ຂປລ. ແຫລ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ພິທີປະກາດຮັບຮອງ ເອົາວັດ ແລະ ພະເຈົ້າອົງຕື້ ບ້ານເຕື້ອມ ເມືອງຊໍາເໜືອ ແຂວງຫົວພັນ ເປັນມໍລະດົົກແຫ່ງຊາດ ທາງດ້ານວັດທໍາ ລະດັບທ້ອງຖິ່ນຂອງແຂວງຫົວພັນ ຈັດຂຶ້ນໃນວັນທີ 5 ທັນວາ 2025 ຜ່ານມາ ໂດຍມີ ທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນ ແຂວງຫົວພັນ, ທ່ານ ອ່ອນພັນ ທອງທິດາ ເລຂາພັກເມືອງຊໍາເໜືອ ມີບັນດາການນໍາແຂວງ, ເມືອງ, ພະສົງ-ສາມະເນນ ຕະຫລອດຮອດພຸດທະສາສະນິກະຊົນພາຍໃນ ແລະ ຕ່າງປະເທດເຂົ້າຮ່ວມ.

ວັດພະເຈົ້າອົງຕື້ ບ້ານເຕື້ອມ ເມືອງຊຳເໜືອ ເປັນວັດທີ່ມີຄວາມເກົ່າແກ່ ຊຶ່ງເປັນສະຖານທີ່ປະດິດສະຖານຂອງພະເຈົ້າອົງຕື້ ແລະ ພຣະເຈົ້າອົງຫລວງ ໃນອະດີດຈົນເຖິງປັດຈຸບັນ. ວັດດັ່ງກ່າວສ້າງຂຶ້ນໃນຊຸມປີ ພສ 2109 ໂດຍການນຳພາສ້າງຂອງອົງພະຫ້າວ ຊຶ່ງແມ່ນສະກຸນຊ່າງວຽງຈັນ ຈຸດປະສົງໃນການສ້າງວັດແຫ່ງນີ້ ເພື່ອເປັນຫລັກບ້ານຫລັກເມືອງ, ເປັນບ່ອນສັກກະລະບູຊາ ແລະ ເປັນສິ່ງທີຢັ້ງຍືນເຖິງຄວາມຈະເລີນຮຸ່ງເຮືອງ ທາງດ້ານວັດທະນະທຳຂອງອານາຈັກລາວລ້ານຊ້າງ ໃນເວລານັ້ນ. ວັດແຫ່ງນີ້ມີຮູບຊົງເອກະລັກ ພື້ນຖານສິລະປະລ້ານຊ້າງ, ກໍ່ດ້ວຍດິນຈີ່ ປູນປະທາຍ, ຫລັງຄາສູງມີຫລາຍຊັ້ນ, ມີການປະດັບດ້ວຍລວດລາຍແກະສະຫລັກໄມ້ ແລະ ຮູບແຕ້ມຝາພະໜັງຕ່າງໆ ຖືໄດ້ວ່າເປັນວັດອີກແຫ່ງໜຶ່ງທີ່ມີຄວາມງົດງາມ ຢູ່ໃນເຂດແຄວ້ນແຂວງຫົວພັນ. ອົງພະຫ້າວ ໄດ້ມີຄວາມຄິດທີ່ຈະສືບຕໍ່ສ້າງພະພຸດທະຮູບອົງທອງ ຂຶ້ນເພື່ອປະດິດສະຖານໄວ້ຢູ່ວັດແຫ່ງນີ້ຕື່ມ ພະອົງຕື້ ບ້ານເຕື້ອມ ເປັນພະປາງມະຣະມີໄຊ ມີຄວາມສູງທັງໝົດຈາກແທ່ນພະ 227 ຊັງຕີແມັດ, ບ່າໄລ່ກວ້າງ 85 ຊັງຕີແມັດ ແລະ ໜ້າຕັກກວ້າງ 122 ຊັງຕີແມັດ. ດ້ວຍຄວາມສຳຄັນເກົ່າແກ່ ແລະ ມີຄຸນຄ່າທາງປະຫວັດສາດ, ວັດທະນະທໍາ ຖືໄດ້ວ່າເປັນພະພຸດທະຮູບອົງໜຶ່ງ ທີ່ມີຄວາມເກົ່າແກ່ ແລະ ມີຊື່ສຽງ ຊຶ່ງໄດ້ສ້າງຂຶ້ນໃນປີ ພສ 2181 ໂດຍການນຳພາຂອງ ສົມເດັດສີສຸມັງ ຄະຣາປັນຍາ ພ້ອມດ້ວຍພໍ່ແມ່ປະຊາຊົນ ບ້ານເຕື້ອມ, ສ່ວນສະຖານທີ່ຫລໍ່ພະອົງຕື້ ບ້ານເຕື້ອມ ແຫ່ງນີ້ ແມ່ນຢູ່ບໍລິເວນທາງຫລັງວັດແຫ່ງນີ້ ພາຍຫລັງທີ່ມີການຫລໍ່ສຳເລັດແລ້ວ ເຫັນວ່າພະອົງດັ່ງກ່າວໄດ້ມີອົງປະກອບ ແລະ ຮູບຊົງລັກສະນະທີ່ງົດງາມ ຕາມຈຸດປະສົງທີ່ຕ້ອງການແລ້ວ ຈຶ່ງໄດ້ທຳພິທີອັງເຊີນຂຶ້ນປະດິດສະຖານຢູ່ເທິງແທ່ນທີ່ອົງພະຫ້າວ ໄດ້ທຳການຫລໍ່ເອົາໄວ້ແລ້ວກ່ອນໜ້າຢູ່ວັດແຫ່ງນີ້ ແລະ ໄດ້ຂຽນຈາລຶກໃສ່ແທ່ນອົງພະເຈົ້າອົງຕື້ ທີ່ມີເນື້ອໃນລະບຸເຖິງປີສ້າງ ພ້ອມດ້ວຍສັດທາສ້າງພະອົງຕື້ດັ່ງກ່າວ ແລະ ໄດ້ໃສ່ຊື້ວ່າພະເຈົ້າອົງຕື້ ບ້ານເຕື້ອມ ຈົນຮອດທຸກວັນນີ້.

ໃນພິທີດັ່ງກ່າວ, ການນໍາແຂວງ ແລະ ເມືອງ ຍັງໄດ້ມອບໃບຢັ້ງຢືນ ພ້ອມທັງເປີດປ້າຍ ແລະ ລັ່ນຄ້ອງ 9 ບາດ ຕື່ມອີກ.