ຂປລ. ບໍລິສັດຮຸ້ນສ່ວນການບິນ ຫວຽດເຈັດ (Vietjet Aviation Joint Stock CompanyHOSE: VJC) ໄດ້ລາຍງານການເຕີບໂຕຂອງລາຍຮັບ ແລະ ກຳໄລໃນໄຕມາດທີ 4 ສົກປີ 2025ເຊິ່ງເປັນການຢືນຢັນເຖິງຂີດຄວາມສາມາດໃນການດຳເນີນງານທີ່ຄ່ອງຕົວ ແລະ ມີປະສິດທິພາບຂອງສາຍການບິນ. ໝາກຜົນານີ້ໄດ້ກາຍເປັນພື້ນຖານທີ່ໝັ້ນຄົງໃຫ້ແກ່ Vietjetໃນການກ້າວເຂົ້າສູ່ປີ 2026 ພ້ອມກັບຍຸດທະສາດການເຕີບໂຕໃນລະດັບສາກົນ.

ອີງຕາມບົດລາຍງານການເງິນ, Vietjet ມີລາຍຮັບສະເພາະຂອງບໍລິສັດໃນໄຕມາດ 4 ປີ 2025 ບັນລຸ 29.035 ຕື້ດົງ (ປະມານ 24,01 ຕື້ກີບ), ເພີ່ມຂຶ້ນ 47% ເມື່ອທຽບໃສ່ໄລຍະດຽວກັນຂອງປີຜ່ານມາ. ສຳລັບລາຍຮັບໝົດປີແມ່ນບັນລຸ 81.426 ຕື້ດົງ (ປະມານ 67,35 ຕື້ກີບ), ເພີ່ມຂຶ້ນ 14%. ກຳໄລຂັ້ນຕົ້ນສະເພາະຂອງສາຍການບິນໃນປີ 2025 ຢູ່ທີ່ 8.213 ຕື້ດົງ (ປະມານ 6,79 ຕື້ກີບ), ເຊິ່ງເປັນຜົນມາຈາກການຂະຫຍາຍເຄືອຂ່າຍການບິນ ແລະ ຕົ້ນທຶນນ້ຳມັນເຊື້ອໄຟທີ່ຫລຸດລົງເມື່ອທຽບໃສ່ປີຜ່ານມາ. ໃນປີ 2025, ລາຍຮັບລວມຂອງ Vietjet ທັງໝົດແມ່ນ 82.093 ຕື້ດົງ (ປະມານ 67,9 ຕື້ກີບ), ເພີ່ມຂຶ້ນ 14%. ກຳໄລກ່ອນອາກອນລວມບັນລຸ 2.630 ຕື້ດົງ (ປະມານ 2,18 ຕື້ກີບ), ເຕີບໂຕ 44,3%. ກຳໄລຫລັງອາກອນລວມບັນລຸ 2.123 ຕື້ດົງ (ປະມານ 1.76 ຕື້ກີບ), ເຕີບໂຕ 51,2%. ໝາກຜົນດັ່ງກ່າວແມ່ນຖືວ່າເກີນແຜນການທີ່ວາງໄວ້ປະຈຳປີເຖິງ 120%. ພາຍໃນວັນທີ 31 ທັນວາ 2025, ຊັບສິນທັງໝົດຂອງ Vietjet ມີມູນຄ່າ 139.459 ຕື້ດົ່ງ (ປະມານ 115,34 ຕື້ກີບ). ອັດຕາສ່ວນໜີ້ສິນສຸດທິຕໍ່ທຶນ (Net Debt-to-Equity)ຢູ່ທີ່ 2.25.ອັດຕາສ່ວນສະພາບຄ່ອງ (Liquidity Ratio) ຢູ່ທີ່ 1.53. ເຊິ່ງຖືວ່າເປັນໜຶ່ງໃນບໍລິສັດທີ່ມີຄວາມແຂງແກ່ນທີ່ສຸດໃນອຸດສາຫະກຳການບິນ. ນອກຈາກນີ້, ໃນລະຫວ່າງປີ, Vietjet ຍັງໄດ້ປະສົບຜົນສຳເລັດໃນການອອກຈຳໜ່າຍຮຸ້ນ 50 ລ້ານຮຸ້ນ, ເຮັດໃຫ້ທຶນຈົດທະບຽນເພີ່ມຂຶ້ນ 5 ຕື້ດົງ (ປະມານ 4.14 ຕື້ກີບ) ເພື່ອຮອງຮັບການເຕີບໂຕໃນໄລຍະຍາວ.

