ຂປລ
ຂປລ. ເມື່ອເວົ້າເຖິງຜະລິດຕະພັນລາວທີ່ຄົນລາວເຮົານິຍົມບໍລິໂພກກໍຕ້ອງແມ່ນຜະລິດຕະພັນປະເພດຊາ ແລະ ກາເຟ ເນື່ອງຈາກວ່າ ບ້ານເຮົາມີວັດຖຸດິບທີ່ດີ ແລະ ມີຊື່ສຽງ ຢູ່ແຕ່ລະທ້ອງຖິ່ນ ຈຶ່ງເຮັດໃຫ້ນັກທຸລະກິດຫລາຍທ່ານ ເຫັນເຖິງຄວາມສໍາຄັນ ຈຶ່ງຫັນປ່ຽນວັດຖຸດິບທີ່ມີຢູ່ໃນທໍາມະຊາດ ມາປຸງແຕ່ງເປັນຜະລິດຕະພັນທີ່ດີມີຄຸນນະພາບຕໍ່ສຸຂະພາບຂອງຄົນເຮົາ
ຂປລ. ເມື່ອເວົ້າເຖິງຜະລິດຕະພັນລາວ ທີ່ຄົນລາວເຮົານິຍົມບໍລິໂພກກໍຕ້ອງ ແມ່ນຜະລິດຕະພັນປະເພດຊາ ແລະ ກາເຟ ເນື່ອງຈາກວ່າ ບ້ານເຮົາມີວັດຖຸດິບທີ່ດີ ແລະ ມີຊື່ສຽງ ຢູ່ແຕ່ລະທ້ອງຖິ່ນ ຈຶ່ງເຮັດໃຫ້ນັກທຸລະກິດຫລາຍທ່ານ ເຫັນເຖິງຄວາມສໍາຄັນ ຈຶ່ງຫັນປ່ຽນວັດຖຸດິບທີ່ມີຢູ່ໃນທໍາມະຊາດ ມາປຸງແຕ່ງເປັນຜະລິດຕະພັນທີ່ດີມີຄຸນນະພາບ ຕໍ່ສຸຂະພາບຂອງຄົນເຮົາ ເປັນຕົ້ນ ກາເຟ, ຊາດອກກາເຟ, ດອກຊາ, ຫົວໂສມ ,ຊາຂາວຈາກຍອດຊາ, ຊາເປືອກກາເຟ, ເຫລົ້າບອງໂສມ, ນ້ຳເຜີ້ງປ່າ, ນ້ຳດື່ມ ຈາກບໍລິສັດ ສະຕາດາກຈຶ້ງການຄ້າ ແລະ ການບໍລິການ ຈຳກັດຜູ້ດຽວ.
ທ່ານ ສຸດໃຈ ສີວິໄລ ຜູ້ບໍລິຫານບໍລິສັດ ສະຕາດາກຈຶ້ງການຄ້າ ແລະ ການບໍລິການ ຈຳກັດຜູ້ດຽວ ໄດ້ໃຫ້ສຳພາດໃນໂອກາດເຂົ້າຮ່ວມງານ ວາງສະແດງຜະລິດຕະພັນຫົວໜ່ວຍ ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ຂອງລາວ ປີ 2026 ວ່າ: ຈຸດກຳເນີດ ສະຕາດາກຈຶ້ງຄັອບຟີ ເລີ່ມປີ 2018 ເປັນຕົ້ນມາ ທາງຄອບຄົວໄດ້ດຳລົງຊີວິດຢູ່ ເມືອງດາກຈຶງ ແຂວງເຊກອງ ຊຶ່ງເປັນເຂດທີ່ມີທ່າແຮງ ໃນການປູກກາເຟ ຈຶ່ງເລັງເຫັນວ່າ ວັດຖຸດິບເຫລົ່ານີ້ ສາມາດຂາຍ ແລະ ຜະລິດເປັນສິນຄ້າໄດ້ ຈຶ່ງໄດ້ຕັດສິນໃຈເປີດຮ້ານກາເຟ ຂຶ້ນມາ ເຫັນວ່າມີຜົນຕອບຮັບດີພໍສົມຄວນ ເພາະເປັນທຸລະກິດໃໝ່ ທີ່ສ້າງຄວາມສົນໃຈໃຫ້ກັບໄວໜຸ່ມຫລາຍ, ຫລັງຈາກດຳເນີນທຸລະກິດມາໄດ້ 1 ປີ ກໍໄດ້ຂະຫຍາຍສາຂາທີ 2 ຢູ່ ບ້ານ ຄຳສະຫວາດ ເມືອງໄຊເສດຖາ ນະຄອນຫລວງວຽງຈັນ, ພາຍຫລັງເປີດໃຫ້ບໍລິການແລ້ວເຫັນວ່າມີຄົນສົນໃຈ ແລະ ມີຫລາຍຄົນຢາກມາຂໍຊື້ ແຟນຊາຍ (ເຄືອຂ່າຍ) ຈຶ່ງຕັດສິນໃຈ ເປີດເປັນບໍລິສັດ ສະຕາດາກຈຶ້ງ ການຄ້າ ແລະ ການບໍລິການ ພ້ອມຈົດລິຂະສິດ ຫຍີ່ຫໍ້, ໂລໂກ້. ພ້ອມນັ້ນ, ກໍໄດ້ຂາຍແຟນຊາຍທຳອິດຢູ່ ແຂວງຫລວງພະບາງ. ສໍາລັບນະຄອນຫລວງວຽງຈັນ ໄດ້ຂະຫຍາຍສາຂາຕື່ມອີກ ຢູ່ເດີ່ນທາດຫລວງ, ບ້ານໂພນສີນວນ ແລະ ໃນຕຶກອາຄານສຳນັກງານນາຍົກລັດຖະມົນຕີ (ຊັ້ນ3). ນອກນັ້ນ, ຍັງມີສາຂາວັງວຽງ, ເມືອງເຟືອງ, ເມືອງດາກຈຶງ, ແລະ ປາກເຊ . ນອກຈາກການຈຳໜ່າຍພາຍໃນປະເທດແລ້ວ, ບໍລິສັດຍັງມີແຜນຈະສົ່ງອອກວັດຖຸດິບເມັດກາເຟໄປຍັງ ປະເທດເພື່ອນບ້ານເຊັ່ນ: ຫວຽດນາມ ແລະ ຈີນ ໃນມໍ່ໆນີ້ . ເຖິງແນວໃດກໍດີ, ສໍາລັບຜະລິດຕະພັນແມ່ນມີ: ກາເຟ, ຊາ(ຊາດອກກາເຟ,ຊາດອກຊາ,ຊາຈາກຫົວໂສມ,ຊາຂາວຈາກຍອດຊາ,ຊາເປືອກກາເຟ), ເຫລົ້າບອງໂສມ, ນ້ຳເຜີ້ງປ່າ,ນ້ຳດື່ມ ຊຶ່ງວັດຖຸດິບທີ່ນໍາມາແປຮູບ ແມ່ນນຳໃຊ້ວັດຖຸດິບຈາກສວນເມືອງດາກຈຶງ 100% ແລະ ເປັນຜະລິດຕະພັນຈາກທຳມະຊາດ,ປອດສານເຄມີ ຈົນໄດ້ຮັບກາໝາຍໂອດັອບ (ODOP) ຊຶ່ງຢັ້ງຢືນເຖິງຄຸນນະພາບ ແລະ ເອກະລັກຂອງທ້ອງຖິ່ນ.
ທ່ານ ສຸດໃຈ ເວົ້າເສີມອີກວ່າ: ການເຂົ້າຮ່ວມວາງສະແດງ ຜະລິດຕະພັນຫົວໜ່ວຍຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງຂອງລາວ ປີ 2026 ໃນຄັ້ງນີ້, ຜົນຕອບຮັບດີຫລາຍ ໃນແຕ່ລະມື້ມີມວນຊົນໃຫ້ຄວາມສົນໃຈ ມາຊິມມາຊື້ຜະລິດຕະພັນ ທາງບໍລິສັດຢ່າງຫລວງຫລາຍ, ພ້ອມດຽວກັນນັ້ນກໍໄດ້ຄູ່ຮ່ວມທຸລະກິດໃໝ່ໆ,ໄດ້ຮຽນຮູ້ຈາກນັກວິຊາການດ້ານການຄ້າ ແລະ ໄດ້ຮັບຄຳຕຳນິຕິຊົມເພື່ອເປັນບົດຮຽນ ທີ່ຈະນໍາເອົາໄປປັບປຸງ ໃນທຸລະກິດໃຫ້ດີຂຶ້ນເລື້ອຍໆ. ສໍາລັບລາຄາຜະລິດຕະພັນ ຊາ ເລີ່ມຕົ້ນແຕ່ 50.000-500.000 ກີບຕໍ່ກັບ, ສ່ວນກາເຟຂົ້ວລາຄາ 400.000-500.000 ກີບຕໍ່ 1 ກິໂລ, ເອົາເປັນວ່າ ລູກຄ້າທີ່ສົນ ໃຈສາມາດຫາຊື້ໄດ້ທີ່ທຸກສາຂາ ຫລື ຕິດຕໍ່ສອບຖາມຂໍ້ມູນເພີ່ມເຕີມໄດ້ທີ່ເບີໂທລະສັບ 020 77701497.
KPL
