ບໍ​ລິ​ໂພກບັນ​ດາ​ ປະ​ເພດ​ສິນ​ຄ້າ​ ຜະ​ລິດ​ຕະ​ພັນ ​ກະ​ເສດ, ເຄື່ອງ​ປ່າ​ຂອງ​ດົງ, ສິນ​ໃນ​ນ້ຳ​ຂອງ ຫວຽດ​ນາມ ຫລາຍ​ທີ່​ສຸດ, ກວມ​ເອົາກວ່າ 45% ອັດ​ຕາ​ສ່ວນ​ ໃນຕະຫລາດ. ຖັດ​ມາ​ແມ່ນ ​ທະ​ວີບ ອາ​ເມ​ລິ​ກາ ແລະ ເອີ​ຣົບ, ໃນ​ຂະ​ນະ​ທີ່ ອາ​ຟຣິ​ກາ ແລະ ທະ​ວີບໂອ​ເຊ​ອາ​ນີ ກວມ​ເອົາ​ ອັດ​ຕາສ່ວນ​ໜ້ອຍ./

KPL