ໃນໄຕມາດທີ 4 ຂອງປີ 2025, Vietjet ໄດ້ບໍລິການຂົນສົ່ງຜູ້ໂດຍສານຫລາຍກວ່າ 6,7 ລ້ານຄົນ ຜ່ານຖ້ຽວບິນທັງໝົດ 36.100 ຖ້ຽວ. ຕະຫລອດສົກປີ 2025, ສາຍການບິນໄດ້ຂົນສົ່ງຜູ້ໂດຍສານລວມທັງໝົດ 28,2 ລ້ານຄົນ ດ້ວຍຈຳນວນຖ້ຽວບິນ 153.000 ຖ້ຽວ ເຊິ່ງສະແດງໃຫ້ເຫັນເຖິງການເຕີບໂຕ 9% ແລະ 11,2% ຕາມລຳດັບ ເມື່ອທຽບໃສ່ປີຜ່ານມາ. ນອກຈາກນີ້, ປະລິມານການຂົນສົ່ງສິນຄ້າທັງໝົດຍັງບັນລຸເຖິງ 113.923 ໂຕນ. Vietjet ຍັງຄົງຮັກສາຕຳແໜ່ງຜູ້ນຳທີ່ມີສ່ວນແບ່ງຕະຫລາດສູງສຸດໃນຫວຽດນາມ ໂດຍວັດແທກຈາກຈຳນວນຜູ້ໂດຍສານ ທັງໃນຕະຫລາດພາຍໃນປະເທດ ແລະ ຕ່າງປະເທດ. ໃນປີ 2025, ສາຍການບິນໄດ້ເປີດໃຫ້ບໍລິການເສັ້ນທາງການບິນທັງໝົດ 254 ເສັ້ນທາງ. ໃນນັ້ນ, ເສັ້ນທາງພາຍໃນປະເທດ ມີ 52 ເສັ້ນທາງ, ເສັ້ນທາງລະຫວ່າງປະເທດ 202 ເສັ້ນທາງ.ເສັ້ນທາງໃໝ່ເປີດເພີ່ມອີກ 22 ເສັ້ນທາງ ທີ່ເຊື່ອມຕໍ່ຫວຽດນາມໄປສູ່ຈຸດໝາຍປາຍທາງທີ່ສຳຄັນ ເຊັ່ນ: ອາຊີກາງ ແລະ ສປ ຈີນ. ພິເສດປັດຈຸບັນ Vietjet ກຳລັງເປີດໃຫ້ບໍລິການຖ້ຽວບິນລາຍວັນ (Daily flights) ທີ່ເຊື່ອມຕໍ່ລະຫວ່າງ ນະຄອນຫລວງວຽງຈັນ ສູ່ຮ່າໂນ້ຍ ແລະ ນະຄອນໂຮ່ຈີມິນ. ນີ້ຖືເປັນໂອກາດອັນດີສຳລັບນັກທ່ອງທ່ຽວຈາກ ສປປ ລາວ ທີ່ວາງແຜນຈະໄປທ່ຽວຫວຽດນາມ ຫລື ຕ້ອງການເດີນທາງຕໍ່ໄປຍັງຈຸດໝາຍປາຍທາງອື່ນໆທົ່ວໂລກ.

ໄຕມາດທີ 4ຂອງປີ 2025ຖືເປັນຂີດໝາຍທີ່ສໍາຄັນໃນຍຸດທະສາດການລົງທຶນໄລຍະຍາວຂອງ Vietjet ດ້ວຍການຮັບມອບເຮືອບິນໃໝ່ 22ລໍາ, ເຊິ່ງຖືວ່າເປັນການຂະຫຍາຍຝູງບິນທີ່ໃຫຍ່ທີ່ສຸດນັບຕັ້ງແຕ່ໄດ້ສ້າງຕັ້ງສາຍການບິນມາ. ໃນລະຫວ່າງປີ, Vietjet ໄດ້ເຊັນສັນຍາກັບບໍລິສັດ Airbus ເພື່ອຊື້ເຮືອບິນລຸ້ນ A321neo ຈຳນວນ 100ລໍາ, ພ້ອມກັບສັນຍາແຍກຕ່າງຫາກກັບບໍລິສັດ Rolls-Royce ເພື່ອຊື້ເຄື່ອງຈັກລຸ້ນ Trent 7000ຈໍານວນ 92ເຄື່ອງ ພ້ອມບໍລິການບຳລຸງຮັກສາແບບຄົບວົງຈອນ, ເຊິ່ງມີມູນຄ່າລວມເຖິງ 3,8ຕື້ໂດລາສະຫະລັດ. ໃນເດືອນທັນວາ, Vietjet Thailand ໄດ້ຮັບມອບເຮືອບິນ Boeing ລຳທຳອິດ, ເຊິ່ງເປັນການຂະຫຍາຍຂະໜາດຝູງບິນຂອງກຸ່ມບໍລິສັດ ເພື່ອຮອງຮັບການເຕີບໂຕໃນປີ 2026.Vietjet ຍັງສືບຕໍ່ລົງທຶນໃນການພັດທະນາບຸກຄະລາກອນທີ່ມີຄຸນນະພາບສູງ ຜ່ານການຮ່ວມມືຝຶກອົບຮົມນັກບິນຕາມມາດຕະຖານສາກົນ ໃນປີ 2025, ສະຖາບັນການບິນ Vietjet (VJAA) ໄດ້ຝຶກອົບຮົມນັກສຶກສາຫລາຍກວ່າ 162.000ຄົນ ຜ່ານ 15.198ຫຼັກສູດ.ເນັ້ນການສ້າງນັກບິນ, ພະນັກງານເຕັກນິກ, ພະນັກງານພາກພື້ນດິນ ແລະ ຊ່ຽວຊານດ້ານການບິນອື່ນໆ ເພື່ອຕອບສະໜອງຄວາມຕ້ອງການຂອງອຸດສາຫະກຳທີ່ເພີ່ມຂຶ້ນ.

