ຂປລ
ຂປລ. ທ້າຍອາທິດຜ່ານມານີ້, ອະນຸກຳມະການຮັບຜິດຊອບເລືອກຕັ້ງສະມາຊິກສະພາແຫ່ງຊາດ(ສສຊ) ຊຸດທີ X ແລະ ສະພາປະຊາຊົນຂັ້ນແຂວງ (ສສຂ) ຊຸດທີ V ເມືອງຮົ່ມ ແຂວງໄຊສົມບູນ ໄດ້ເຄື່ອນໄຫວເຜີຍແຜ່ເອກະ ສານສຳຄັນ ກ່ຽວກັບການເລືອກຕັ້ງ ສສຊ-ສສຂ ເຂດເລືອກຕັ້ງທີ 18 ແຂວງໄຊສົມບູນ.
ຂປລ. ທ້າຍອາທິດຜ່ານມານີ້, ອະນຸກຳມະການຮັບຜິດຊອບເລືອກຕັ້ງສະມາຊິກສະພາແຫ່ງຊາດ(ສສຊ) ຊຸດທີ X ແລະ ສະພາປະຊາຊົນຂັ້ນແຂວງ (ສສຂ) ຊຸດທີ V ເມືອງຮົ່ມ ແຂວງໄຊສົມບູນ ໄດ້ເຄື່ອນໄຫວເຜີຍແຜ່ເອກະ ສານສຳຄັນ ກ່ຽວກັບການເລືອກຕັ້ງ ສສຊ-ສສຂ ເຂດເລືອກຕັ້ງທີ 18 ແຂວງໄຊສົມບູນ. ນໍາພາໂດຍ ທ່ານ ທອງ ຄຳ ສີບຸນເຮືອງ ຮອງປະທານ ແນວລາວສ້າງຊາດເມືອງຮົ່ມ.ມີອຳນາດ ການປົກຄອງບ້ານ, ປະຊາຊົນຜູ້ມີສິດເລືອກຕັ້ງເຂົ້າຮ່ວມຮັບຟັງ.
ທ່ານ ທອງຄຳ ສີບຸນເຮືອງ ໄດ້ເຜີຍແຜ່ເອສານ ກະກຽມແກ່ບັ້ນເລືອກຕັ້ງ ສສຊ-ສສຂ ເຂດເລືອກຕັ້ງທີ 18 ແຂວງໄຊສົມບູນ ໂດຍມີເອກະສານສຳຄັນຄື: ເອກະສານເຊື່ອມຊຶມ ແລະ ຜັນຂະ ຫຍາຍມະຕິກົມການເມືອງສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາຂອງອົງຄະນະພັກ ທຸກຂັ້ນ ຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງຊຸດທີ V; ເອກະສານຄໍາຖາມ-ຄໍາຕອບກ່ຽວກັບສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອການເລືອກຕັ້ງ ສະມາຊິກສະພາແຫ່ງຊາດຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V; ເອກະສານ ເພີ່ມທະວີການນໍາພາແນວຄິດ, ເສີມຂະຫຍາຍສິດປະຊາທິປະໄຕ ຂອງປະຊາຊົນລາວບັນດາເຜົ່າ ເພື່ອການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V; ເອກະສານ ເຊື່ອມຊຶມ ແລະ ຈັດຕັ້ງປະຕິບັດແຜນການດໍາເນີນງານ ຂອງຄະນະກຳມະການເລືອກຕັ້ງລະດັບຊາດ ເພື່ອການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ໃຫ້ປະກົດຜົນເປັນຈິງ; ເອກະສານກຳແໜ້ນເນື້ອໃນ ສໍາຄັນຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເຮັດໃຫ້ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ດໍາເນີນ ຖືກຕ້ອງຕາມກົດໝາຍ, ສອດຄອງກັບສະ ພາບຕົວຈິງ ຂອງແຕ່ລະທ້ອງຖິ່ນ ແລະ ມີປະສິດທິຜົນ; ເອກະສານຄໍາຖາມ-ຄໍາຕອບ ກ່ຽວກັບການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ເອກະສານສຳຄັນອື່ນໆ.
ຂະນະດຽວກັນ, ທ່ານ ຢ່າຈໍ ລໍ່ ນາຍບ້ານນ້ຳທວາຍໄດ້ກ່າວວ່າ: ການເລືອກຕັ້ງ ສສຊ-ສສຂ ທີ່ຈະມາຮອດນີ້, ແມ່ນມີຄວາມສຳຄັນທີ່ສຸດ ຊຶ່ງໃນນາມຕົນເປັນນາຍບ້ານ ຈະໄດ້ເອົາໃຈໃສ່ປຸກລະດົມຜູ້ມີສິດເລືອກຕັ້ງກໍຄືປະຊາຊົນພາຍໃນບ້ານຕົນ ໃຫ້ຕື່ນຕົວມາໃຊ້ສິດຂອງຕົນເລືອກເອົາຜູ້ແທນທີ່ເຂົາເຈົ້າມັກໃຫ້ໄດ້ຕາມຄາດໝາຍທີ່ວາງໄວ້. ປັດຈຸບັນ ອະນຸກຳມະການຮັບຜິດຊອບເລືອກຕັ້ງ ສສຊ-ສສຂ ກໍໄດ້ລົງເກັບລາຍຊື່ຜູ້ມີສິດເລືອກຕັ້ງພາຍໃນບ້ານສຳເລັດເປັນທີ່ຮຽບຮ້ອຍແລ້ວ ໂດຍບ້ານນ້ຳທວາຍຜູ້ມີສິດເລືອກຕັ້ງ 18 ປີຂຶ້ນໄປປະມານ 200 ກວ່າຄົນ.
KPL
