ຂປລ
ຂປລ. ນະຄອນໄກສອນ ພົມວິຫານ ແຂວງສະຫວັນນະເຂດ ເປັນອີກເມືອງໜຶ່ງທີ່ໄດ້ຮັບລາງວັນເມືອງມາດຕະຖານທ່ອງທ່ຽວສະອາດອາຊຽນ ເນື່ອງຈາກວ່າ ໄດ້ຮັບມາດຕະຖານ ດ້ານການຄຸ້ມຄອງສິ່ງແວດລ້ອມ, ຄວາມສະອາດ, ການກຳຈັດສິ່ງເສດເຫລືອ, ການປູກຈິດສໍານຶກດ້ານການຮັກສາສິ່ງແວດລ້ອມ ແລະ ຄວາມສະອາດ, ຄວາມປອດໄພດ້ານສຸຂະພາບ, ຄວາມປອດໄພ ແລະ ຄວາມສະຫງົບໃນຕົວເມືອງ
ຂປລ. ນະຄອນໄກສອນ ພົມວິຫານ ແຂວງສະຫວັນນະເຂດ ເປັນອີກເມືອງໜຶ່ງທີ່ໄດ້ຮັບລາງວັນເມືອງມາດຕະຖານທ່ອງທ່ຽວສະອາດອາຊຽນ ເນື່ອງຈາກວ່າ ໄດ້ຮັບມາດຕະຖານ ດ້ານການຄຸ້ມຄອງສິ່ງແວດລ້ອມ, ຄວາມສະອາດ, ການກຳຈັດສິ່ງເສດເຫລືອ, ການປູກຈິດສໍານຶກດ້ານການຮັກສາສິ່ງແວດລ້ອມ ແລະ ຄວາມສະອາດ, ຄວາມປອດໄພດ້ານສຸຂະພາບ, ຄວາມປອດໄພ ແລະ ຄວາມສະຫງົບໃນຕົວເມືອງ, ພື້ນທີ່ສີຂຽວ, ພື້ນຖານໂຄງລ່າງ ແລະ ສິ່ງອຳນວຍຄວາມສະດວກຕ່າງໆ ດ້ານການທ່ອງທ່ຽວ. ສະນັ້ນ, ຈຶ່່ງເຮັດໃຫ້ ນະຄອນ ໄກສອນ ພົມວິຫານ ຕິດ 1 ໃນ 4 ເມືອງທີ່ໄດ້ຮັບລາງວັນມາດຕະຖານທ່ອງທ່ຽວສະອາດອາຊຽນ ປີ 2026- 2028.
ທ່ານ ລຳພູນ ວໍລະວົງ ຫົວໜ້າພະແນກວັດທະນະທຳ ແລະ ການທ່ອງທ່ຽວ ແຂວງສະຫວັນນະເຂດ ໃຫ້ຮູ້ວ່າ: ວຽກງານການທ່ອງທ່ຽວໃນປັດຈຸບັນ, ຕ້ອງມີການເຊື່ອມໂຍງ, ເຊື່ອມຈອດເຊິ່ງກັນ ແລະ ກັນ ເພື່ອເປັນທາງຜ່ານໄປມາຫາສູ່ກັນ ເປັນຕົ້ນ ມາຈາກໄທ ໄປ ສສ ຫວຽດນາມ, ມາຈາກນະຄອນຫລວງວຽງຈັນ ກໍຜ່ານເມືອງອຸທຸມພອນ ເພາະເປັນເມືອງ 4 ທິດ ໄປທາງໃດກໍຕ້ອງໄດ້ຜ່ານ. ດັ່ງນັ້ນ, ເພື່ອຕິດພັນກັບຂົງເຂດວຽກງານວັດທະນະທຳ ແລະ ການທ່ອງທ່ຽວ ຢູ່ເມືອງອຸທຸມພອນ ກໍໄດ້ສ້າງຄຸນຄ່າທາງດ້ານອາຫານ ເປັນຕົ້ນ ປີ້ງໄກ່ເຊໂນ ແລະ ແນະນໍານັກທ່ອງທ່ຽວໃຫ້ມາຊີມປີ້ງໄກ່ເຊໂນ. ພ້ອມກັນນັ້ນ, ເມື່ອໄດ້ມາແຂວງສະຫວັນນະເຂດ ຕ້ອງທ່ອງທ່ຽວຕາມແຜນ 3 ໄຫວ້ 4 ເບິ່ງ 5 ຊົມ ຄື: 3 ໄຫວ້ປະກອບມີ: ໄຫວ້ພະຍາດອິງຮັງ, ໄຫວ້ພະທາດໂພ່ນ ແລະ ໄຫວ້ຫໍໄຕປີດົກ ເຊິ່ງເປັນບ່ອນສະສົມຂອງຄັງໃບລານ; ທ່ອງທ່ຽວ 4 ເບິ່ງປະກອບມີ: ເບິ່ງຫໍພິພິທະພັນສະຫວັນນະເຂດ, ຫໍພິພິທະພັນໄດໂນເສົາ, ຫໍພິພິທະພັນຮ່ວມສໍາພັນສູ້ຮົບໄຊຊະນະ ລາວ-ຫວຽດນາມ ແລະ ເບິ່ງມໍລະດົກສະຖານໜອງເຮືອທອງ;ທ່ອງທ່ຽວ 5 ຊົມ ປະກອບມີ: ທ່ຽວຊົມຕົວເມືອງເກົ່າປະຫວັດສາດ ໜອງຫລົ່ນ, ປ່າສະຫງວນດົງນາຕາດ ນະຄອນ ໄກສອນ ພົມວິຫານ; ທ່ຽວຊົມຝູງລີ, ປາຝາ, ຝາຍສຸຍຈໍາພອນ; ທ່ຽວຊົມໂອງ-ມັ້ງ, ນົກຍາງຂາວ, ແຫລ່ງຂຸດຄົ້ນກະດູກໄດໂນເສົາຊົນນະບູລີ; ທ່ຽວຊົມວັດຖຸບູຮານ ດອນຫີນດ້າງ, ໂພນຊ້າງສານ, ເມືອງບູຮານ ສີສະເກດ, ສວນຕານ ແລະ ເຮືອນຫີນໄຊພູທອງ; ທ່ຽວຊົມພະທາດນາງຂາວ, ພະເຈົ້າອົງແສນ, ຫີນສາມເສົ້າ, ນໍ້າເກົ້າແຄ ວິລະບູລີ. ນີ້ຄືວົງແຫວນແຫ່ງການທ່ອງທ່ຽວຂອງແຂວງສະຫວັນນະເຂດ. ສະນັ້ນ, ເພື່ອເຮັດໃຫ້ ວຽກງານ 3 ໄຫວ້ 4 ເບິ່ງ 5 ຊົມ ໃຫ້ປະກົດຜົນເປັນຈິງ, ແຂວງສະຫວັນນະເຂດ ມີການແຕ່ງເພງກອນລໍາ 4 ຈັງຫວະ ຄື: ລໍາບ້ານຊອກ, ລໍາຄອນສະຫວັນ, ລໍາຕັ້ງຫວາຍ ແລະ ລໍາຜູ້ໄທ ເພື່ອສ້າງເອກະລັກຂອງແຂວງ. ສະນັ້ນ, ການປະເມີນມາດຕະຖານທ່ອງທ່ຽວສະອາດອາຊຽນ ກໍເປັນລາງວັນ ທີ່ມີຄວາມສໍາຄັນ ແລະ ຈໍາເປັນຢ່າງຍິ່ງ ທີ່ຈະຊ່ວຍປັບປຸງມາດຕະຖານການບໍລິການ ການທ່ອງທ່ຽວ ຢູ່ ສປປ ລາວໃຫ້ດີຂຶ້ນ, ນັກທ່ອງທ່ຽວ ຈະມີຄວາມໝັ້ນໃຈຫລາຍຂຶ້ນເມື່ອເຂົ້າມາໃຊ້ບໍລິການ, ບັນດາຜູ້ປະກອບການທຸລະກິດ ແລະ ບັນດາພາກສ່ວນທີ່ກ່ຽວຂ້ອງ ທີ່ໄດ້ຮັບໃບຢັ້ງຢືນ ແລະ ແຜ່ນປ້າຍລາງວັນມາດຕະຖານການທ່ອງທ່ຽວອາຊຽນສາມາດນໍາໃຊ້ໃນການສົ່ງເສີມການຕະຫລາດ ເພື່ອດຶງດູດນັກທ່ອງທ່ຽວໃຫ້ຫລາຍຂຶ້ນ.
ໂດຍ: ມາລີດາ
KPL
