ຂປລ
ຂປລ. ເມື່ອເວົ້າເຖິງນໍ້າເຜີ້ງແລ້ວຫລາຍຄົນ ອາດຈະຄິດວ່າມີແຕ່ໃນທໍາມະຊາດຢ່າງດຽວເທົ່ານັ້ນ, ແຕ່ຄວາມຈິງເປັນຈິງ ປັດຈຸບັນຫລາຍຄອບຄົວໄດ້ຫັນມາປະກອບອາຊີບລ້ຽງເຜິ້ງກັນຫລາຍຂຶ້ນ ເນ່ືອງຈາກນ້ຳເຜິ້ງທຳມະຊາດພຽງຢ່າງດຽວບໍ່ສາມາດຕອບສະໜອງຄວາມຕ້ອງການຂອງຕະຫລາດໄດ້ພຽງພໍ.
ຂປລ. ເມື່ອເວົ້າເຖິງນໍ້າເຜີ້ງແລ້ວຫລາຍຄົນ ອາດຈະຄິດວ່າມີແຕ່ໃນທໍາມະຊາດຢ່າງດຽວເທົ່ານັ້ນ, ແຕ່ຄວາມຈິງເປັນຈິງ ປັດຈຸບັນຫລາຍຄອບຄົວໄດ້ຫັນມາປະກອບອາຊີບລ້ຽງເຜິ້ງກັນຫລາຍຂຶ້ນ ເນ່ືອງຈາກນ້ຳເຜິ້ງທຳມະຊາດພຽງຢ່າງດຽວບໍ່ສາມາດຕອບສະໜອງຄວາມຕ້ອງການຂອງຕະຫລາດໄດ້ພຽງພໍ. ນອກຈາກນັ້ນ, ການລ້ຽງເຜີ້ງຍັງເປັນອາຊີບ ທີ່ສາມາດສ້າງລາຍຮັບໃຫ້ແກ່ຄອບຄົວໄດ້ຢ່າງຍືນຍົງ.
ການລ້ຽງເຜີ້ງບໍ່ໄດ້ຍາກຢ່າງທີ່ຫລາຍຄົນຄິດ, ພຽງແຕ່ຜູ້ລ້ຽງມີອຸປະກອນ, ມີຄວາມຮູ້ດ້ານການຈັດການ ແລະ ສະຖານທີ່ທີ່ເໝາະສົມ ກໍສາມາດລ້ຽງເຜິ້ງໄດ້ ເໝືອນດັ່ງ ບໍລິສັດ ໂຊກຣີນລາວ ຈໍາໜ່າຍ ເປັນອີກໜຶ່ງບໍລິສັດ ທີ່ລ້ຽງເຜີ້ງແບບທໍາມະຊາດ ເພື່ອຈໍາໜ່າຍ ນໍ້າເຜີ້ງ ທໍາມະຊາດ ອອກສູ່ສັງຄົມ. ການລ້ຽງເຜິ້ງໃຫ້ປະສົບຜົນສຳເລັດຜູ້ລ້ຽງຈຳເປັນຕ້ອງມີຄວາມຮູ້ ແລະ ເຂົ້າໃຈດ້ານ ລະບົບນິເວດຂອງເຜິ້ງ, ການເລືອກສະຖານທີ່ຕັ້ງຮັງທີ່ເໝາະສົມ, ການປ້ອງກັນສັດຕູຂອງເຜິ້ງ ລວມທັງການນຳໃຊ້ເຕັກນິກທີ່ຖືກວິທີ ກໍຈະຊ່ວຍເພີ່ມອັດຕາການຢູ່ລອດຂອງເຜິ້ງ, ເພີ່ມຜົນຜະລິດນ້ຳເຜິ້ງ ແລະ ຍົກລະດັບຄຸນນະພາບຜະລິດຕະພັນໃຫ້ສາມາດແຂ່ງຂັນໃນຕະຫລາດໄດ້.
