ຂປລ. ດັ່ງທີ່ຮູ້ນຳກັນແລ້ວວ່າ, ບຸນພະເຫວດສັນດອນ ແມ່ນບຸນປາງໃຫຍ່ປະຈຳປີຂອງຄົນລາວຊາວພຸດ ເປັນບຸນຕາມຮີດ 12 ຄອງ 14 ປະເພນີຂອງລາວ ຊຶ່ງປະຊາຊົນລາວຊາວພຸດໄດ້ຈັດຂຶ້ນໃນທຸກໆປີຂອງແຕ່ລະບ້ານ ແລະ ເມື່ອມໍ່ໆມານີ້ອົງການປົກຄອງບ້ານທາງແບ່ງຫລັກ 48 ເມືອງປະທຸມພອນ ແຂວງຈຳປາສັກ ຮ່ວມກັບພໍ່ແມ່ປະຊາຊົນ ແລະ ພາກສ່ວນກ່ຽວຂ້ອງ ໄດ້ຈັດງານບຸນມະຫາຊາດ ຫລື ງານແຫ່ພະເຫວດສັນດອນຊາດົກເຂົ້າເມືອງ ປະຈຳປີ 2026 ຂຶ້ນຢ່າງຍິ່ງໃຫຍ່ ເພື່ອເປັນການອະນຸລັກຮັກສາວັດທະນະທຳຮີດຄອງປະເພນີອັນດີງາມຂອງຊາດ ກໍຄື ຂອງທ້ອງຖິ່ນໃຫ້ຍືນຍົງຕະຫລອດໄປ.

ພິທີເລີ່ມຕົ້ນດ້ວຍການອັງເຊີນພະເຫວດສັນດອນເຂົ້າເມືອງ ຕາມຄວາມເຊື່ອທາງພຸດທະສາສະໜາ ໂດຍມີຂະບວນແຫ່ທີ່ຕົກແຕ່ງຢ່າງງົດງາມ ແລະ ຫລາກຫລາຍ ຊຶ່ງປະກອບມີ: ຂະບວນນາງສັງຂານ ແລະ ປ້າຍຄຳຂວັນ ນຳໜ້າດ້ວຍຄວາມສະຫງ່າງາມ, ຂະບວນພະສົງ-ສາມະເນນ ເພື່ອເປັນສິລິມົງຄຸນແກ່ຜູ້ເຂົ້າຮ່ວມ. ຂະບວນແຫ່ພະເຫວດສັນດອນທີ່ຈຳລອງເຫດການສຳຄັນໃນຊາດົກ, ຂະບວນມະໂຫລີ, ສ້າງຄວາມຄຶກຄື້ນດ້ວຍສຽງກອງ ແລະ ສຽງຂັບລຳຕາມແບບສະບັບທ້ອງຖິ່ນ ແລະ ຂະບວນຊ້າງ - ມ້າ ແລະ ສິລະປະການສະ ແດງຟ້ອນອັນອ່ອນຊ້ອຍຈາກນ້ອງໆນັກຮຽນ ມສ 48 ທີ່ສະທ້ອນເຖິງວິຖີຊີວິດ ແລະ ເອກະລັກຂອງຊຸມຊົນ.



ທ່ານ ສຳລານ ແສນທະວີສຸກ ເລຂາພັກບ້ານ, ນາຍບ້ານໆທາງແບ່ງຫລັກ 48 ໃຫ້ສຳພາດວ່າ: ການຈັດງານໃນປີນີ້ຖືເປັນປີທີ 3 ຕິດຕໍ່ກັນ ເຊິ່ງມີຈຸດປະສົງຫລັກເພື່ອປູກຈິດສຳນຶກໃຫ້ຮຸ່ນລູກຫລານໄດ້ຮຽນຮູ້ ແລະ ສືບສານມໍລະດົກທາງວັດທະນະທຳ. ພ້ອມດຽວກັນນັ້ນ, ຍັງເປັນການລະດົມທຶນຈາກຜູ້ມີຈິດສັດທາ ເພື່ອນຳໄປສົມທົບທຶນໃນການບູລະນະປະຕິສັງຂອນ ແລະ ກໍ່ສ້າງວັດວາອາຮາມພາຍໃນບ້ານທີ່ຍັງບໍ່ທັນສຳເລັດ ໃຫ້ມີຄວາມຈົບງາມຕາມຈຸດປະສົງ ເຊິ່ງບຸນດັ່ງກ່າວບໍ່ພຽງແຕ່ເປັນການເຮັດບຸນຕາມປະເພນີເທົ່ານັ້ນ, ແຕ່ຍັງເປັນການສົ່ງເສີມການທ່ອງທ່ຽວທາງວັດທະນະທຳ ເພື່ອດຶງດູດແຂກຕ່າງດ້າວທ້າວຕ່າງເມືອງໃຫ້ເຂົ້າມາສຳຜັດວິຖີຊີວິດຂອງຊາວບ້ານທາງແບ່ງ ພ້ອມທັງເປັນການຊ່ວຍກະຕຸ້ນເສດຖະກິດ ແລະ ສ້າງລາຍຮັບໃຫ້ແກ່ປະຊາຊົນໃນທ້ອງຖິ່ນອີກດ້ວຍ.



ທ່ານ ສຳລານ ແສນທະວີສຸກ ກ່າວຕື່ມວ່າ: ງານບຸນໃນຄັ້ງນີ້ໄດ້ສໍາເລັດລົງດ້ວຍຄວາມເບີກບານມ່ວນຊື່ນ ແລະ ເຕັມໄປດ້ວຍຮອຍຍິ້ມແຫ່ງຄວາມສາມັກຄີ ທີ່ສະແດງໃຫ້ເຫັນເຖິງຄວາມພ້ອມພຽງຮຽງໜ້າຂອງຊາວບ້ານທາງແບ່ງຫລັກ 48 ໃນການຮັກສາຮີດ 12 ຄອງ 14 ໃຫ້ຮຸ່ງເຮືອງສືບໄປ.