Vietjet ສືບຕໍ່ສ້າງຄວາມຫລາກຫລາຍ ແລະ ຍົກລະດັບປະສົບການຂອງລູກຄ້າ ຜ່ານການຂະຫຍາຍຜະລິດຕະພັນ ແລະ ບໍລິການຕ່າງໆ ເຊັ່ນ: ປີ້ຍົນຊັ້ນທຸລະກິດ (Business class), ໂປຣແກຣມສະສົມຄະແນນ SkyJoy, ການຂາຍສິນຄ້າເທິງເຮືອບິນ, ລະບົບການຈອງ ແລະ ຊຳລະເງິນຜ່ານຫຼາຍຊ່ອງທາງ, ແລະ Amy ເຊິ່ງເປັນຜູ້ຊ່ວຍສະເໝືອນຈິງທີ່ນຳໃຊ້ເຕັກໂນໂລຊີ AI. ນອກຈາກນີ້, ສາຍການບິນຍັງໄດ້ນຳສະເໜີກິດຈະກຳເທິງເຮືອບິນທີ່ຕິດພັນກັບວັດທະນະທຳໃນຊ່ວງເທສະການສຳຄັນຂອງພາກພື້ນ ເຊັ່ນ: ເທສະການຊູຊອກ (ເກົາຫລີ), ເທສະການໂຮລີ ແລະ ດິວາລີ (ອິນເດຍ) ແລະ ອື່ນໆ. ໃນດ້ານການດຳເນີນງານ, Vietjet ໄດ້ມີການປັບປຸງຄັ້ງໃຫຍ່ ເຊັ່ນ: ການຂະຫຍາຍສິ່ງອຳນວຍຄວາມສະດວກໃນການເຊັກອິນ, ການຄຸ້ມຄອງບໍລິການພາກພື້ນດິນດ້ວຍຕົນເອງຢູ່ສະໜາມບິນເຕິນເຊີນເຍິດ (ສະໜາມບິນທີ່ຄຶກຄັກທີ່ສຸດໃນຫວຽດນາມ)ແລະ ນຳໃຊ້ເຕັກໂນໂລຊີການບິນທີ່ທັນສະໄໝ ເຊັ່ນ: ລະບົບຕິດຕາມຖ້ຽວບິນແບບ Real-time, ລະບົບຈັດການຂໍ້ມູນ ແລະ ການຢືນຢັນຕົວຕົນດ້ວຍລະບົບອັດສະລິຍະ (Biometric) ເພື່ອເພີ່ມປະສິດທິພາບ ແລະ ຄຸນນະພາບການບໍລິການ.

ໃນປີ 2025, Vietjet ໄດ້ຮັບລາງວັນລະດັບສາກົນຢ່າງຫລວງຫລາຍ, ລວມມີ: ສາຍການບິນທີ່ມີຄວາມປອດໄພທີ່ສຸດໃນໂລກ ແລະ ສາຍການບິນລາຄາປະຢັດທີ່ດີທີ່ສຸດ ຈາກ AirlineRatings.ລາງວັນຄວາມຍືນຍົງ (Sustainability Award 2025).ສາຍການບິນຊັ້ນນຳຂອງອາຊີດ້ານປະສົບການລູກຄ້າ ຈາກ World Travel Awards.ຕິດອັນດັບແບຣນສາຍການບິນທີ່ມີມູນຄ່າສູງສຸດໃນອາຊຽນ ປີ 2025ໂດຍ Brand Finance.50ບໍລິສັດຈົດທະບຽນທີ່ດີທີ່ສຸດໃນຫວຽດນາມ ປີ 2025ໂດຍ Forbes.ສະຖານທີ່ເຮັດວຽກທີ່ດີທີ່ສຸດໃນອາຊີ ປີ 2025ໂດຍ HR Asia.ລາງວັນລະດັບຄຳ (Gold Award) ຈາກ ESG Transport Sustainability Awards 2025ທີ່ໄຕ້ຫວັນ. ດ້ວຍຜົນປະກອບການທາງດ້ານການເງິນທີ່ແຂງແກ່ນ, ການຮ່ວມມືສາກົນທີ່ແໜ້ນແຟ້ນ ແລະ ຂີດຄວາມສາມາດໃນການດຳເນີນງານທີ່ເຂັ້ມແຂງ, Vietjet ກ້າວເຂົ້າສູ່ປີ 2026ດ້ວຍຄວາມພ້ອມຢ່າງເຕັມສ່ວນເພື່ອສືບຕໍ່ສ້າງການເຕີບໂຕທີ່ຍືນຍົງ ແລະ ຂະຫຍາຍຕົວໄປສູ່ລະດັບໂລກ.ບົດຄວາມນີ້ສະແດງໃຫ້ເຫັນເຖິງຄວາມພ້ອມຂອງ Vietjet ໃນການເປັນຜູ້ນຳດ້ານການບິນ.

KPL