ທ່ານ ອຸລິສັກ ຄູຝຶກການລ້ຽງເຜິ້ງ ຈາກບໍລິສັດ ໂຊກຣີນລາວ ໄດ້ໃຫ້ສຳພາດໃນງານວາງສະແດງສິນຄ້າ ເພື່ອສະເຫລີມສະຫລອງວັນສະຫະກອນໃນເດືອນຜ່ານມານີ້ວ່າ: ການລ້ຽງເຜິ້ງມີສິ່ງທ້າທາຍຫລາຍຢ່າງເຊັ່ນ:ຄວັນໄຟເປັນສິ່ງລົບກວນທີ່ສຳຄັນຕໍ່ເຜິ້ງ, ຂະນະດຽວກັນຍັງມີສັດຕູຫລາຍຊະນິດທີ່ສ້າງຄວາມເສຍຫາຍໃຫ້ແກ່ຮັງເຜິ້ງເປັນຕົ້ນ ແຕນບຽນ ແລະ ແມງສາບ ທີ່ຈະເຂົ້າໄປກັດກິນຕົວອ່ອນ, ຈີ່ຈຽມ ຫລື ຈົກໂຈ້, ທີ່ມັກເຂົ້າໄປລົບກວນຮັງ ລວມທັງແມງກະເບື້ອກາງຄືນ ທີ່ຈະໄປວາງໄຂ່ໃນຮັງເຜິ້ງ ເຮັດໃຫ້ເກີດຕົວໜອນເຈາະຮັງສົ່ງຜົນໃຫ້ຮັງເສຍຫາຍ ເກີດພະຍາດ ແລະ ເຮັດໃຫ້ເຜິ້ງພາກັນໜີຮັງ. ນອກຈາກນັ້ນ, ມົດ ກໍເປັນອີກໜຶ່ງສັດຕູສຳຄັນທີ່ຜູ້ລ້ຽງຕ້ອງເຝົ້າລະວັງ. ສຳລັບການເລືອກສະຖານທີ່ຕັ້ງຮັງເຜິ້ງຄວນເປັນພື້ນທີ່ໂລ່ງ ສະອາດ ແລະ ມີການອະນາໄມຢູ່ສະເໝີ ບໍ່ຄວນຕັ້ງຮັງໃນບ່ອນທີ່ຮົກເຮື້ອ ເນື່ອງຈາກເຜິ້ງເປັນສັດທີ່ມັກຄວາມສະອາດ ແລະ ບ່ອນຮົກເຮື້ອອາດມີສັດຕູຕ່າງໆລວມທັງໝີ ທີ່ມັກກິນນ້ຳເຜິ້ງເປັນອາຫານ, ຢ່າງໃດກໍຕາມ ການລ້ຽງເຜິ້ງ ສາມາດເຮັດໄດ້ທັງໃນເຂດໃກ້ປ່າ ແລະ ໃກ້ຊຸມຊົນ ຫາກພື້ນທີ່ມີຄວາມສະອາດ ແລະ ເໝາະສົມ. ດ້ານຕົ້ນທຶນການລ້ຽງຮັງເຜິ້ງພ້ອມອຸປະກອນຄົບຊຸດ ລາຄາປະມານ 500.000 ກີບຕໍ່ໜຶ່ງຮັງ, ສ່ວນເຕັກນິກໃນການລໍ້ເຜິ້ງປ່າໃຫ້ເຂົ້າຢູ່ຮັງສາມາດນຳໃຊ້ສານຟີໂຣໂມນ ຫລື ນຳໄຂເຜິ້ງ ຈາກຮັງເກົ່າທີ່ຕົ້ມແລ້ວມາທາພາຍໃນຮັງເພື່ອສ້າງກິ່ນດຶງດູດໃຫ້ເຜິ້ງເຂົ້າມາອາໄສ.
ທ່ານ ອຸລິສັກ ເວົ້າເສີມວ່າ: ການວາງຮັງ ເພື່ອລໍ້ເຜິ້ງຄວນເລີ່ມໃນຊ່ວງໄລຍະເດືອນຕຸລາ ຫາ ຕົ້ນເດືອນພະຈິກເພາະເປັນໄລຍະທີ່ເຜິ້ງເລີ່ມຊອກຫາບ່ອນສ້າງຮັງໃໝ່ ແລະ ເປັນໄລຍະທີ່ດອກໄມ້ເລີ່ມອອກດອກມີເກສອນ ແລະ ນ້ຳຫວານສຳລັບເຜິ້ງ. ສ່ວນການເກັບກ່ຽວນ້ຳເຜິ້ງຄວນດຳເນີນໃນຊ່ວງໄລຍະລະດູແລ້ງ ຫລື ປະມານເດືອນມີນາ-ເມສາເພື່ອໃຫ້ໄດ້ນ້ຳເຜິ້ງທີ່ມີຄຸນນະພາບດີ ແລະ ມີປະລິມານສູງ.
ສໍາລັບ ທ່ານໃດທີ່ຕ້ອງການ ນໍ້າເຜີ້ງທໍາມະຊາດແທ້ ສາມາດຕິດຕໍ່ໄດ້ທີ່ເບີ 020 92222846 ຫລື ເພສ So Green laos.
ໂດຍ: ມາລິດາ
KPL
